Yu Ting Olsem Wanem Long Yu Yet?
EM WANPELA man i gat pasin antap. Em i bin kisim wok i gat bikpela namba insait long gavman, na em i hambak tru long ol man i givim biknem long em na amamas long em. Tasol narapela ofisa bilong gavman i no laik givim kain biknem olsem long em, na em i kros nogut tru long dispela. Bilong bekim nogut long em, dispela bikman bilong gavman i gat pasin antap em i laik painim rot bilong kilim i dai olgeta manmeri i stap aninit long dispela gavman na ol i wantok bilong dispela ofisa. Man! Em i ting em i samting tru na dispela i paulim tru tingting bilong em!
Dispela man i gat tingting nogut, em Haman. Em wanpela ofisa i gat bikpela namba insait long haus bilong King Serksis bilong Persia. Orait husat dispela man em Haman i birua long en? Em wanpela Juda, nem bilong em Mordekai. Tru, i no planti man i save kisim tingting olsem bilong Haman long pinisim wanpela lain olgeta, tasol dispela i soim yumi long ol samting nogut tru em pasin antap inap kamapim. Pasin hambak bilong Haman i givim bikpela hevi tru long ol narapela manmeri, na tu, dispela pasin i mekim na bihain em i kisim bikpela sem long ai bilong ol man, na bihain moa ol i kilim em i dai.—Esta 3:1-9; 5:8-14; 6:4-10; 7:1-10.
Ol Man i Lotu Tru Long God Ol Tu Inap Kisim Pasin Antap
Jehova i laik bai yumi mas “daunim tingting bilong yumi yet.” (Maika 6:8) Baibel i gat stori bilong sampela man em ol i no bin holimpas kain pasin olsem. Dispela i mekim na ol i bin kisim bikpela hevi na bel bilong ol i bagarap stret. Orait nau yumi ken skelim stori bilong sampela man olsem, na dispela inap helpim yumi long save olsem taim man i no gat stretpela tingting long em yet, dispela em i pasin kranki na em inap kamapim samting nogut.
Jona, em profet bilong God, em i bin kisim tingting i kranki stret, na dispela i mekim na em i laik ranawe taim God i givim wok long em bilong toksave long ol man nogut bilong Ninive olsem Jehova i skelim ol pinis long kot na em bai mekim save long ol. (Jona 1:1-3) Bihain, taim wok bilong Jona long autim tok i kirapim ol Ninive long tanim bel, em i bel hevi stret. Em i gat nem olsem profet na em i tingting tumas long dispela, olsem na em i no tingim laip bilong planti tausen manmeri bilong Ninive. (Jona 4:1-3) Em nau, sapos yumi tingting tumas long yumi yet, ating bai yumi hatwok long kisim stretpela tingting long ol man na long ol samting i wok long kamap.
Na yumi ken tingim Usia, pastaim em i wanpela gutpela king bilong Juda. Orait taim em i lusim pinis stretpela tingting, em i hambak na i laik mekim sampela wok em ol pris tasol inap mekim. Em i no mekim pasin daun, na tu, em i laik kalapim wok bilong em, olsem na em i kisim nogut long en—wanpela sik nogut i kamap long em, na God i no orait moa long em.—2 Stori 26:3, 16-21.
Ol aposel bilong Jisas i no gat stretpela tingting long sampela samting, na klostu dispela samting i pundaunim ol. Ol i tingting tumas long kisim biknem na strong bilong bosim ol man. Orait taim wanpela bikpela traim i kamap, ol i lusim Jisas na ranawe. (Matyu 18:1; 20:20-28; 26:56; Mak 9:33, 34; Luk 22:24) Ol i no gat pasin daun, na ol i ting ol i samting tru, na dispela i mekim na klostu ol i no tingim moa ol samting Jehova i laik mekim na wok bilong ol insait long dispela.
Pasin Bilong Ting Yumi Samting Tru
Taim yumi no gat stretpela tingting long yumi yet, dispela inap kamapim bel hevi na bagarapim pasin wanbel i stap namel long yumi na ol narapela. Olsem: Yumi sindaun insait long wanpela rum na yumi lukim tupela meri i toktok isi wantaim na ol i lap. Orait sapos yumi gat pasin bilong tingim yumi yet tasol, yumi inap kisim tingting kranki olsem tupela i lap long yumi, long wanem, ol i toktok isi tru. Yumi no inap tingim narapela as na ol i mekim olsem. Yumi ting ol i mas stori long yumi tasol. Em nau, yumi bel hevi na yumi tingting olsem yumi no ken toktok moa wantaim tupela. Olsem na sapos yumi no gat stretpela tingting long yumi yet na yumi ting yumi samting tru, yumi inap kisim tingting kranki long tok o pasin bilong narapela, na dispela bai bagarapim pasin bilong pas gut wantaim ol pren, na famili bilong yumi, na ol narapela.
Ol man i tingting tumas long ol yet ol inap kisim pasin bilong hambak, na oltaim ol i tok hambak long bikpela save bilong ol, o ol gutpela wok ol i bin mekim, o ol gutpela samting bilong skin ol i holim. O taim ol i stap wantaim ol narapela, ol yet i laik mekim olgeta toktok, na olgeta taim ol i toktok long ol samting ol yet i bin mekim. Dispela kain tok i kamapim olsem ol i no save laikim tru ol narapela, na pasin bilong ol inap skrapim bel bilong ol man. Olsem na ol man i save hambak long ol yet, planti taim ol narapela i save stap longwe long ol.—1 Korin 13:4.
Taim yumi ol Witnes Bilong Jehova i autim tok, sampela man i save tok bilas long yumi na sakim yumi. Tasol yumi mas save, ol i no birua long yumi yet, nogat; ol i birua long Jehova, em As bilong dispela tok yumi autim. Tasol sapos yumi no gat stretpela tingting long yumi yet na yumi ting yumi samting tru, dispela inap kamapim bikpela hevi tru. Bipo wanpela brata i autim tok na man bilong haus i toknogutim em, na em i ting man i sutim dispela tok long em yet, olsem na em i bekim tok nogut long dispela man. (Efesus 4:29) Bihain dispela brata i no autim tok moa long haus bilong ol man. Em nau, pasin antap inap kirapim yumi long belhat na mekim tok kros taim yumi autim tok. Olsem na yumi mas wok strong na bai dispela samting i no ken kamap. Yumi mas mekim pasin daun na askim Jehova long helpim yumi long holimpas stretpela tingting long dispela gutpela wok Kristen bilong yumi long autim tok.—2 Korin 4:1, 7; 10:4, 5.
Na sapos yumi ting yumi samting tru, dispela inap pasim yumi long kisim ol tok bilong stretim yumi. Bipo, long wanpela kantri long Sentral Amerika, wanpela manki i gat 15 krismas samting em i mekim wanpela tok long Skul Bilong Wok Autim Tok insait long kongrigesen Kristen. Orait taim wasman bilong skul i givim sampela strongpela tok long em, dispela manki i belhat na em i tromoi Baibel bilong em i go daun long plua na em i wokabaut i go lusim Haus Kingdom, na em i tingting olsem em i no ken kam bek moa. Tasol sampela de bihain em i daunim bel bilong em na em i stretim dispela hevi wantaim wasman bilong skul, na em i mekim pasin daun na kisim ol tok wasman i givim long em bilong helpim em. Bihain dispela yangpela man i kamap wanpela strongpela Kristen.
Sapos yumi no gat pasin daun na yumi tingting tumas long yumi yet, dispela inap mekim na yumi no pas gut moa wantaim God. Sindaun 16:5 i tok: “Bikpela i no laikim tru ol man i save hambak na litimapim nem bilong ol yet.”
Stretpela Tingting Long Yumi Yet
Em nau, yumi save yumi no ken tingting tumas long yumi yet. Tasol i no olsem yumi no ken tingting gut long ol samting yumi mekim o ol tok bilong yumi, nogat. Baibel i makim olsem ol wasman, ol wokman—olgeta insait long kongrigesen—ol i mas tingting gut long pasin na tok ol i mekim. (1 Timoti 3:4, 8, 11; Taitus 2:2) Olsem na ol Kristen i ken mekim wanem bilong kisim pasin daun na kisim stretpela tingting long ol yet na tingting gut long ol samting ol i mekim, na holimpas ol dispela pasin?
Baibel i kamapim stori bilong planti manmeri ol i gat stretpela tingting long ol yet. Man i stap olsem gutpela piksa tru long mekim pasin daun, em Jisas Krais. Bilong mekim laik bilong God na helpim ol man long kisim laip i stap oltaim, Pikinini Bilong God i lusim bikpela namba tru em i holim long heven na em i kamap wanpela man nating bilong graun. Maski ol i bin tok bilas long em, na tok nogut long em, na ol i kilim em i dai olsem wanpela man nogut, em i holimpas pasin bilong bosim gut bel na mekim gutpela pasin ol man inap givim biknem long en. (Matyu 20:28; Filipai 2:5-8; 1 Pita 2:23, 24) Olsem wanem Jisas inap mekim olsem? Em i bilip na wetim Jehova i helpim em, na em i strong long mekim laik bilong God. Jisas i wok strong long stadi long Tok Bilong God, na em i beten strong, na em i taitim bun tru long mekim wok bilong autim tok. (Matyu 4:1-10; 26:36-44; Luk 8:1; Jon 4:34; 8:28; Hibru 5:7) Sapos yumi bihainim pasin bilong Jisas, dispela inap helpim yumi long kisim stretpela tingting long yumi yet na holimpas dispela kain tingting.—1 Pita 2:21.
Na yumi ken tingim gutpela pasin tru bilong pikinini bilong King Sol, em Jonatan. Papa bilong em i bikhet long God, olsem na em i no gat rot long senisim Sol na kamap king. (1 Samuel 15:10-29) Orait yu ting Jonatan i bel hevi long dispela samting? Yu ting em i bel nogut long Devit, em dispela yangpela man bai senisim em na kamap king? Jonatan i gat bikpela krismas moa, winim Devit, na yumi ken ting em i gat save long planti samting, winim Devit, tasol em i mekim pasin daun na em i bihainim pasin Jehova i bin putim na em i stap gut long Devit na helpim em. (1 Samuel 23:16-18) Sapos yumi save gut long laik bilong God na yumi amamas long daun long en, dispela bai helpim yumi na bai yumi ‘no ken ting save na pasin bilong yumi i winim ol arapela.’—Rom 12:3.
Jisas i bin skulim ol man olsem pasin daun na pasin bilong ting ol narapela i winim yumi i bikpela samting. Bilong kamapim klia dispela samting, em i mekim tok piksa na em i tok, taim ol disaipel bilong em i go long wanpela kaikai bilong marit, ol i no ken sindaun “long namba wan sia,” nogut wanpela man i kam na em i gat biknem i winim ol, na nau ol i mas lusim dispela sia na i go sindaun long sia bilong ol man nating i no gat nem, na bai ol i gat bikpela sem. Bilong kamapim klia tru dispela samting, Jisas i tok moa olsem: “Man i litimapim nem bilong em yet, bai God i daunim em. Tasol man i daunim em yet, bai God i litimapim em i go antap.” (Luk 14:7-11) Yumi gat savepasin sapos yumi putim gut yau long dispela tok bilong Jisas na yumi kisim pasin bilong ‘daunim yumi yet.’—Kolosi 3:12; 1 Korin 1:31.
Stretpela Tingting i Helpim Yumi
Taim ol wokman bilong Jehova i gat pasin daun, dispela i helpim ol long kisim amamas long wok bilong God ol i mekim. I no hatwok long i go toktok wantaim ol elda taim ol i gat pasin daun na ol i mekim pasin isi long ol sipsip bilong God. (Aposel 20:28, 29) Taim ol elda i gat dispela kain pasin, olgeta insait long kongrigesen i no save pret long i go toktok wantaim ol na askim ol long helpim ol. Olsem na ating ol brata sista long kongrigesen bai pas gut wantaim long pasin sori na narapela bai bilip tru long narapela.
Sapos yumi no tingting tumas long yumi yet, dispela bai helpim yumi long kisim ol gutpela pren. Pasin daun bai helpim yumi na bai yumi no kisim pasin bilong resis wantaim ol narapela na yumi laik winim ol long mekim ol gutpela pasin o long kisim planti samting bilong skin. Pasin daun bai helpim yumi long tingim gut ol narapela, olsem na bai yumi inap mekim gut bel bilong ol man i gat hevi na helpim ol. (Filipai 2:3, 4) Taim ol man i pilim tru pasin sori na gutpela pasin yumi mekim long ol, dispela i save kirapim ol long mekim wankain pasin long yumi. Em nau, dispela pasin olsem narapela i tingim narapela, em i save mekim na yumi kamap pren tru bilong ol. Em nau, taim yumi no tingting tumas long yumi yet, yumi kisim gutpela samting tru long en!—Rom 12:10.
Na taim yumi gat stretpela tingting long yumi yet, bai yumi no hatwok long tokaut long popaia bilong yumi taim yumi bin bagarapim bel bilong wanpela man. (Matyu 5:23, 24) Olsem na kros i dai na yumi inap kamap wanbel gen wantaim em, na narapela i tingim gut narapela. Ol man i gat wok wasman, olsem ol elda Kristen, sapos ol i gat pasin daun ol i gat rot long helpim gut ol narapela. (Sindaun 3:27; Matyu 11:29) Na tu, man i gat pasin daun bai em i no hatwok long lusim rong ol narapela i mekim long em. (Matyu 6:12-15) Bai em i no kros taim em i ting wanpela brata i givim baksait long em, na em bai bilip na wetim Jehova i stretim ol samting i no gat narapela rot long stretim.—Song 37:5; Sindaun 3:5, 6.
Gutpela samting tru yumi kisim taim yumi mekim pasin daun na yumi ting ol narapela i winim yumi, em i olsem: Jehova i amamas long yumi na em i orait long yumi. “God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.” (1 Pita 5:5) Yumi no ken kisim tingting olsem yumi samting tru—dispela kain tingting i olsem umben bilong kalabusim yumi. Yumi mas mekim pasin daun na save long wok bilong yumi insait long pasin Jehova i bin putim bilong stiaim lain bilong em. Ol gutpela samting tru i wetim ol manmeri i save bihainim tok bilong God long yumi mas “daunim tingting bilong yumi yet.”
[Piksa long pes 22]
Jonatan i mekim pasin daun na helpim Devit