Insait Bilong Ol Tok i Kam Long Olgeta Hap
Ol Man Bilong Mekim Pasin Sodom—Wankain Olsem Ol Narapela long Ai Bilong God?
Long hap bilong Kwinslan, long Ostrelia, gavman i putim lo na i tok i tambu long mekim pasin sodom—maski tupela wantaim i orait long mekim na tupela tasol i stap na ol i mekim. Wanpela bikpela lain bilong lotu long Kwinslan ol i strong long gavman i mas pinisim dispela lo; ol i laik bai gavman i tok i no gat rong long man i mekim pasin sodom.
Wanpela nius (The Courier Mail) i tok, ol man bilong lotu Angliken na Katolik na Luteran na Baptis na Yunaiting Sios na ol Kweka ol i insait long dispela lain (em Joint Church Social Justice Group). Dispela lain i tok, ol man i no gat save na ol i gat tingting nogut long pasin sodom ol i bin putim ol lo i tambuim dispela pasin. Dispela lain i tok: ‘Mipela i bilip olsem olgeta manmeri i wankain tasol long ai bilong God, olsem na gavman i mas i gat wankain tingting na i no ken putim lo i pasim sampela long bihainim pasin ol i laikim. Man i slip wantaim man o man i slip wantaim meri ol i wankain—ol i man tasol.’
Tru, long ai bilong God, taim mama i karim yumi, yumi olgeta i wankain, tasol God i ting olsem wanem long pasin bilong sodom? Baibel i tok, man i mekim pasin sodom em i bihainim pasin i no stret long man i mekim, na long ai bilong God em i mekim pasin nogut tru na em i mas i dai. Dispela lo i stap long taim bilong ol Israel long bipo na long taim bilong ol Kristen bilong pastaim. (Wok Pris 18:22; Rom 1:26, 27) Baibel i tokaut klia olsem dispela pasin em i pasin nogut. Baibel i tok: “Ol man i save mekim pasin pamuk, . . . na ol man i save mekim ol kain kain pasin i gat sem wantaim ol arapela man, . . . olgeta dispela kain man bai i no inap i go insait long kingdom bilong God.”—1 Korin 6:9, 10.
Ol Kristen tru i no save wok long tokim gavman ol i mas pinisim lo i tambuim pasin bilong sodom; ol i wok strong long helpim ol man i kalabus long dispela pasin bambai ol i ken bihainim tok i tru bilong God long Baibel na lusim dispela pasin i save bagarapim nem bilong God.
Blut i Bagarapim Yet Ol Man
Ol i bin skelim wok bilong Retkros (Red Cross) long Amerika, na ol i tok planti taim dispela lain i popaia na mekim wok long blut nogut. Long Amerika, ol haus sik i mekim wok long 6-7 milion lita blut long olgeta yia, na ol i kisim inap olsem 3-4 milion lita bilong dispela blut long lain bilong Retkros. Taim Retkros i givim blut long ol haus sik na bihain ol i save dispela blut i nogut, ol i mas toksave long wanpela lain bilong gavman ol i kolim FDA (Food and Drug Administration). Tasol wanpela nius (The New York Times) i kamapim tok bilong wanpela inspekta bilong dispela lain bilong gavman, em i tok, planti taim Retkros i no toksave long ol. Dispela man i tok em i skelim ol buk bilong Retkros, na em i lukim olsem inap 380 taim dispela lain i popaia na mekim wok long blut nogut na ol i no toksave long gavman long dispela. Na dispela inspekta i tok, inap olsem 228 manmeri i bin kisim sik AIDS, ating long rot bilong blut, tasol Retkros i tokim gavman (FDA) long 4-pela tasol.
Planti man i ting blut ol i kisim long haus sik inap helpim ol long i stap laip, tasol long olgeta yia, planti tausen manmeri i bin kisim blut long haus sik na ol i dai. Tasol ol manmeri i lotu tru long God, ol i bihainim lo bilong em long blut, olsem na ol hevi i save painim man taim em i kisim blut i no save painim ol. God i tok: “Yupela i no ken kaikai blut bilong en. Nogat. Yupela i mas kapsaitim i go daun long graun olsem wara . . . na bai olgeta wok bilong yupela na bilong ol tumbuna pikinini bilong yupela i kamap gutpela, long wanem, yupela i mekim pasin i stret.”—Lo 12:23-25, Baibel New International Version.
Pop na Wok Ami
Long yia i go pinis pop i bung wantaim 7,000 yangpela man em ol i lain long kamap soldia na ol i bilong lain soldia Sesignola long Rom. Fopela yangpela ofisa bilong dispela lain soldia i askim pop, i orait long Kristen i ken insait long ami, o bel bilong em bai i gat tok long dispela? Wanpela nius bilong taun Vatiken (L’Osservatore Romano) i kamapim dispela askim bilong ol, olsem: “Inap man i stap gutpela Kristen na i stap soldia wantaim?” Pop i bekim tok olsem: ‘I no gat wanpela samting tru i pasim rot na man i no inap i stap Kristen na mekim wok soldia wantaim. Sapos yumi tingim gut wok ami, yumi ken save em wanpela gutpela wok.’
Olsem wanem? Dispela tingting i stret wantaim tingting bilong ol Kristen bilong pastaim, em ol i no save insait long ol pait? Wanpela man, nem bilong em Arnold Toynbee, em i raitim wanpela buk (An Historian’s Approach to Religion) na em i stori long wanpela man i bin i stap long yia 250 samting, em Maksimilianus, em ol man i bin kilim em i dai long wanem em i wanpela Kristen. Taim kot long Rom i tok em i mas i dai, long wanem em i no laik insait long ami, dispela man i tok: “Mi no ken tru insait long ami. Mi no ken tru mekim wok bilong ol gavman bilong Dispela Graun. Maski yupela i tok long katim na rausim het bilong mi tu, mi no ken mekim. Mi mas mekim wok bilong God bilong mi.” Olsem wanem na em i no laik insait long ami, maski em i save ol bai kilim em i dai? Long wanem em i save, ol man i bihainim tru lek bilong Jisas ol i “no bilong dispela graun,” olsem Jisas i no bilong dispela graun. Na em i save ol Kristen i gat pait bilong spirit, olsem aposel Pol i bin tok: “Tru, mipela i save stap long dispela graun, tasol mipela i no save pait olsem ol man bilong graun.”—Jon 17:16; 2 Korin 10:3, 4.