Bilong Wanem Ol Samting i Stap Nogut Tru Long Dispela Taim Nau?
TAIM yu laik kaunim nius o lukim televisen o harim ol tok long redio i stori long ol samting i bin kamap, yu save pinis olsem sampela tok bilong sampela samting nogut bai kamap, a? Ating yu no kirap nogut long harim tok olsem pait i stap yet, na pasin nogut na bagarapim man i go bikpela, na hangre i wok yet long bagarapim kantri i stap rabis.
Sapos yu stap longwe liklik long ol dispela samting, ating ol stori bilong en i no mekim na oltaim bel bilong yu i pilim nogut tru. Nogat. Tru, ating i hatwok long pilim hevi bilong planti manmeri, tasol i no hatwok long pilim hevi bilong wanpela wanpela. Olsem: Taim yu kaunim stori bilong wanpela pait i bin kamap na yu tingim hamas manmeri i bin i dai, dispela i narapela kain long stori yu kaunim bilong liklik Adnan bilong Bosnia i gat 9-pela krismas, em mama bilong em i kisim bagarap na i dai taim wanpela bom i bagarapim haus bilong ol. Sampela mun tasol bihain, Adnan tupela papa bilong em i wokabaut long rot na wanpela man i sutim papa long gan na em i dai. Sampela wik tasol bihain long dispela, wanpela bom i pundaun long banis bilong skul na susa bilong em i lusim bikpela hap blut na long ai bilong Adnan yet em i dai. Tingting na bel bilong Adnan i bagarap tru na ol dokta i painimaut olsem Adnan i no save pilim wanpela samting long bel bilong em, na em i no gat laik long save long wanpela samting tu. Long san em i save pret pret na em i save tingim gen ol samting nogut i bin kamap, na long nait em i save driman nogut na em i no inap slip gut. Adnan i no olsem wanpela pikinini nating i bin kisim hevi, na em tasol. Nogat. Em wanpela pikinini em bikpela hevi na pen i bin painim em, na bel bilong yumi i pilim tru hevi bilong em.
Na i wankain long ol narapela hevi i save kamap. Taim yumi kaunim stori bilong hangre, ating yumi no pilim tumas. Tasol taim yumi lukim piksa bilong wanpela pikinini meri i gat 5-pela krismas, longtaim em i no bin kaikai na bel bilong em i solap na hanlek bilong em i olsem stik masis, yumi pilim tru. Taim yumi kaunim namba bilong hamas manmeri i bin kisim nogut long han bilong raskol, ating yumi no tingim tumas, tasol taim yumi harim stori olsem wanpela lapun meri, em man bilong em i dai pinis, na ol narapela i bin paitim em nogut tru, stilim ol samting bilong em, na reipim em, em nau, yumi pilim tru. Taim yumi kaunim tok olsem i stap bilong famili i wok long bagarap, ating dispela samting tu yumi no pilim tumas, tasol taim yumi kisim save olsem wanpela mama, long laik bilong em yet, em i no bin givim kaikai long pikinini bilong em na em i bin mekim nogut tru long em, em nau, yumi pilim tru.
Yumi bel hevi taim yumi kaunim ol kain stori olsem. Tasol taim wanpela hevi olsem i painim yumi yet, em nau, yumi bel hevi stret! Taim yu yet i kisim nogut, dispela i mekim na yu inap pilim tru hevi bilong ol narapela narapela em ol nius i stori long en. Yumi pret tru long harim tok olsem planti manmeri, winim olgeta taim bipo, ol i save kisim hevi long pasin raskol, pait, hangre, na sik. Ol samting nogut bilong dispela taim nau i save kamapim planti hevi—tingting planti, pret, na bel hevi.
Ol man bilong planti lotu ol i wok long painim bekim bilong ol dispela askim: Bilong wanem ol samting i stap nogut tru? Wanem samting bai painim ol manmeri long bihain?
Sori tru, ol lotu long nau ol i no inap bekim gut ol dispela askim. Namba wan taim yu lukim askim long skin bilong dispela nius yu holim, ating yu no pilim tumas. Sampela lotu i ting olsem Baibel i makim de na aua stret bilong pinis bilong dispela graun, tasol Baibel i no mekim olsem. (Lukim Matyu 24:36.) Ol man bilong wokim dispela nius, ol i save larim Baibel i ken kamapim insait bilong ol tok bilong en yet. Ating yu bai kirap nogut long kisim save olsem ol samting Baibel i stori long en bilong taim bilong las de, ol dispela tok em i stret na yumi inap bilip tru long en. Tasol Baibel i no stori long as tasol na ol samting i stap nogut tru, nogat. Baibel i stori tu long ol gutpela samting yumi ken wetim i kamap bihain na dispela inap mekim gut bel bilong yumi. Mipela laik yu tingim ol stori i kamap bihain long dispela na bai yu ken save i gat wanem as na mipela i tok olsem.
[Piksa Kredit Lain long pes 3]
Jobard/Sipa Press