‘Olgeta Samting i Save Kamap Long Taim Bilong Em Yet’
“Olgeta samting i kamap long dispela graun, i save kamap long taim bilong em yet.”—SAVEMAN 3:1.
1. Yumi ol man bilong graun i gat wanem hatwok? Sampela taim dispela i mekim na wanem samting i kamap?
PLANTI man i save tok, “Bilong wanem mi no bin mekim hariap?” Na sampela i bin mekim wanpela samting na nau ol i tok, “Bilong wanem mi no laik wet pastaim?” Ol dispela tok i kamapim klia olsem yumi ol man bilong graun i hatwok long skelim wanem taim i stret long mekim ol samting. Long dispela as, sampela manmeri em pastaim ol i bin pas gut wantaim, bihain ol i bruk. Na tu, dispela pasin i bin kamapim bikpela hevi long sampela man. Na samting i nogut moa, em i bagarapim bilip bilong sampela man na ol i no bilip strong moa long Jehova na oganaisesen bilong em.
2, 3. (a) Bilong wanem em i pasin bilong gutpela tingting sapos yumi larim Jehova yet i makim taim bilong ol samting i mas kamap? (b) Yumi mas i gat wanem stretpela tingting long truim bilong ol tok profet bilong Baibel?
2 Jehova i gat gutpela tingting na save em ol man bilong graun i no gat, olsem na sapos em i laik, em inap save long ol samting bai kamap long olgeta wok o pasin ol man i mekim. Taim wanpela samting i no kamap yet, Jehova inap save olsem “dispela samting bai i kamap na bai i go pinis olsem wanem.” (Aisaia 46:10) Olsem na em inap makim stret wanem taim i gutpela bilong mekim wanpela samting em i laik mekim. Tasol yumi ol man bilong graun i save popaia, olsem na yumi no ken bilip long save bilong yumi, olsem yumi save long taim bilong ol samting i mas kamap. Sapos yumi gat gutpela tingting, bai yumi larim Jehova yet i makim taim bilong ol samting i mas kamap na yumi bilip long dispela tasol!
3 Olsem: Ol strongpela Kristen ol i stap gut long Jehova na ol i wetim taim em i bin makim bilong truim ol tok profet bilong em long Baibel. Ol i wok strong long mekim wok bilong Jehova na ol i tingim gut wanpela lo i stap long Krai 3:26, i tok: “I gutpela sapos ol man i stap isi na i wetim Bikpela i kisim bek ol.” (Skelim wantaim Habakuk 3:16.) Na ol i bilip tru olsem tokaut bilong Jehova long em bai givim strafe bilong kot long ol man, “dispela samting . . . bai i kamap. Yu ting bai em i no inap kamap kwik, tasol . . . em bai i kamap.”—Habakuk 2:3.
4. Olsem wanem Amos 3:7 na Matyu 24:45 inap helpim yumi long wetim Jehova na yumi no les?
4 Tasol sapos yumi no kisim gut sampela tok bilong Baibel o sampela tok em ol buk na nius bilong Sosaiti Was Taua i mekim bilong kamapim klia sampela ves bilong Baibel, yu ting i gat as na yumi les? Sapos yumi gat gutpela tingting bai yumi wetim taim bilong Jehova long kamapim klia ol tok em yumi no klia gut long en. “Tru tumas, olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” (Amos 3:7) Em wanpela gutpela tok promis tru, a? Tasol yumi mas save, ol samting Jehova i laik mekim em i save tokaut long en long taim em yet i tingim. Olsem na em i makim wanpela lain “wokboi i gat gutpela tingting” long givim kaikai bilong spirit long lain bilong em “long taim bikman i makim.” (Matyu 24:45) Olsem na i no gat as na yumi tingting planti, o yumi bel kros, long sampela tok dispela lain wokboi i no kamapim klia tumas. Yumi inap bilip tru olsem sapos yumi wetim Jehova na yumi no les, orait long rot bilong dispela gutpela wokboi em bai givim ol dispela save long yumi “long taim bikman i makim”—em taim stret yumi mas kisim.
5. Taim yumi skelim ol tok bilong Saveman 3:1-8, dispela bai helpim yumi olsem wanem?
5 Saveman King Solomon i stori long 28 narapela narapela samting, em olgeta wan wan i mas “kamap long taim bilong em yet.” (Saveman 3:1-8) Sapos yumi kisim gut insait bilong dispela tok Solomon i mekim, dispela bai helpim yumi long save long tingting bilong God long wanem taim i stret long mekim sampela samting na wanem taim i no stret long mekim. (Hibru 5:14) Em nau, ol samting yumi tingting long mekim long i stap bilong yumi, em bai stret wantaim dispela save.
“Taim Bilong Krai na Taim Bilong Lap”
6, 7. (a) Long nau, wanem ol samting i mekim na ol man i tingting planti long ol samting i kamap long graun ol i save “krai”? (b) Ol lain bilong dispela graun i save mekim wanem na bai yumi no ken tingim ol bikpela hevi i kamap long graun?
6 Tru, i gat “taim bilong krai na taim bilong lap,” tasol yumi ol man i save laikim taim bilong lap, a? (Saveman 3:4) Tasol sori tru, yumi stap long dispela graun i gat planti hevi long en na i gat as na yumi save krai. Ol nius i save stori planti long ol hevi i kamap. Yumi kirap nogut taim yumi harim stori bilong ol yangpela i holim gan na sutim ol wanskul bilong ol long skul, na ol papamama i mekim nogut long ol pikinini bilong ol, na ol paitman i kilim i dai o bagarapim nogut ol man i no gat asua, na ol bikpela win ren o guria samting i bagarapim planti man na ol haus samting bilong ol. Na long TV yumi save lukim ol pikinini i no gat kaikai na ai bilong ol i go insait, na ol refyuji i mas ranawe lusim ples bilong ol. Ol kain tok em pastaim yumi no bin harim, olsem pasin bilong kilim i dai wanpela lain olgeta, na sik AIDS, na mekim pait long rot bilong ol binatang nogut bilong bagarapim man, na El Niño, taim yumi harim ol dispela kain tok long nau yumi save pret na tingting planti long ol samting nogut inap kamap long ol dispela rot.
7 Tru tumas, long nau i gat planti hevi na bagarap i save kamap na ol man i bel hevi stret. Tasol ol lain i wok bisnis long kamapim ol samting bilong amamas, olsem ol piksa long TV samting, ol i save kamapim ol piksa nogut bilong pasin pamuk na pait na bagarapim man, em i bilong giamanim yumi na bai yumi no tingim ol bikpela pen na hevi ol narapela lain i wok long kisim. Tasol ol kain tok pilai na lap em ol dispela piksa i kamapim, em i no amamas tru tru, nogat. Kain amamas tru em spirit bilong God i save kamapim long man, em wanpela samting dispela graun bilong Satan i no inap givim long yumi.—Galesia 5:22, 23; Efesus 5:3, 4.
8. Ol Kristen long nau ol i mas tingim krai i namba wan samting o ol i mas tingim lap i namba wan samting? Stori long dispela.
8 Yumi lukim dispela graun i gat planti hevi nogut tru long en, olsem na yumi save, nau i no taim bilong tingting tasol long lap. Nau i no taim bilong tingim ol samting bilong amamas tasol o larim pasin bilong kisim amamas i kamap olsem namba wan samting bilong yumi na ol samting bilong spirit i kamap olsem namba tu tasol. (Skelim wantaim Saveman 7:2-4.) Aposel Pol i tok: “Ol man i save mekim wok long samting bilong graun, ol i mas i stap olsem dispela wok i no bikpela samting long laip bilong ol.” Bilong wanem ol i mas mekim olsem? Long wanem, “i no longtaim na bai dispela graun [olsem pasin bilong graun] wantaim olgeta samting bilong en bai i pinis.” (1 Korin 7:31) Ol Kristen tru i luksave pinis olsem dispela taim yumi stap long en em taim nogut tru, na i stap bilong ol long olgeta wan wan de i kamapim dispela tingting bilong ol.—Filipai 4:8.
Ol i Krai, Tasol Ol i Amamas Tru!
9 Ol manmeri i bin stap long taim bilong Bikpela Tait ol i no tingim tumas ol samting bilong i stap bilong ol. Ol i mekim ol wok bilong ol long olgeta wan wan de na ol i no bel hevi na krai long “pasin bilong ol manmeri long olgeta hap i nogut tru.” Na maski “long olgeta hap bilong graun ol i wok long pait na bikhet,” ol i lukluk tasol long en na ol i no tingim. (Stat 6:5, 11) Jisas i stori long dispela pasin bilong ol, na em i tok profet olsem ol manmeri long taim bilong yumi bai ol i mekim wankain pasin. Em i toksave olsem: “Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.”—Matyu 24:38, 39.
10. Ol Israel i bin stap long taim bilong Hagai, olsem wanem ol i kamapim olsem ol i no tingim tumas taim Jehova i bin makim?
10 Long taim bilong Hagai, inap olsem 1,850 yia bihain long Bikpela Tait, planti Israel i no tingim tumas ol samting bilong spirit. Ol i wok strong long mekim ol wok bilong helpim ol yet, na ol i no pilim olsem dispela taim ol i stap long en em taim bilong putim ol wok bilong Jehova i go pas long wok bilong ol yet. Baibel i tok: “Ol manmeri i save tok olsem, ‘Taim bilong wokim gen haus bilong God, em i no kamap yet.’ Na Bikpela I Gat Olgeta Strong em i givim wanpela tok gen long ol manmeri long maus bilong profet Hagai. Em i tok olsem, ‘Ol manmeri bilong mi, bilong wanem yupela i stap long ol gutpela gutpela haus, na haus bilong mi i bagarap i stap? Yupela i mas tingting planti long ol samting nogut i kamap long yupela.’ ”—Hagai 1:1-5.
11. Yumi ken givim wanem ol askim long skin bilong yumi yet?
11 Yumi ol Witnes Bilong Jehova long nau, yumi gat ol gutpela wok bilong Jehova yumi mas mekim, wankain olsem ol Israel long taim bilong Hagai. Olsem na yumi tu i mas skelim na tingim gut ol samting yumi mekim long i stap bilong yumi. Olsem wanem? Yumi save “krai” long ol pasin nogut i kamap long graun na i save bagarapim nem bilong Jehova? Yumi save bel hevi taim ol man i tok i no gat wanpela God i stap, o ol i sakim tru ol stretpela lo bilong em? Yumi save mekim wankain pasin olsem ol man i bin kisim mak na Esekiel i bin lukim long wanpela piksa olsem driman inap 2,500 yia i go pinis? Baibel i tok long ol olsem: “[Jehova] i tokim [dispela man i holim ol samting bilong rait] olsem, ‘Yu go long olgeta hap bilong taun Jerusalem na putim mak long pes bilong olgeta manmeri i bel nogut na i wari long olgeta dispela pasin nogut ol wantok i save mekim insait long taun.’ ”—Esekiel 9:4.
12. Olsem wanem stori bilong Esekiel 9:5, 6 em i samting bilong yumi ol man bilong nau tu?
12 Dispela stori em i samting bilong yumi ol man bilong nau tu, na dispela i kamap ples klia long taim yumi kaunim tok God i givim long 6-pela man i holim bainat samting bilong kilim man i dai. Em i tokim ol: “Yupela bihainim em i go na kilim olgeta manmeri. Yupela i no ken marimari long wanpela na yupela i no ken larim wanpela i stap. Kilim olgeta lapun, na olgeta yangpela man na meri, na ol mama na ol pikinini. Tasol yupela i no ken kilim i dai wanpela bilong ol man o meri i gat mak bilong mi long pes bilong ol. Kilim ol man i stap long haus bilong mi pastaim.” (Esekiel 9:5, 6) Bilong abrusim bagarap long dispela taim bilong bikpela hevi tru klostu nau bai kamap, yumi mas save olsem nau em i taim bilong krai.
13 Tru, ol wokman bilong Jehova ol i save “krai” long ol pasin nogut tru i kamap long graun, tasol dispela i no pasim ol long i stap amamas. Nogat tru! Ol i lain bilong amamas, winim ol narapela lain long graun. Jisas i kamapim as bilong i stap amamas taim em i tok: “Ol manmeri i save, ol i stap rabis tru [olsem sot tru] long ol samting bilong God, . . . ol manmeri i krai i stap, . . . ol manmeri i save daunim nem bilong ol yet, . . . ol manmeri i laikim tumas long bihainim stretpela pasin, . . . ol manmeri i save marimari long ol arapela, . . . ol manmeri bel bilong ol i klin, . . . ol manmeri i save mekim dai ol kros na pait, . . . ol manmeri i save bihainim stretpela pasin na long dispela as ol i kisim hevi long ol arapela, em ol i ken amamas.” (Matyu 5:3-10) I gat planti samting i soim yumi olsem ol dispela tok i makim stret lain Witnes Bilong Jehova, winim ol narapela lain bilong lotu.
13, 14. (a) Jisas i tok wanem kain man ol i ken amamas? (b) Bilong wanem yu ting ol dispela tok bilong Jisas i makim stret ol Witnes Bilong Jehova?
14 Kirap long taim bilong kamapim gen lotu i tru long yia 1919, i gat as moa yet na lain bilong Jehova ol i ken “lap.” Long ol samting bilong spirit, wankain gutpela samting i painim ol olsem i bin painim ol Israel i lusim Babilon na ol i kam bek long graun bilong ol long yia 537 B.C.E.: “Taim Bikpela i bringim mipela i kam bek long Saion, mipela i ting mipela i olsem driman nating. Olsem na mipela i lap moa yet, na mipela i singim song bilong amamas moa yet. . . . Bikpela i bin mekim bikpela wok tru bilong helpim mipela. Olsem na mipela i belgut tru.” (Song 126:1-3) Tru, long ol samting bilong spirit ol Witnes Bilong Jehova i save lap, tasol ol i bihainim gutpela tingting na save na ol i tingim gut dispela taim ol i stap long en. Taim nupela taim i kamap pinis long graun na ol lain bilong graun i “kisim dispela laip em i laip tru,” em nau, pasin bilong lap bai senisim pasin bilong krai i go inap oltaim oltaim.—1 Timoti 6:19; KTH 21:3, 4.
“Taim Bilong Holim Meri na Taim Bilong No Ken Holim Meri”
15. Bilong wanem ol Kristen i save skelim gut ol manmeri ol i laik i stap pren bilong ol?
15 Ol Kristen i save skelim gut ol manmeri ol i laik “holim” ol, olsem stap pren bilong ol. Ol i tingim tok lukaut bilong Pol, em i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Na saveman King Solomon i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”—Sindaun 13:20.
16, 17. Ol Witnes Bilong Jehova i ting olsem wanem long kisim ol pren, na long man i raun wantaim meri, na long marit? Bilong wanem ol i gat dispela kain tingting?
16 Ol wokman bilong Jehova i save kisim ol pren i gat wankain laik olsem ol yet, olsem ol i laikim tru Jehova na ol stretpela lo bilong em. Ol i save amamas long poroman wantaim ol pren bilong ol, tasol ol i save abrusim dispela tingting olsem i orait long man i raun wantaim meri, olsem ol manmeri i save mekim long sampela kantri long nau. Ol dispela wokman bilong Jehova i no ting em i samting bilong kisim amamas tasol na i no inap nogutim ol. Ol i ting em i wanpela samting ol i ken mekim taim ol i tingting pinis long marit, na ol i redi pinis long skin, na tingting, na ol samting bilong spirit—na i stret long lo bilong Baibel—inap long ol i ken marit.—1 Korin 7:36.
17 Ating sampela bai ting, dispela kain tingting long man i raun wantaim meri na long marit em i pasin bilong ol lain bilong bipo tasol na i no pasin bilong nau. Tasol ol Witnes Bilong Jehova i no save larim ol wanlain i stiaim ol taim ol i laik kisim sampela pren, o taim ol i laik skelim pasin olsem man i raun wantaim meri na ol samting bilong marit. Ol i save pinis olsem “save bilong [God] em i samting tru.” (Matyu 11:19) Jehova i save wanem samting i gutpela bilong helpim ol, olsem na ol i save tingim gut tok bilong em long ol i mas maritim wanpela “i bilip long Bikpela.” (1 Korin 7:39; 2 Korin 6:14) Ol i no save marit hariap na ting olsem sapos marit bilong ol i no wok gut ol i ken katim marit o lusim poroman—ol i no gat dispela tingting kranki. Ol i save, taim ol i mekim tok tru antap long de bilong marit, em nau, ol i mas bihainim lo bilong Jehova i tok: “Olsem na tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.”—Matyu 19:6; Mak 10:9.
18. Wanem gutpela rot bilong helpim man na meri long i stap amamas taim ol i marit pinis?
18 Taim man i marit, em i tok promis long i stap gut long poroman inap long olgeta yia tupela i stap laip, olsem na em i mas skelim na tingim gut ol samting pastaim. Man bai askim skin bilong em, ‘Dispela meri i stret long mi?’ Tasol bikpela samting tu, em i mas askim olsem, ‘Mi stret long dispela meri? Mi wanpela strongpela Kristen na mi inap lukautim em gut long ol samting bilong spirit em i mas kisim?’ Tupela wantaim i gat wok long ai bilong Jehova long i stap strong long ol samting bilong spirit na ol inap tru long kamapim strongpela marit i no inap bruk na God i ken orait long en. Planti tausen marit Kristen ol inap tokaut olsem, taim man na meri i singel yet na ol i mekim wok bilong God long olgeta de, dispela em i gutpela rot tru bilong helpim ol long i stap amamas taim ol i marit pinis, long wanem, dispela wok i save skulim ol olsem ol i mas givim samting, na ol i no ken kisim tasol.
19. Bilong wanem sampela Kristen i save stap singel na ol i no marit?
19 Sampela Kristen ol i tingim wok bilong autim gutnius na ol i laik i stap singel, na long dispela pasin ol i ‘no holim meri.’ (Saveman 3:5) Na sampela ol i laik wet inap long taim ol i winim mak long ol samting bilong spirit na bai wanpela gutpela poroman i laik maritim ol. Tasol yumi mas tingim tu ol Kristen i stap singel na ol i laik tru bai ol i ken marit na i gat poroman bilong mekim gut long ol na helpim ol, tasol ol i no painim yet wanpela poroman. Yumi ken save, Jehova i amamas tru long ol i no bin brukim ol lo bilong Baibel taim ol i wok long painim wanpela poroman bilong marit long en. Ol i stap gut long God, na yumi mas amamas long dispela na givim sampela gutpela tok long ol bilong strongim bel bilong ol.
20 Olsem wanem? I gat wan wan taim ol man marit tu i “no ken holim meri”? Ating i olsem, long wanem, Pol i tok: “Ol brata, mi tok olsem, taim i sotpela nau. Olsem na long dispela hap taim i stap yet, ol man i gat meri ol i mas i stap olsem ol i no gat meri.” (1 Korin 7:29) Olsem na sampela taim ol amamas na ol gutpela samting bilong marit i mas i stap olsem nambatu sapos man i gat planti wok bilong God em i mas mekim. Sapos tupela marit i gat stretpela tingting long dispela samting, orait dispela pasin i no inap nogutim marit bilong ol—em bai strongim marit, long wanem, em i save helpim tupela poroman wantaim na ol i no ken lusim tingting olsem Jehova i mas i stap olsem as bilong strongim marit bilong ol.—Saveman 4:12.
21. Bilong wanem yumi no ken skelim pasin bilong ol marit, olsem ol i laik kamapim pikinini o nogat?
21 Na tu, sampela marit Kristen ol i no kamapim sampela pikinini, long wanem, ol i laik i stap fri long mekim wok bilong God. Ol i bin daunim dispela laik bilong ol, na Jehova bai givim gutpela pe long ol long dispela. Tru, Baibel i laik kirapim ol Kristen long i stap singel bambai ol i ken i stap fri long autim gutnius, tasol Baibel i no tokaut stret olsem i gutpela sapos ol marit i no ken kamapim pikinini bambai ol i ken i stap fri long autim gutnius, nogat. (Matyu 19:10-12; 1 Korin 7:38; skelim wantaim Matyu 24:19 na Luk 23:28-30.) Olsem na em i samting bilong ol marit yet long tingim wanem samting ol bai mekim—ol i mas skelim sindaun na ol narapela samting bilong ol, na skelim maus bilong bel, na bai ol samting ol i mekim i stret long dispela. Samting tupela marit i tingting long mekim, ol narapela i no ken skelim na sutim tok long ol.
22. Yumi mas skelim gut wanem samting?
22 Tru tumas, “olgeta samting . . . i save kamap long taim bilong em yet.” Na tu, i gat “taim bilong pait na taim bilong sindaun gut.” (Saveman 3:1, 8) Stori i kamap bihain long dispela bai kamapim klia i gat wanem as na i bikpela samting long yumi mas skelim gut olsem yumi stap long wanem kain taim—taim bilong pait o taim bilong sindaun gut.
Yu Inap Stori Long Dispela?
◻ Bilong wanem i bikpela samting long yumi mas save, ‘olgeta samting i save kamap long taim bilong em yet’?
◻ Bilong wanem nau em i “taim bilong krai”?
◻ I gat wanem as na ol Kristen i amamas tru, maski ol i “krai”?
◻ Olsem wanem sampela Kristen i soim olsem ol i ting dispela taim bilong nau em taim bilong ol “i no ken holim meri”?
9. Taim Bikpela Tait i no kamap yet, wanem kain pasin i stap long graun? Bilong wanem yumi ol lain bilong nau i mas tingim dispela samting?
20. Bilong wanem sampela taim ol man marit tu i ‘no holim meri’?
[Ol Piksa long pes 6]
Tru, ol Kristen i save “krai” long ol pasin nogut na hevi i kamap long graun . . .
. . . tasol ol i lain bilong amamas tru, winim ol narapela lain long graun
[Piksa long pes 8]
Pasin bilong mekim wok bilong God long olgeta de, dispela em i gutpela rot tru bilong helpim man na meri long i stap amamas taim ol i marit pinis