Ripot long Wok Bilong Kingdom
“Ol i No Inap Daunim Yu”
LONG wanpela kantri long hap bilong Sentral Amerika, 15 man ol i gat gan samting ol i go insait long haus bilong tupela Witnes Bilong Jehova na holim tupela na bringim ol i go long 75 man, em ol i holim stik bilong paitim man na naip i gat tupela sap bilong en. Ol dispela man i tok bilas long tupela Witnes hia na bihain ol i kisim tupela i go long wanpela bikpela lain man ol inap olsem 350, em ol tu i holim stik bilong paitim man na naip i gat tupela sap bilong en. Ol i ting bai tupela brata i pret na lusim bilip Kristen bilong tupela, na bung wantaim ol. (Aisaia 2:4) Tasol tupela i no lusim bilip liklik, na tupela i tok ol i no inap insait long lain ami bilong ol dispela man. Olsem na ol i tromoi tupela brata i go long kalabus. Tasol planti man bilong ol narapela lotu ol i lusim bilip na ol i go i stap long maunten wantaim ami bilong dispela bikpela lain.
Long de bihain, ol i kisim tupela brata i go long biktaun bilong kot gen. Taim ol i wokabaut long rot, ol soldia i tok ol Witnes i bin paulim tingting bilong tupela brata. Tupela brata i tok: “Tingting bilong mipela i no Paul, tasol em i senis! Nau mipela i no save mekim nogut long narapela man; mipela i no save stil, o dring spak, o bagarapim marit.” Taim jas i mekim kot, em i mekim gutpela pasin long tupela brata, na em i tok: “Sapos olgeta man i mekim wankain pasin olsem yupela i mekim, ol samting bai narapela kain ․․․ God bilong yupela i mas lukautim yupela.” Na ol i lusim tupela brata i go bek long haus bilong ol.
Bilong wanem ol i save mekim nogut long ol Kristen, em ol i save bihainim tu bilong God na bihainim stretpela pasin na ol i no save mekim nogut long narapela man? Long wanem ol i “no bilong dispela graun” na ol i no insait long wok politik bilong dispela graun. (Jon 17:16) Maski Seten wantaim lain bilong em ol i pait wantaim ol wokboi bilong Jehova, tasol Jehova i no inap larim ol i daunim yumi. Dispela tok i mekim gut bel bilong yumi, a? (Jeremaia 1:19) Tru tumas, Jehova i bin lukautim lain bilong em long dispela ples nau yumi stori long en. Jas i bin mekim gutpela pasin, long wanem em i tingim pasin bilong ol Witnes, em ol i no save insait long wok politik bilong dispela graun.
◻ Tok bilong Jeremaia i stret tu long wanpela samting i bin kamap long Afrika, long wanpela ples em gavman i tambuim wok bilong ol Witnes Bilong Jehova. Ripot i stori long ol hevi i save painim ol brata sista long dispela hap taim ol i helpim ol man long kisim save long ol gutpela samting Jehova i laik mekim, na ripot i tok moa, olsem: “Ol Witnes i no save insait long wok politik, olsem na ol i kalabusim planti brata bilong yumi. Taim kalabus bilong ol i pinis, ol i kalabusim ol gen. Ol i save paitim tru ol brata na wipim ol, na ol i strong tru long ol brata i mas lusim bilip Kristen bilong ol. Ol i bin paitim nogut tru wanpela brata, tasol em i no lusim bilip, olsem na sampela soldia i toktok hait na tok long kilim em i dai. Tasol bos bilong ol soldia i harim tok long samting ol i laik mekim, olsem na em yet i helpim brata, na long pasin hait em i salim dispela brata i go long narapela taun, na ol soldia i no inap kilim em i dai.”
Maski ol man i mekim nogut long ol Witnes Bilong Jehova, tasol dispela samting i no pasim ol long mekim dispela wok God i givim long ol long autim tok. (Matyu 24:14) Jehova i save strongim lain bilong em long rot bilong spirit holi bilong em, na taim ol i sanap strong, em i save blesim ol. Ripot i kam long dispela kantri i tok moa, olsem: “Maski ol brata long dispela hap i gat planti hevi, na ol i hangre, na sik, na pait i kamap namel long ol manmeri bilong dispela hap, na ol man i mekim nogut long ol, tasol lain pablisa i bin i go bikpela inap 17 pesen. Na lain manmeri i kam long Memorial, dispela lain tu i go bikpela inap 21 pesen, na inap olsem 21 pesen bilong ol pablisa ol i bin mekim wok painia helpim long Epril 1984.
Olsem na maski ol man i mekim nogut long ol brata sista bilong yumi, tasol ol i amamas. Ol i wetim Jehova i helpim ol, na ol i tingim tok bilong Jeremaia, em i tok: “Jehova i tok olsem: ‘Ol bai kirapim pait long yu, tasol ol i no inap daunim yu, long wanem, “Mi stap wantaim yu na mi bai helpim yu.”’”—Jeremaia 1:19, NW.
[Piksa long pes 23]
Maski ol man i mekim nogut long ol wokboi bilong Jehova, tasol em i save strongim ol