Ripot Long Wok Bilong Kingdom
Kisim Save Long God i Gat Pasin Sori
ANTONIO, em wanpela man Brasil, taim em i gat 16 krismas, em i no amamas long i stap bilong em. Em i pilim olsem em i nogut pinis, olsem na em i kirap kisim ol drak na dring planti. Planti taim em i bin tingting long kilim i dai em yet. Long dispela taim em i tingim bek samting mama bilong em i bin tokim em, olsem ‘God yet em i as bilong pasin sori.’ (1 Jon 4:8) Tasol dispela God bilong pasin sori i stap we?
Em i laik kisim helpim long lusim ol drak na dring, olsem na em i go lukim pris bilong dispela ples. Antonio i kirap mekim planti wok insait long Misin Katolik, tasol em i gat planti askim yet. Olsem: Em i tingting planti long dispela tok Jisas i bin mekim, “Yupela bai i save long tok tru, na tok tru bai i mekim yupela i kamap fri.” (Jon 8:32) Jisas i tok promis long wanem kain pasin bilong i stap fri? Misin i no bekim gut ol askim bilong em. Isi isi Antonio i lusim misin na em i kirap gen long dring na kisim drak. Na pasin bilong em long dring na kisim drak i go nogut moa.
Long dispela taim, meri bilong Antonio, em Maria, i kirap stadi long Baibel wantaim ol Witnes Bilong Jehova. Antonio i no pasim em, tasol em yet i no laik, em i ting ol Witnes i “wanpela lotu bilong Amerika na ol i save helpim gavman bilong Amerika long bosim tingting bilong ol man.”
Maski Antonio i gat dispela tingting, Maria i larim sampela Wastaua na Kirap!, i stori long ol samting em i ting Antonio i gat laik long kaunim, i stap nabaut long haus. Antonio i save amamas long kaunim ol buk, olsem na sampela taim em i lukim sampela tok long ol nius taim meri bilong em i no stap. Nau long namba wan taim long laip bilong em, em inap painim bekim bilong ol askim bilong em long Baibel. Na em i tok, “Mi luksave tu long pasin sori na gutpela pasin meri bilong mi na ol Witnes i mekim long mi.”
Long yia 1992, Antonio i pasim tok olsem em i laik stadi long Baibel wantaim ol Witnes. Tasol em i wok yet long kisim ol drak na dring planti. Long wanpela nait em wantaim wanpela poroman ol i lusim wanpela setelmen na ol i laik i go bek long haus, na ol polis i pasim ol. Taim ol i painim Antonio i holim drak koken, ol i paitim em nogut tru. Wanpela polisman i tromoi em i go daun long graun malumalum na putim gan klostu long pes bilong em. Narapela polisman i bikmaus na tok, “Pinisim em!”
Taim Antonio i slip i stap long graun malumalum em i tingim ol samting em i bin mekim long laip bilong em. Em i no inap tingim planti gutpela samting, em inap tingim famili bilong em na Jehova tasol. Em i mekim sotpela beten na askim Jehova long helpim em. I no gat as na ol i mekim, tasol tupela polisman i lusim em. Em i go bek long haus na em i bilip olsem Jehova i bin lukautim em.
Antonio i kirap long givim bel tru long stadi long Baibel. Isi isi em i senisim ol pasin bilong em bambai Jehova i ken amamas long em. (Efesus 4:22-24) Em i wok long bosim gut skin na dispela i helpim em long mekim sampela samting bilong winim hevi bilong kisim drak. Tasol em i mas kisim helpim bilong ol dokta tu. Inap tupela mun em i mas i stap long wanpela haus sik bilong helpim ol man i kalabus long drak. Long dispela taim em inap kaunim sampela buk i stori long Baibel, wanpela em buk Save i Bringim Man Long Laip Oltaim. Antonio i stori wantaim ol narapela man i stap long dispela haus sik long ol samting em i lainim long ol dispela buk.
Taim Antonio i lusim dispela haus sik em i wok yet long stadi wantaim ol Witnes. Long nau, Antonio, Maria, tupela pikinini meri bilong ol, na mama bilong Antonio, ol i stap amamas na wanbel long mekim wok bilong Jehova. Antonio i tok: “Nau mi save gut long insait bilong dispela tok ‘God yet em i as bilong pasin sori.’ ”
[Piksa long pes 8]
Autim tok long Rio de Janero