Kisim Helpim Bilong Save Gut Long Baibel
BAIBEL em narapela kain buk. Ol man bilong raitim ol tok bilong en i tok God yet i as bilong ol tok ol i raitim. Na tru tumas, ol tok bilong Baibel yet i kamapim klia tru olsem tok bilong ol i tru. (2 Timoti 3:16) Baibel i stori long planti samting, tasol em i stori tu long yumi man i bin kamap olsem wanem, na i gat wanem as na yumi stap, na wanem samting bai painim yumi long bihain. Tru tumas, dispela buk em inap tru long yumi skelim ol tok bilong en!
Ating yu bin traim long ritim Baibel, tasol yu pilim hatwok long kisim gut save long ol tok bilong en. Ating yu no save long wanem hap stret yu bai ritim bilong painim bekim bilong ol askim bilong yu. Sapos olsem, orait dispela samting i no painim yu tasol, nogat. Samting i painim yu i wankain olsem samting i painim wanpela man em i bin i stap long taim bilong ol aposel. Em i sindaun long karis na em i lusim Jerusalem na em i laik i go bek long as ples bilong em long Itiopia. Dispela bikman bilong Itiopia i wok long ritim strong ol tok profet i stap long Buk Aisaia, em ol i bin raitim winim 700 yia paslain.
Kwiktaim, wanpela man i ran klostu long karis bilong em i tok gude long em. Dispela man em Filip, em i wanpela disaipel bilong Jisas, na em i askim dispela man bilong Itiopia: “Ating yu save long as bilong dispela tok yu ritim, o nogat?” Dispela man bilong Itiopia i tok: “Sapos i no gat man i tokim mi long as bilong dispela tok, orait bai mi inap save olsem wanem?” Na em i tokim Filip long kalap long karis. Filip i kamapim as bilong tok dispela man bilong Itiopia i bin ritim, na bihain em i autim “gutnius bilong Jisas.”—Aposel 8: 30-35.
Wankain olsem long bipo Filip i bin helpim dispela man bilong Itiopia long kisim gut save long Tok Bilong God, long nau ol Witnes Bilong Jehova i save helpim ol man long kisim gut save long Baibel. Ol bai amamas long helpim yu tu. I gutpela sapos pastaim yu kisim save long ol bikpela as tok bilong Baibel. (Hibru 6:1) Taim save bilong yu i kamap bikpela moa, bai yu inap kisim samting em aposel Pol i kolim olsem “strongpela kaikai”—em ol strongpela tok i tru. (Hibru 5: 14) Tru, yu stadi long Baibel, tasol ol narapela buk na nius samting—ol buk bilong helpim man long stadi long Baibel—inap helpim yu long painim na kisim gut save long ol tok bilong Baibel i stori long kain kain samting.
Ating yu inap stretim rot long mekim stadi long wanpela taim na ples i stret long yu. Sampela man i save stadi long rot bilong telefon. Dispela stadi i no kain olsem sumatin i stap long klas-rum, nogat; yu tasol wantaim tisa bilong yu bai sindaun long dispela stadi na em bai mekim stadi i stret long sindaun bilong yu na save yu gat. Yu no gat wok long givim mani bilong baim dispela stadi bilong Baibel. (Matyu 10:8) I no gat ol tes samting, na tisa i no ken mekim wanpela samting bilong semim yu. Yu bai kisim bekim long ol askim bilong yu, na kisim save long rot bilong i go klostu long God. Tasol i gat wanem as na yu mas stadi long Baibel? Orait nau yumi ken skelim olsem wanem na pasin bilong stadi long Baibel inap mekim yu i stap amamas.