Ripot Long Wok Bilong Kingdom
“God Em Inap Long Mekim Olgeta Samting”
TOK i stap antap, em tok bilong Matyu 19:26, na em i bin kamap tru long wanpela yangpela meri long Veneswela. Bihain long em i lain long bilip strong long Jehova, em i winim wanpela bikpela hevi. Em i tok:
“Tumbuna mama bilong mi em i gat pasin isi na pasin sori. Tarangu, taim mi gat 16 krismas tasol na em i dai. Dispela i givim bikpela hevi long mi. Tingting bilong mi i no wok gut, mi no laik lusim haus na go ausait. Mi kamap meri bilong stap wanpis olgeta.
“Mi no go long skul o wok. Mi stap tasol long rum bilong mi. Mi stap wanpis na mi no gat sampela poroman, olsem na mi kisim bikpela bel hevi tru. Mi pilim olsem mi no gutpela na mi laik bai mi mas i dai na pinisim laip bilong mi. Planti taim mi wok long askim mi yet, ‘Bilong wanem mi stap?’
“Bipo mama bilong mi i save kisim nius Wastaua na Kirap! long wanpela yangpela Witnes nem bilong en Gisela. Wanpela taim mama i lukim Gisela i wokabaut long rot klostu long haus bilong mipela, na mama i askim em sapos em inap helpim mi. Gisela i tok em bai traim, tasol mi no laik long lukim em. Dispela i no pasim Gisela. Em i raitim wanpela pas na tokim mi olsem em i laik kamap pren bilong mi na wanpela bikpela man i winim em, em tu i laik kamap pren bilong mi. Em i tok, dispela man em God Jehova.
“Mi pilim tru dispela tok, na mi bekim pas bilong em. Inap 3-pela mun mitupela i raitim pas i go i kam. Planti taim Gisela i kirapim mi long bungim em, na bihain mi kisim strong long mekim olsem. Long namba wan taim mitupela i bung Gisela i stadi wantaim mi long Baibel, na em i mekim wok long buk Yu Inap i Stap Oltaim Long Paradais Long Graun. Bihain long stadi, em i askim mi long go long wanpela miting long Haus Kingdom. Mi kirap nogut. Inap fopela yia mi no bin lusim haus liklik, na taim mi tingim dispela mi pret nogut tru.
“Gisela i bin isi tru long mi. Em i tokim mi olsem i no gat wanpela samting mi mas pret long en na em bai kam wantaim mi long miting. Mi orait long dispela. Taim mitupela i kamap long Haus Kingdom, mi guria na tuhat i kamap. Mi no inap tok gude long wanpela man. Tasol mi orait long go yet long ol miting, na Gisela i save kam kisim mi long olgeta wik.
“Bilong helpim mi long winim dispela pasin bilong pret, Gisela i save kisim mi i go na mipela i kamap paslain tru long taim miting i kirap. Mitupela i save sanap long dua na sekanim olgeta man taim ol i kam insait. Long dispela rot mi inap bungim wanpela o tupela man tasol na i no planti planti man long wanpela taim. Taim mi pilim olsem mi no inap moa long sekanim ol man, Gisela i kolim tok bilong Matyu 19:26 long mi: ‘Ol man i no inap. Tasol God em inap long mekim olgeta samting.’
“Em i hatwok tru, tasol bihain mi inap go long wanpela bikpela bung i gat planti manmeri long en, em wanpela kibung sekit. Dispela em wanpela bikpela samting tru long mi! Long Septemba 1995, mi kisim strong bilong toktok wantaim ol elda olsem mi laik insait long wok bilong autim tok long ol haus. Sikspela mun bihain, long Epril 1996, mi kamapim dediket bilong mi long Jehova long rot bilong baptais.
“I no longtaim i go pinis wanpela i askim mi, mi kisim strong we bilong mekim olsem, na mi tokim em: ‘Laik bilong mi long mekim ol samting Jehova i laikim em i winim pasin bilong mi long pret.’ Wan wan taim mi save bel hevi yet, tasol mi kisim bikpela amamas long wok painia oltaim mi mekim. Taim mi tingting i go bek, mi wanbel long Gisela. Nau mi gat wanpela Pren em i laikim mi na em ‘i save strongim mi.’ ”—Filipai 4:13.
[Ol Piksa long pes 8]
“Laik bilong mi long mekim ol samting Jehova i laikim i winim pasin bilong mi long pret”