Ol Samting i Mas i Stap Klin—Yumi Mas Ting Olsem Wanem Long Dispela?

LONG Yurop na Amerika, long yia 1700 i go inap 1900 samting, ol man i no gat pasin bilong mekim ol samting i stap klin, olsem na ol misineri bilong dispela taim ol i autim tok em yumi inap kolim olsem “tok bilong ol samting i mas i stap klin.” Dispela tok i bungim ol samting i doti nogut wantaim sin, na pasin bilong mekim ol samting i stap klin i helpim man long i go klostu moa long God. Ating dispela tok i as bilong wanpela tok em planti man i save long en, olsem: “Pasin bilong mekim ol samting i stap klin i helpim man long givim bel long God.”

Lain Salvation Army, em William na Catherine Booth i bin kirapim, ol i strong long kirapim ol man long bihainim dispela tok. Wanpela buk (Health and Medicine in the Evangelical Tradition) i tok, wanpela tok bilong ol i olsem: “Sop, Sup, na God i kisim bek man.” Bihain, taim Louis Pasteur na ol narapela i painimaut olsem ol binatang i save kamapim sik, dispela i kirapim ol man na lain bilong saiens long wok strong moa long painim ol gutpela rot bilong daunim ol sik samting.

Sampela samting ol i mekim i olsem: Ol i tambuim pasin bilong witnes long kot i kis long Baibel, na pasin bilong yusim wanpela kap tasol bilong dring wara long skul na long ol ples bilong kisim tren. Ol i bin traim long pinisim pasin bilong mekim wok long wanpela kap tasol long lotu na putim ol kap bilong ol wan wan man yet. Yes, ol dispela lain bilong bipo ol i bin helpim ol man long kisim pasin bilong mekim ol samting i stap klin. Ol i strong tru long ol samting i mas i stap klin, olsem na wanpela meri bilong raitim buk i tok long gutpela samting i kamap long dispela olsem, “ol i givim bel tru long ol samting i mas i stap klin.”

Tasol dispela pasin bilong “givim bel tru long ol samting i mas i stap klin,” i stap sotpela taim tasol. I no longtaim na ol lain i mekim wok bisnis long sop ol i mekim i kamap samting ol man i mas kisim bilong mekim gut skin tasol. Ol toksave long ol nius na televisen i kirapim ol man long kisim tingting olsem sapos man i yusim wanpela kain sop samting, dispela bai mekim em i kamap man i gat nem na ol narapela bai mangal long em. Televisen i save strongim dispela tingting. Ol maniman em piksa bilong ol i save kamap long ol toksave na long redio na televisen samting, yumi no lukim ol i klinim haus, o brumim na rausim ol pipia, o rausim pekpek bilong ol pusi na dok bilong ol.

Na tu, sampela man i ting olsem wok mani bai helpim ol long baim ol samting bilong skin, tasol wok bilong lukautim haus nogat. Olsem na ol i ting i no gat wok long lukautim ples ol i sindaun long en, long wanem, ol i no inap kisim pe long en. Ol dispela tingting i kirapim ol man long ting ol i gat wok long klinim skin tasol, na ol narapela samting nogat.

Tingting Bilong God Long Dispela

Sampela i ting ol wok ol i bin mekim long bipo bilong skulim ol man long mekim ol samting i stap klin, dispela i no bin helpim tru sindaun bilong ol man. Dispela i stret, long wanem, pasin bilong mekim ol samting i stap klin em i wanpela pasin bilong Jehova, em i holi na em i klinpela God. Em i skulim yumi long bihainim pasin holi na klinpela pasin long olgeta samting yumi mekim.​​—⁠Aisaia 48:17; 1 Pita 1:​15.

God Jehova i stap gutpela piksa long dispela pasin. Ol samting God i wokim i kamapim klia olsem ol samting i mas stap klin, na i kamapim klia ol narapela pasin bilong em yumi no inap lukim. (Rom 1:​20) Yumi lukim olsem ol samting God i bin wokim i no save kamapim ol pipia i bagarapim graun. Dispela graun na olgeta samting bilong en inap stretim bek em yet, na ol i bilong helpim i stap bilong yumi. Man i gat pasin bilong mekim ol samting i stap klin, em tasol inap wokim ol dispela samting. Dispela inap helpim yumi long save olsem ol man i lotuim God ol i mas bihainim pasin bilong mekim ol samting i stap klin.

Fopela Samting Yumi Mas i Stap Klin Long En

Baibel i kolim 4-pela samting em ol man i lotuim God ol i mas wok strong long i stap klin long en. Yumi ken stori long wan wan bilong ol dispela samting.

Ol samting bilong spirit. Em i bikpela samting tru long i stap klin long ol samting bilong spirit, long wanem, dispela bai helpim man long kisim laip oltaim. Tasol em wanpela samting planti man i no tingim liklik. Bilong i stap klin long ol samting bilong spirit, yumi no ken insait liklik long ol pasin bilong lotu giaman, long wanem, God i tingim olgeta kain lotu giaman olsem samting i doti. Aposel Pol i tok: “Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.’ ” (2 Korin 6:​17) Disaipel Jems i tokaut klia olsem: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. . .  . Yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”​​—⁠Jems 1:​27.

God i kamapim klia tru olsem em i no orait liklik long pasin bilong bungim lotu giaman wantaim pasin bilong lotu tru long em. Sampela samting bilong lotu giaman em ol pasin i no stret na ol imis na god giaman. (Jeremaia 32:35) Olsem na Baibel i tok ol Kristen tru i no ken insait liklik long ol lotu i gat pasin doti i stap long en.​​—⁠1 Korin 10:​20, 21; KTH 18:⁠4.

Stretpela pasin. Long dispela samting tu, God i kamapim klia olsem stretpela pasin i narapela kain long pasin i no stret. Tok bilong Efesus 4:​17-​19 i stret long pasin bilong ol lain bilong dispela graun long nau: “Save bilong ol i olsem tudak . . . olsem na ol i stap ausait long laip bilong God. Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.” Dispela kain tingting nogut i save kamap long planti rot na em inap i stap ples klia o i stap hait, olsem na ol Kristen i gat wok long was i stap.

Ol man i laikim tru God ol i save olsem pasin pamuk, man i slip wantaim man, man na meri singel i slip wantaim, na ol piksa nogut bilong pasin sem, ol dispela pasin i no stret wantaim lo bilong Jehova long stretpela pasin. Tasol ol piksa wokabaut samting i mekim ol dispela pasin nogut i kamap olsem samting nating tasol. Olsem na ol Kristen i mas was gut long ol kain pasin olsem. Sapos Kristen i pasim ol klos i pas na i no haitim gut skin na em i go long ol miting Kristen o long ol bung bilong amamas, dispela inap pulim ai bilong ol narapela na i soim olsem em i no bihainim stretpela pasin. Dispela kain pasin bilong bilas i save bringim ol tingting nogut bilong dispela graun i kam insait long kongrigesen Kristen, na tu, em inap kirapim ol narapela long kisim tingting nogut. Olsem na long dispela samting, ol Kristen i mas wok strong long kamapim “gutpela tingting na save i kam long God.”​​—⁠Jems 3:​17.

Tingting. Tingting bilong yumi i no ken i stap olsem ples bilong holim ol tingting nogut. Jisas i mekim tok lukaut long ol tingting nogut taim em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:​28; Mak 7:​20-23) Ol dispela tok i makim tu pasin bilong lukim ol piksa nogut bilong pasin sem, ritim ol buk i stori long pasin sem, na putim yau long ol musik i gat ol tok bilong kirapim man long mekim pasin i no stret. Olsem na ol Kristen i mas abrusim ol samting inap mekim ol i kamap doti, na bilong mekim olsem, ol i mas abrusim olkain tingting nogut inap kirapim ol long mekim ol tok na pasin i doti.​​—⁠Matyu 12:34; 15:⁠18.

Ol samting bilong skin. Baibel i bungim pasin holi wantaim pasin bilong i stap klin long skin. Pol i tok: “Ol brata tru bilong mi, . . . yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.” (2 Korin 7:⁠1) Olsem na sapos ol i gat rot, ol Kristen tru i mas wok strong long mekim skin, haus, na hap ol i sindaun long en i stap klin. Long ol hap i gat hevi long wara i sot, ol Kristen i mas mekim olgeta samting ol inap mekim bilong i stap klin na bilas gut.

Bilong i stap klin long skin, man i no ken kisim tabak, dring planti tumas, na kisim ol drak, em ol samting bilong bagarapim skin. Wasman bilong sipsip em Song Bilong Solomon i stori long em, em i amamas long gutpela smel bilong klos bilong meri Sulam. (Song Bilong Solomon 4:​11) Yumi mekim pasin sori taim yumi lukautim gut skin, long wanem, yumi no laik bai ol narapela i kisim smel nogut bilong yumi. Ol sanda samting ol i gat gutpela smel, tasol yumi no ken ting sanda tasol em inap na yumi no gat wok long waswas long olgeta taim na pasim klinpela klos.

Holim Stretpela Tingting

Sampela man i strong tumas long bihainim pasin bilong i stap klin long skin. Sapos yumi strong tumas long mekim olsem, dispela inap mekim na bai yumi no amamas long i stap bilong yumi. Em inap pulim bikpela hap taim bilong yumi. Tasol sapos yumi no klinim gut haus na ol pipia i pulap na ol samting i stap nogut, dispela inap mekim na bai yumi tromoi bikpela mani moa bilong stretim. Olsem na yumi no ken strong tumas o slek tumas long dispela samting​—⁠yumi mas bihainim stretpela tingting na bai yumi ken mekim haus bilong yumi i stap klin.

Kisim liklik samting tasol. Sapos haus o rum i gat planti samting i pulap long en, dispela bai mekim na i hatwok long klinim na rausim ol pipia samting long sampela hap. Ol haus i no gat planti samting long en bai kisim sotpela taim tasol bilong klinim. Baibel i kirapim yumi long kisim liklik samting tasol long i stap bilong yumi: “Sapos yumi gat kaikai na laplap samting, orait yumi ken tok, ‘Em inap long mi.’ ”​​—⁠1 Timoti 6:⁠8.

Putim stret ol samting. Em wok bilong olgeta man i stap long haus long mekim haus i stap klin. Sapos ol samting long rum i stap nabaut, i no longtaim na haus olgeta bai stap nogut. Putim olgeta samting i stap long ples stret bilong en. Plua bilong rum slip i no hap bilong putim ol klos i doti. Na bikpela samting moa yet, ol toi na ol tul samting i stap nabaut long haus inap kamapim ol bikpela bagarap. Pasin bilong ol man long larim ol samting i stap nabaut nabaut i as bilong planti bagarap i kamap long haus.

Dispela i kamapim klia olsem pasin bilong mekim ol samting i stap klin em i wanpela pasin Kristen. Profet Aisaia i tingim pasin bilong bihainim rot God i makim na em i mekim tok long “Bikrot Bilong God Yet.” Na em i tok moa olsem “ol man i no klin long ai bilong God, ol bai i no inap wokabaut long dispela rot.” (Aisaia 35:⁠8) Yes, sapos nau yumi wok long kisim pasin bilong mekim ol samting i stap klin, yumi soim olsem yumi bilip long tok promis bilong God long em bai kamapim klinpela ples paradais long graun. Na long olgeta hap bilong graun, olgeta lain bai bihainim gut stretpela lo bilong God Jehova long ol samting i mas i stap klin, na long dispela rot ol i givim biknem long em.​​—⁠KTH 7:⁠9.

[Piksa long pes 6]

Em wok bilong olgeta man i stap long haus long mekim haus i stap klin

[Piksa long pes 6]

Dispela graun inap stretim bek em yet