Tok Bilong God i Gat Laip
Rot Bilong Save Long As Bilong Tok Bilong Baibel
OLSEM WANEM? Yu save kaunim Baibel, tasol yu hatwok long save long as bilong ol tok bilong en? Planti manmeri i save hatwok olsem. Bilong wanem i hatwok? Wanpela samting i bin kamap long namba wan senseri long hap bilong Gasa long Isrel em inap helpim yumi long save long ol samting yumi mas mekim bambai yumi inap save long as bilong ol tok bilong Baibel.
Wanpela man i bosim olgeta mani samting bilong Kwin bilong Itiopia em i harim tok long God bilong ol Juda, em God Jehova, na em i go long Jerusalem bilong lotuim em. Em i laik go bek long ples bilong em long Afrika na em i bihainim rot i no gat man. Em i holim rait bilong Profet Aisaia na em i kaunim strong.
Man i ran i go klostu long karis em Filip, em i wanpela disaipel. Na spirit holi i tokim Filip, “Yu go klostu na yu go wantaim dispela karis.” Orait Filip i ran i go klostu na i harim dispela man i kaunim buk bilong Profet Aisaia. Sapta 53 ves 7 (NW) i tok: “Ol i bringim em i kam olsem ol i save bringim sipsip i kam bilong kilim i dai. Taim ol i katim gras bilong sipsip meri, sipsip i no opim maus bilong en, olsem tasol dispela man i no opim maus bilong em.” Na Filip i askim em: “Ating yu save as bilong dispela tok yu ritim, o nogat?”
Dispela man bilong Itiopia em i man bilong pasin daun. Em i laik kisim sampela save moa long trupela God na ol samting God i laik mekim. Olsem na em i bekim tok: “Sapos man i no soim rot long mi, bai mi inap save olsem wanem?” Na em i tokim Filip: “Yu kam antap na sindaun wantaim mi.” Na em i tokim Filip: “Mi askim yu. Profet i tok long husat na i mekim dispela tok? Em i tok long em yet, o em i tok long narapela man?”
Nau Filip i tok klia long em na i tok, dispela hap tok bilong Aisaia i tok profet long Jisas bilong Nasaret. Filip i tok, ol i bin kilim Jisas i dai olsem wanpela pikinini sipsip, tasol em i kirap bek pinis. Em i man bilong helpim ol manmeri God i bin tok promis long en. Na Filip i kamapim ol narapela hap tok bilong Baibel tu bilong soim dispela man, Jisas em i dispela man God i bin makim em bilong helpim ol man. Nau dispela man bilong Itiopia i kisim gut as bilong ol dispela tok em i bin kaunim. Tupela i wokabaut i go yet, na em i tok: “Lukim, wara i stap. Wanem samting i pasim rot na mi no inap kisim baptais?” Na Filip i baptaisim dispela nupela disaipel bilong Jisas.—Aposel 8:26-39.
Na dispela stori bilong Baibel i soim yumi husat inap helpim yumi long kisim save long as bilong ol tok bilong Baibel. Filip i save bung wantaim ol aposel long Jerusalem na wantaim kongrigesen. Em i no save kaunim Baibel em wanpela tasol na tokim ol man long tingting bilong em yet long ol dispela tok. Nogat. Olsem na em inap helpim dispela man bilong Itiopia long kisim gutpela save God Jehova i givim long ol man long rot bilong oganaisesen bilong em. (Aposel 6:5, 6; 8:5, 14, 15) Long nau tu ol manmeri long kongrigesen tru bilong God ol i mas helpim yu bambai yu inap save long as bilong ol tok bilong Baibel.