Ripot Long Wok Bilong Kingdom
Autim Tok ‘Maski Ol Man i Redi Long Harim Tok o Ol i No Redi’
TAIM pait i kamap long kantri Bosnia na Hetsagovina, planti manmeri i karim ol bikpela hevi. Long ol dispela taim bilong hevi, ol Witnes Bilong Jehova i bin traim olgeta rot bilong bringim gutpela tok bilong strongim bel bilong ol man long wetim ol gutpela samting bai kamap long bihain. Ol tok i stap daunbilo i kam long wanpela Witnes em i bin mekim wok painia long Sarayevo.
“Sindaun long hia i gat hatwok, tasol ol manmeri i save amamas tru long harim tok i tru bilong Baibel. Ol Witnes long dispela hap i stap olsem gutpela piksa long pasin bilong sanap strong. Ol i no gat planti samting bilong skin, tasol ol i givim bel tru long mekim wok. Klostu olgeta yangpela long kongrigesen i mekim wok painia. Dispela i kirapim tru ol nupela pablisa, olsem na yumi no kirap nogut long lukim ol i lusim olsem 60 aua samting long olgeta mun, kirap long namba wan mun bilong ol long autim tok.
“Mipela i save autim tok long ol haus, na tu, mipela i bin traim ol narapela rot bilong autim tok na painim ol man. Olsem: Mipela i save mekim gutpela wok tru long tilim ol buk na nius samting bilong Baibel long ol man i stap long ol ples matmat.
“Mipela i bin autim tok tu long ol haus sik. Long wanpela haus sik long Sarayevo, namba wan dokta long dipatmen bilong stretim ol sik bilong klok, em i kisim Kirap! (tok Inglis) bilong Disemba 8, 1996, em i gat het-tok olsem, ‘Heart Attack—What Can Be Done?’ Em i laik kisim sampela moa bambai em i ken givim long ol narapela dokta. Nau em i givim tok orait long ol Witnes long toktok wantaim olgeta sikman long dipatmen bilong em. Olsem na insait long wanpela aua samting, mipela i tilim 100 samting magasin long ol sikman long ol wan wan bet bilong ol. Planti sikman i bin tok olsem em namba wan taim ol man i kam lukim ol na givim ol gutpela tok bilong strongim bel bilong ol long wetim ol gutpela samting bai kamap bihain.
“Long narapela taim, mipela i go lukim dipatmen i lukautim ol pikinini i sik na mipela i bringim ol magasin i gat ol stori i stret bilong helpim ol pikinini. Namba wan dokta i kisim sampela buk Baibel Stori Buk Bilong Mi bilong putim long rum buk, bilong ol i ken kaunim ol stori long ol pikinini. Long nau, ol mama i kam lukim ol pikinini bilong ol long haus sik, ol i save kaunim ol stori long ol pikinini long olgeta de. Mipela i bin stretim rot tu long i go lukim dispela dokta long haus bilong em.
“Long Sarayevo, i gat planti tausen soldia bilong lain NATO [North Atlantic Treaty Organization], na ol i bilong narapela narapela kantri. Mipela i bin autim gut tok long ol dispela soldia tu. Sampela taim mipela i save mekim wok long buklet Good News for All Nations na ol nius Wastaua na Kirap! long ol narapela narapela tok ples na autim tok long ol strongpela ka bilong pait. Mipela i bin tilim 200 samting magasin long ples slip bilong ol soldia bilong Itali. Planti soldia bilong Itali i tok, ol i no bin toktok wantaim ol Witnes Bilong Jehova long bipo. Em nau, mipela bungim ol long Sarayevo.
“Wanpela taim ol soldia i pasim strongpela ka bilong pait arere long rot. Mi paitim ka long ambrela bilong mi na nau wanpela soldia i kam ausait. Mi soim Wastaua long em, i gat het-tok ‘Ol Man Bilong Autim Tok Bilong Bel Isi—Ol i Husat?’ Dispela soldia i lukluk long mi na askim mi, ‘Yu wanpela Witnes Bilong Jehova, a?’ Taim em i save olsem mi wanpela Witnes, em i tok, ‘Man! Mi no bin ting bai yupela i stap tu long hia! Olsem wanem? I gat sampela hap bilong graun em ol Witnes i no stap long en?’ ”
Aposel Pol i tok: “Mas strong long autim tok . . . maski sapos ol man i redi long harim tok o ol i no redi.” (2 Timoti 4:2) Olsem ol wanbilip bilong ol long olgeta hap bilong graun, ol Witnes Bilong Jehova long Sarayevo i mekim olsem. Ol i autim tok tu long ol wan wan bet bilong ol sikman long haus sik na long olgeta wan wan strongpela ka bilong ol soldia!