Ol Misineri Bilong Skul Giliat—Ol i Givim Bel Tru Long Wanpela Wok
“LONG wik i go pinis, yupela i sumatin; long wik antap, bai yupela i kamap misineri.” Dispela tok i kamapim tingting bilong ol 23 sumatin i stap long bung bilong makim ol i winim skul pinis. Ol dispela sumatin i bilong Namba 81 klas bilong Skul Giliat bilong Sosaiti Wastaua. Ol yet wantaim ol narapela 4,262 manmeri i stap long dispela bung long Haus Kibung bilong ol Witnes Bilong Jehova long Jesi Siti long Septemba 7, 1986, ol i no ken lusim tingting long dispela de.
Martin Poetzinger i mekim beten bilong kirapim dispela bung, na bihain Carey Barber, em siaman, em i stori long ol tok samting bai kamap long dispela bung na em i tok, planti tausen manmeri bilong autim tok ol i bin skul long Skul Giliat na ol i givim bel tru long wanpela wok, em olsem: Ol i laik kamap misineri tru na i go long ol longwe longwe ples na autim gutpela tok bilong Kingdom. Insait bilong dispela tok Giliat i olsem ‘bikpela tokaut,’ olsem bikpela hip, na mipela i amamas ol dispela nupela misineri bai mekim bikpela wok bilong tokaut long Kingdom!
Milton Henschel i mekim namba wan tok na em i tok, ol dispela sumatin i olsem ol aposel long taim bilong Jisas, em ol i lain bambai ol i redi long mekim wanpela bikpela wok. Pol i mekim wok misineri na em i kamapim tingting bilong em long dispela wok, em i tok: “Mi no i stap wokboi nating bilong wanpela man. Tasol laik bilong mi yet na mi stap olsem wokboi nating bilong olgeta man, bilong mi ken kisim planti man moa.”—1 Korin 9:19.
Dispela tok bilong Pol i makim wanem samting? Dispela tok i makim olsem ol dispela nupela misineri i mas laikim tru ol man. Ol i mas i gat laik long helpim olgeta kain man long save long tok i tru bambai ol inap long kisim laip—maski ol dispela man i insait tru long narapela lotu.
Bihain Theodore Jaracz i tokim ol dispela nupela misineri, ol i no olsem ol turis ol i save go lukim ol narapela ples. Nogat. Ol i salim ol dispela misineri i go long ol narapela narapela biktaun long olgeta hap bilong graun bilong autim gutpela tok bilong Kingdom. Em i kirapim ol long tingim pasin bilong Jisas na ol disaipel bilong pastaim na ol misineri long nau tu, em ol i no lusim wok bilong ol. Em i tok, ‘Yupela i mas i gat wanpela tingting tasol. Yu no ken larim wok bilong kisim mani kago samting i pulim tingting bilong yu. Sapos “ai bilong yu em i gutpela,” orait bai yu gat wanpela tingting tasol.’ (Luk 11:34) Em i tok moa, olsem: “Yupela i misineri bilong Skul Giliat na yupela i mas givim bel tru long mekim wanpela wok—em wok bilong painim ol man i laik harim tok na autim dispela gutpela tok.”
Max Larson bilong Komiti Bilong Lukautim Ol Faktori em i givim gutpela tok long ol misineri long ol samting ol i ken mekim sapos hevi i painim ol long ples wok bilong ol. Em i tok: ‘Yu no ken lusim wok bilong yu. Wok long stretim dispela hevi.’ Ol i ken mekim wanem bilong stretim? Em i tok: ‘Yu mas kisim tingting bilong God long ol samting.’ (1 Korin 2:11-16) Brata Larson i tok, ol i mas beten askim God long givim spirit bilong em bilong helpim ol; em bikpela samting. Na em i tok, oltaim ol misineri i mas skelim ol yet—ol i stap olsem wanem long ai bilong God.
Lon Schilling bilong Komiti Bilong Ol Gaden Bilong Sosaiti Wastaua em i tok, ol i mas wok long kisim stretpela tingting na wok long holimpas. Em i tok: ‘Taim hatwok i painim yu o yu mas stretim tingting bilong yu, bai yu bihainim wanem kain tingting? God i wokim yumi bilong yumi yet i ken skelim wanem rot o wanem pasin yumi laik bihainim, olsem na yumi olgeta wan wan i mas tokim God long as bilong pasin yumi mekim. Yumi no olsem masin na bai God i stap long heven na stiaim yumi na bosim olgeta samting yumi mekim.’ Olsem na ol misineri i no ken ting God bai wokim wanpela mirakel na givim tingting long ol. Nogat. Tasol ol manmeri i larim God Jehova i stiaim tingting bilong ol long rot bilong Tok Bilong Em, em Baibel, na spirit bilong em na oganaisesen bilong em, ol inap holimpas stretpela tingting na bihainim.
Bihain wanpela tisa long Skul Giliat, em Ulysses Glass, em i mekim tok. Em i givim askim long ol misineri, olsem: ‘Yu inap skelim gut wanem samting i bikpela samting na wanem samting i no bikpela samting?’ Dispela brata i stap tisa longtaim na em i mekim sampela tok piksa bilong helpim ol misineri long save, sapos ol inap skelim gut dispela samting, dispela bai helpim ol long tingim Kingdom pastaim. Em i holim wanpela stem na olgeta i lukim na em i tok, stem i no gat bikpela pe bilong en, tasol em i gutpela samting. Em inap mekim gutpela wok—em i save pas long wanpela samting tasol i go inap long em i kamap pinis long ples em i go long en. Em i tok: ‘Yu mas kamap olsem dispela stem—yu mas pas long wanpela samting tasol, em wok bilong yu long autim tok, i go inap long taim yu kamap long dispela ples yu go long en—em ples paradais bihain long taim bilong bikpela hevi tru.’
Narapela tisa bilong Skul Giliat, bipo em i wanpela misineri, em Jack Redford, em i stori long sampela hevi ol dispela nupela misineri i mas winim. Em i tok, sapos ol i givim bel tru long Jehova na wetim em i helpim ol, bai ol “inap winim olgeta dispela hevi, maski em i hevi bilong lain long nupela tok ples, o ol i pilim nogut, long wanem ol i tingting bek long ples, o ol i hatwok long sindaun gut wantaim ol nupela wanhaus bilong ol, o ol i hatwok long lain long pasin bilong ol manmeri long ples wok bilong ol, o hevi i kamap long wanem pasin bilong ol i no stret wantaim pasin bilong narapela man na kros i kamap na ol i mas stretim. Bikpela tok em i mekim, em olsem: ‘Yupela i no ken stretim hevi long strong bilong yu yet. 1 Korin 3:9 i tok yumi wanwok bilong God na sapos yumi mekim ol wok yumi mas mekim, orait yumi ken bilip tru olsem Jehova bai sambai long yumi na helpim yumi.’
Presiden bilong Sosaiti, em Frederick W. Franz, em i mekim laspela tok bilong moningtaim. Em i tok: “Skul Giliat bilong Sosaiti Wastaua em i olsem wanpela presen God i givim long yumi!” Em i tok, dispela skul i bilong kamapim ol manmeri ol i ken autim tok na bai ol man i ken save Kingdom bilong God long han bilong Krais Jisas em i wok i stap. Em i tokim ol sumatin bilong dispela Namba 81 klas, olsem: ‘Yupela i givim bel tru long wanpela wok tasol, olsem na yupela i gat bikpela wok, long wanem yumi stap long las taim. Olsem na Jehova i givim wok long yumi bilong autim dispela gutpela tok bilong Kingdom bambai olgeta man long olgeta hap bilong graun ol i ken save long rot God i putim bilong abrusim bagarap.’
Ol sumatin i kisim setifiket bilong ol na ol manmeri long dispela bung i lukim olsem ol i amamas, long wanem ol inap i go long Skul Giliat na ol i pilim tru. Ol i save gut long dispela wanpela wok ol i mas mekim, olsem na long pas ol i raitim long Lain Bilong Bosim Ol Witnes na long lain bilong Betel, ol i tok ol i tingting strong long i stap gut long wok bilong God Jehova na long ‘mekim song bilong litimapim nem bilong em’ namel long ol lain man. (2 Samuel 22:50) Long belo bek ol sumatin i mekim soim long sampela samting i bin kamap taim ol i autim tok long ples wok bilong ol bilong bipo, na long Nu Yok, na long ples wok bilong ol misineri, na bihain ol i wokim wanpela pilai i makim sampela samting i kamap long nau. Bilong pinisim dispela bung, Lyman Swingle i mekim beten.
Dispela 23 sumatin i tingting long bikpela amamas ol bai kisim taim ol i mekim wok misineri, long wanem, olsem wanpela sumatin i tok:
“Jisas i tok, ‘Yu go salim olgeta samting bilong yu na . . . yu kam bihainim mi. . . . yu go telimautim tok bilong kingdom bilong God.’ [Matyu 19:21; Luk 9:60] Mipela laik kamap misineri, long wanem mipela laik helpim planti man moa long ol samting bilong spirit, long ples ol i sot long Witnes, na long ples mipela inap mekim bikpela wok moa long en.”—Fredrick Steiner i tok olsem, em i go long Gwatemala.
Olsem wanem long yu? Yu inap mekim bikpela wok moa na mekim gutpela wok moa long wok bilong God? Sapos olsem, orait yu mas wok strong olsem ol dispela sumatin i bin mekim bambai ol inap kamap misineri. Rot bilong ol yet na yu tu i ken kisim bikpela amamas, em olsem: Yu mas givim bel olgeta long mekim wok bilong Jehova.—Malakai 3:10.
[Blok long pes 26]
“Tok bilong Brata Larson i helpim mi long save, mipela mas redi long stretim tingting o pasin bilong mipela. Bilong mekim gut wok misineri, mi no ken bihainim ‘tingting bilong ol man,’ mi mas bihainim tingting bilong Jehova na tingting bilong Pikinini bilong em, Jisas.”—Alain Saint-Jean i tok olsem, em i go long Nu Kaledonia.
[Blok long pes 27]
“Tok bilong Brata Glass i helpim mi long pilim tru olsem mipela i mas skelim gut wanem samting i bikpela samting, na mipela i no ken larim ol samting i no bikpela samting i pulim mipela. Mipela mas tingting stret.”—Humphrey Hermanus i tok olsem, em i go long Suriname.
[Blok long pes 28]
“Taim mi harim ol tok Brata Redford i mekim, bel bilong mi i stap isi na mi save, ol hevi bai painim mipela ol i no nupela hevi. Ol narapela brata sista i bin winim ol dispela hevi, na mipela tu inap mekim sapos mipela i mekim long strong bilong Jehova na i no long strong bilong mipela yet.”—Veronica Lipham i tok olsem, em i go long Papua Niugini.
[Blok long pes 28]
OL SAMTING BILONG OL SUMATIN:
Hamas kantri ol i kam long en: 7
Hamas kantri ol i go long en: 12
Krismas bilong ol, averes: 30.3
Hamas yia ol i bin stap long tok i tru, averes: 13.4
Hamas yia ol i wok painia, averes: 9.3
[Ol Piksa long pes 27]
COSTA, Alan na Betty Amerika
GANSLMEIER, Anton na Rita Jemani
GONZALES, John na Cynthia Amerika
GRAULICH, Uwe na Katherine Jemani
HERMANUS, Humphrey na Ludmila Nedelans Antiles
JOHANSEN, Bård na Ester Nowe
KLOOSTERMAN, Otto na Yvonne Nedelans
LARSON, Gary na Annette Kanada
LIPHAM, Mark na G. Veronica Amerika
SAINT-JEAN, Alain Frans
STEINER, Fredrick na Helen Amerika
SZYMANSKI, Cynthia Amerika
WILKE, David Amerika