Nau Ol i Stap Wanbel Aninit Long Kingdom
“Sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.”—LUK 21:31.
1. Jisas i tok profet long wanem samting long Luk sapta 21?
NAMBAWAN bikpela profet em i tok: “Sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.” Dispela profet em Krais Jisas. Em i tok long wanem ol samting? Em i tok long ol samting i kamap nau long taim bilong yumi! Nau ol samting long graun i laik bagarap na ol manmeri i bruk bruk nabaut. Jisas i tok ol dispela samting i olsem “mak” na i makim dispela pasin bilong nau i laik pinis. Ol manmeri bilong dispela graun “ol i mekim woa na bikpela pait, . . . na long graun bel bilong olgeta lain man . . . i bagarap tru na ol i pret.” (Matyu 24:3, 7, 8; Luk 21:9, 25) Tasol lain bilong Jehova i no ken pret.
2. Yumi mas ting olsem wanem long ol samting i kamap long graun? Bilong wanem yumi mas ting olsem?
2 Bikpela bilong yumi, Jisas, em i tok: “Bihain ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau.” (Luk 21:28) God bai kisim bek yumi long wanem samting? Em bai kisim bek yumi long dispela graun bruk bruk nabaut na i olsem i gat bikpela sik na i laik bagarap.—1 Jon 5:19.
Hevi Bilong Wok Politik
3. Ol man i gat save ol i tok wanem long wok bilong ol gavman long nau?
3 Wok bilong Yunaitet Nesen em bilong helpim olgeta lain i stap wanbel, bilong ol yet i bruk bruk. Sekuriti-Kaunsel bilong Yunaitet Nesen i tok: “Ating liklik taim na long olgeta hap bilong graun bai i no gat lo moa.” Ol lain man i bruk bruk tru! Wanpela man i raitim tok long nius (Washington Post) na em i tok: ‘Ol gavman i no inap bosim moa ol samting.’ Na wanpela man bipo em i wok wantaim presiden bilong Amerika, em i tok: “Kirap long 1960 samting ol gavman long olgeta hap, long hap bilong sankamap na san go daun, ol i no wok gut moa.” Na wanpela man bilong bipo em i ambasedo bilong Amerika long Yunaitet Nesen, em i tok: ‘Ol i mekim nabaut tasol.’
4. Olsem wanem ol samting i kamap nau olsem Luk 21:26 i tok?
4 Na samting nogut moa yet inap kamap, long wanem pasin birua i kamap strong, na sampela lain i holim pinis ol bom nogut bilong nuklia. Ol i hipim pinis planti bom inap long bagarapim 1,600,000 biktaun kain olsem Hirosima. Wanpela man bilong Amerika, bipo em i stap ambasedo bilong Rasia, em i tok, dispela tupela bikpela gavman tru, bihain “ol i mas pait.” Ol dispela samting i kamap long nau, long wanem ol lain man i bruk bruk. Bikpela bagarap inap kamap. Ol dispela samting i kamap olsem Jisas i tok taim em i mekim tok profet long taim bilong “pinis.” Em i tok: “Planti manmeri bai ol i tingting long ol samting i laik kamap long graun, na bai bel bilong ol i pret tru, . . . Long wanem ol sta samting long skai bai guria.” (Luk 21:26) Yes, skai tu bai guria, long wanem ol lain man i redim planti roket-bom bilong sutim i go antap.
Ol Bikpela Bisnis i Laik Bagarap
5. Ol man bilong bisnis i tingting planti long wanem samting?
5 Ol man bilong bisnis ol tu i bruk bruk na ol i pret. Presiden bilong Wol Beng i tok: ‘Mi ting i no gat wanpela samting inap i stap gutpela.’ Long 1982, inap 24 kantri ol i gat planti wok bisnis long hap bilong ol, ol i miting na ol i tok, long 1983, long hap bilong ol, bai 30 milion manmeri i no gat wok. Na ol samting i kamap olsem ol i tok!
6. Baibel i tok wanem long ol misin na mani samting? Bihain bai wanem samting i painim ol misin?
6 Wanpela saveman long wok bilong mani, em i bin kisim Nobel Prais, em i stori long wok bisnis na mani long nau na em i tok: “Olgeta samting i nogut.” Dispela hevi bilong mani i painim tu ol misin. Dispela “bikpela wara” bilong Revelesen 17:1, 15, em “olgeta lain manmeri, na ol bikpela bikpela lain ol i bung i stap, na ol manmeri i gat olgeta kain skin, na olgeta tok ples,” ol i givim baksait long God, ol i lusim ol misin, olsem na hevi i painim ol misin na ol i sot long mani. (Lukim tu Revelesen 16:12.) Tasol bihain bai bikpela hevi tru i painim ol dispela misin, long wanem Jehova bai givim strafe long ol olsem em i tok pinis, em i tok: “Harim!” Wanpela samting nogut tru em bai kamap! Kain samting nogut olsem i no bin kamap bipo. Bai ol i tromoi mani silva bilong ol long rot. Mani gol bilong ol bai stap olsem samting nogut tru long ai bilong ol. Mani silva na mani gol bilong ol i no inap helpim ol long de bilong kros bilong Jehova.” (Esikiel 7:5, 19, NW) Dispela bikpela hevi bilong ol misin bai painim tu ol man bilong mangal ol i mekim wok long ol bikpela bisnis bambai ol inap kisim planti samting bilong ol yet!—Revelesen 18:2, 3, 16.
Ol Misin i Bruk
7. Olsem wanem wok misin Katolik i bin mekim i no helpim ol lain man long i stap wanbel?
7 Orait, nau yumi ken skelim ol misin. Ol misin tu ol i bruk bruk. Sori tru! I gat sampela pris Katolik ol i helpim ol man mekim pait na ol i laik daunim gavman, na sampela bisop ol i strong long tokim gavman ol i no ken wokim moa ol bom nogut bilong nuklia. Pop, em nambawan bilong misin Katolik, em i makim yia 1983 i olsem ‘Yia Holi’, Tasol yu ting dispela samting i helpim ol man? Nogat. Pasin birua i kamap strong moa. Wanpela pop bilong bipo i makim yia 1933 i Yia Holi, tasol wanem samting i bin kamap long dispela yia? Hitler i kisim wok gavman long Jemani na ol samting bilong kirapim Namba Tu Pait i kamap.
8. Ol misin Talatala i bruk bruk olsem wanem?
8 Ol 301 misin Talatala na Otodoks insait long Wol Kaunsil Bilong Ol Misin ol i bin givim bikpela mani tru, inap planti handet tausen kina, bilong helpim ol lain politik i mekim pait bilong daunim gavman. Lain bilong ol dispela misin ol inap olsem 400 milion manmeri. Long hap bilong Amerika i gat kain kain misin, inap 1,200 samting. Biugel bilong ol i no krai stret! Ol i bruk bruk na dispela samting i bin helpim “pasin nogut bai i kamap bikpela” nau long taim bilong “pinis.” Ol samting i kamap olsem Jisas i tok.—Luk 21:9; Matyu 24:3, 12.
9. Olsem wanem yumi inap save long lotu kristen tru?
9 Ol misin bilong Krisendom i bruk, tasol aposel Pol i tok, ol Kristen tru i mas “i stap wanbel” na i “stap wanlain.” Pol i tok: “I gat wanpela bodi tasol, na i gat wanpela Spirit tasol. . . . I gat wanpela Bikpela tasol, na wanpela bilip tasol, na wanpela baptais tasol. I gat wanpela God, em i Papa bilong yumi olgeta. Em i antap long olgeta man, na i wok namel long olgeta man, na i stap insait long olgeta man.”—Efesas 4:3-6.
Husat Ol i Stap Wanbel?
10. Husat ol i “stap wanbel”? Olsem wanem na ol tasol i stap wanbel?
10 Husat i “stap wanbel”? Ol manmeri bilong dispela graun ol i no i stap wanbel. Ol lain bilong wok politik na wok bisnis, na ol misin, ol i bruk bruk. Tasol God i kisim bek yumi long dispela graun bilong Seten. Yumi bihainim tok bilong Baibel, yumi no bilong dispela graun. Olsem na taim Jisas i beten askim God long helpim lain bilong em, em spirit holi i bin makim ol, Jisas i tok: “Ol i no bilong dispela graun, olsem mi no bilong dispela graun.” Na em i tok: “Tasol mi no beten bilong helpim ol dispela tasol. Nogat. Mi beten bilong helpim ol man i harim tok bilong ol na i bilip long mi. Mi laikim dispela olgeta man i stap wanbel, olsem yu Papa, yu stap long mi na mi stap long yu. Olsem tasol mi laikim ol i stap long yumitupela. Olsem na ol manmeri bilong graun ol i ken bilip long yu bin salim mi na mi kam.”—Jon 17:16-21.
11. Olsem wanem ol Kristen tru i bin kamap “wanpela lain sipsip tasol”?
11 Ol Witnes Bilong Jehova ol i stap wanbel. Ol i bilong olgeta hap na olgeta lain, tasol ol i stap wanbel. Na gutpela tru, planti milion manmeri i lukim ol i stap wanbel na ol i stadi na ol i bilip. Ol dispela “arapela sipsip” bilong Bikpela ol i bung wantaim “liklik lain sipsip,” em ol brata bilong Krais. Olsem na olgeta Witnes Bilong Jehova i pas wantaim na i stap wanbel. Ol i stap olsem “wanpela lain sipsip tasol” aninit long Gutpela Wasman. (Jon 10:l6; Luk 12:32) Olgeta i amamas long kisim nem olsem ol Witnes Bilong Jehova na ol i stap wanbel long Kingdom!
Wanbel long “Kingdom”?
12. (a) Bilong wanem Kingdom bilong God i mas mekim yumi stap wanbel? (b) Maski ol lain man i bruk bruk, tasol bilong wanem yumi ken amamas?
12 Bilong wanem yumi tok, wanbel long Kingdom? Long wanem Kingdom em i nambawan bikpela samting Baibel i toktok long en. Olsem na Kingdom i mas helpim yumi long i stap wanbel. Yumi amamas long lukim ol samting i kamap olsem Jisas i kolim pinis na yumi ken save Kingdom bilong em i kamap pinis long heven long yia 1914. Amagedon i wok long i kam klostu, tasol Jisas i tok yumi mas amamas. Em i tok, “ol manmeri bilong dispela taim”—em dispela taim i kirap long 1914—“ol i no i dai pinis yet, na bai dispela olgeta samting i kamap.” (Matyu 24:34) Sampela manmeri bilong dispela taim, ol inap i stap laip i go i go inap long yia 2000. Tasol i gat planti samting na yumi ken save, “pinis” i klostu na yumi no ken wet longtaim olsem!
13. Ol lain bilong dispela graun ol i bruk bruk na ol i pret, tasol olsem wanem na yumi no pret?
13 Habakak, em profet bilong Jehova, em i stori long dispela bagarap i laik kamap na i tok: “Yu mas tingim na wetim i stap; . . . Em i no ken i kam bihaintaim.” (Habakak 2:3, NW) Ol manmeri bilong dispela graun, lain bilong ol i bruk bruk na ol i pret, tasol yumi no pret, long wanem yumi stap wanbel aninit long Kingdom. Kingdom bilong God, em yumi save beten askim God long en, em i kamap pinis. (Matyu 6:9, 10) Na yumi stap wanbel tru. Olgeta dispela samting i kamap olsem ol profet bilong Jehova i tok pinis.—Aisaia 9:6, 7; Danyel 2:44; 7:13, 14, 27.
“Ol Bun i Drai” i Kirap Bek
14. Esikiel 37:1-4 i stori long wanem narapela kain samting?
14 Tingim tok profet bilong Esikiel long sapta 37, em i tok:
“Spirit bilong Jehova i stap long mi na em i putim mi i sanap long ples daun na ol bun i drai i pulap long dispela ples daun. Na em i mekim mi wokabaut klostu long ol dispela bun na lukim! planti tru ol i stap long graun long dispela ples daun, na lukim! ol i drai tru. Na em i tokim mi: ‘Pikinini bilong man, yu ting ol dispela bun inap kisim bek laip?’ na mi bekim tok, olsem: ‘Bikpela King Jehova, yu yet yu save.’ Na em i tokim mi: ‘Mekim tok profet na tokim ol dispela bun, “Ol yupela ol bun i drai, yupela harim tok bilong Jehova.”’”—Esikiel 37:1-4, NW.
15. Dispela i olsem piksa na i makim wanem samting long nau?
15 Olaman! Planti planti bun i drai ol i pulap long wanpela ples daun! Dispela i no makim samting i mas kamap bihain long Amagedon. Nogat. Em i makim samting i bin kamap long yia 1919. Ol dispela bun i drai i makim lain remnan long dispela taim. Ol i olsem i no gat laip; ol i no mekim wok.
16, 17. Jehova i tok promis long mekim wanem? Olsem wanem dispela bai i olsem wanpela mirakel?
16 Tasol Jehova i kirap stretim dispela samting. Em i tok:
“Bikpela King Jehova i tok long ol dispela bun, olsem: ‘Bai mi putim win i go insait long yupela na bai yupela kisim bek laip. Na bai s givim rop na mit long yupela na karamapim skin long yupela na putim win i go insait long yupela na yupela mas kisim bek laip; na yupela mas save, mi Jehova.”
Olsem na ol i kirap na i stap laip gen—“bikpela lain tru.”—Esikiel 37:5-10, NW.
17 No gat wanpela saveman bilong saiens inap mekim dispela samting Jehova i mekim. Ol saveman inap kisim ol bun bilong wanpela man i dai pinis na skruim wantaim gen. Tasol ol i no inap kirapim bek laip long ol dispela bun na bai man i stap laip gen.
18. (a) Long 1918 na long kirap bilong 1919 lain bilong God i stap olsem wanem na i olsem i no gat man bilong helpim ol? (b) Jehova i mekim wanem long ol dispela gutpela man olsem profet i tok pinis?
18 Tasol God Jehova i wokim mirakel olsem long ol Witnes Bilong Jehova dispela taim nau. Long taim bilong Namba Wan Pait Bilong Olgeta Hap ol i bruk nabaut. Ol i stap nabaut olsem ol bun i drai i stap nabaut long ples daun. Gavman i pasim nambawan ofis bilong ol long Bruklin, na ol ofisa bilong Sosaiti ol i stap kalabus. Sampela ol i givim kalabus long ol inap 20 yia. Ol i no autim tok moa. Long 1918 na long kirap bilong yia 1919 i olsem ol i dai na i no gat man bilong helpim ol. Tasol Jehova i tingim ol dispela manmeri i bin wok long autim tok bilong Kingdom na long 1919 em i kirapim bek ol, olsem em i tok pinis long Esikiel 37:14 (NW):
“Jehova i tok: ‘Na bai mi putim spirit bilong mi long yupela, na yupela mas kisim bek laip na i stap. Na mi bai bringim yupela i go sindaun gen long graun bilong yupela; na yupela mas save, mi Jehova, mi tok pinis long mekim dispela samting na mi mekim pinis.”
19. (a) Jehova i kirapim bek lain bilong em olsem wanem? Bilong mekim wanem wok? (b) Bilong wanem Sosaiti i mas skruim sampela haus faktori na ofis bilong ol i go bikpela?
19 Ol man i mekim nogut long lain bilong Jehova, tasol Jehova i kirapim bek ol na ol i stap gutpela gen long ol samting bilong spirit. Na Jehova i givim wok long ol. Ol i kirap gen long autim gutpela tok bilong Kingdom. Ol i autim long olgeta hap bilong graun. Long nau, long olgeta de, ol i save lusim wan milion samting aua long autim dispela gutpela tok. Ol i mekim bikpela wok, olsem na ol i bin skruim nambawan ofis long Amerika i go bikpela. Dispela ofis i wok wantaim ol namba tu ofis long ol narapela hap bilong graun, na ol i wokim ol Baibel na buk na nius bambai ol inap “autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
20. Lain bilong God i stap olsem wanem long nau? Husat i mekim na dispela samting i kamap?
20 Husat i mekim na ol i stap wanbel na ol i wok gut wantaim? Jehova i tok: “Mi yet mi mekim.” Em wanpela wok bilong Kingdom. Kingdom i stap tru!
Wok i Go Bikpela
21. (a) Ol Witnes Bilong Jehova long nau, olsem wanem ol i wankain olsem ol Kristen bilong pastaim? (b) Nau ol i singautim ol man i kam mekim wanem? Na wanem samting i kamap?
21 Long olgeta hap Bilong graun ol gutpela misineri na painia na ol narapela brata sista long ol kongrigesen, ol i wok strong yet long autim dispela gutpela tok. Ol witnes bilong Jehova long nau ol i kain olsem ol Kristen Bilong pastaim—ol i ‘autim dispela gutnius long olgeta manmeri i stap long graun.’ (Kolosi 1:23) Jehova em i “strongpela God. Em i strongpela king na i antap long olgeta god giaman.” Yumi save long dispela samting, olsem na yumi singautim ol manmeri i gat gutpela bel na yumi tok: “Yupela kam, yumi daunim het na lotu long em. Bikpela i bin wokim yumi. Orait, yumi go klostu long em na brukim skru.” Yumi amamas, long wanem, long olgeta wik inap 3,000 samting nupela man i kisim baptais. Ol i kam insait long lain Bilong Gutpela Wasman na ol i stap wanbel wantaim ol! Nau ol tu “i lotu long Papa long spirit na long pasin i tru.”—Sam 95:3-6; Jon 4:23, 24.
22, 23. (a) Bilong wanem i bikpela samting ol “sipsip” i mas wanbel? (b) Baibel i tok wanem long pasin wanbel bilong yumi na long as bilong en?
22 Jehova i wok long skelim lain bilong Seten, em ol i bruk bruk, olsem na ol sipsip i mas i stap wanbel, em bikpela samting. Na ol i mas bihainim tok bilong ensel “i gat gutnius bilong i stap oltaim oltaim, na em i gat wok bilong autim dispela gutnius.” Ol i mas tokaut strong, olsem: “Taim i kamap pinis bilong God i skelim olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” Olsem wanem long yu? Yu stap wanbel long Kingdom olsem ol?—Revelesen 14:6, 7.
23 Inap 2 milion 500 tausen manmeri ol autim tok bilong Kingdom long 205 kantri! Dispela bikpela lain manmeri ol i stap wanbel! Spirit bilong God i wok long ol na ol i kamapim ol gutpela pasin bilong spirit. (1 Korin 2:12; Galesia 5:22, 23) Ol i bilong ol narapela narapela lain, tasol ol i gat wanpela tok ples tasol, em tok i tru. (Sefanaia 3:9) Ol i wok gut wantaim—ol i stap wanbel long Kingdom!
24. Olsem wanem ol samting i bin kamap olsem Aisaia sapta 60 ves 17 na 22 i tok?
24 Maski bipo ol i gat narapela narapela tingting long sampela samting, tasol nau ol i stap wanbel. Kirap long yia 1938 Jehova i bosim tru lain bilong em, olsem na ol i stap wanbel. Dispela samting i truim tok promis bilong Jehova long Aisaia 60:17, (NW). Em i tok: “Bai mi makim pasin sekan i stap olsem ol wasman bilong yu, na stretpela pasin bai stap olsem ol bos bilong yu.” Kain kain samting nogut i bin kamap long taim bilong Namba Tu Pait Bilong Olgeta Hap, na ol man i mekim nogut tru long ol Witnes Bilong Jehova, tasol wok bilong Kingdom i go bikpela. Lain bilong God ol i stap wanbel na ol i wok strong long autim tok bilong kingdom long olgeta hap bilong graun, olsem na ol samting i kamap olsem Aisaia 60:22 (NW) i tok: “Man nating em bai kamap planti olsem wan tausen, na man i liklik em bai kamap olsem wanpela bikpela lain. Mi Jehova, mi yet bai mi hariapim dispela wok long taim stret bilong en.”
25. Ol Witnes i wanbel tru long Kingdom na wanem samting i kamap?
25 Long taim bilong ol hevi bilong Namba Tu Pait Bilong Olgeta Hap i gat 100,000 Witnes tasol long olgeta hap. Tasol long 1980 samting i gat 70,000 Witnes i autim tok long Kanada, na 70,000 long Frans, na 80,000 long Japan, na 90,000 long Englan, na winim 100,000 long Itali na Jemani na Naijiria, na winim 130,000 long Meksiko, na winim 140,000 long Brasil, na winim 250,000 Witnes i stap gut long wok long ol ples i gat tambu. Na nau, long hap bilong Amerika, i gat 643,170 Witnes ol i mekim wok. Tru tumas, Jehova i bin truim tok promis bilong em, em i tok, dispela lain em Nem bilong em i stap long ol, ol bai kamap “bikpela lain.” Ol i stap wanbel tru long Kingdom!
Bai Yu Bekim Wanem Tok?
□ Olsem wanem ol tripela hap bilong oganaisesen bilong Seten i bruk bruk?
□ Husat ol i stap wanbel tru? Olsem wanem na ol i stap wanbel?
□ Olsem wanem ol samting i bin kamap olsem Esikiel 37:1-14 i tok long en?
□ Ol Witnes i stap wanbel long Kingdom na ol i mekim wanem bikpela wok bilong autim tok?
[Piksa long pes 17]
Nau long taim bilong yumi ol gavman na ol bikpela bisnis na ol misin i bruk bruk tru. Bihain liklik bai strafe bilong God i painim ol
[Piksa long pes 20]
Esikiel i lukim ol “bun i drai” i kisim bek laip. Dispela i makim lain bilong God long nau ol i kisim bek strong bilong spirit na ol i stap gutpela long ol samting bilong spirit