Askim

Ol Kristen long nau i mas bihainim wanem ol tambu em Lo Bilong Moses i kamapim long pasin bilong maritim wanblut?

Lo Jehova i givim long lain Israel i no stori tumas long ol pasin bilong marit. Tasol em i tambuim sampela kain marit. Olsem: Long Wok Pris 18:​6-20, i gat lista bilong ol pasin ol “lain famili,” olsem wanblut tru, i no ken mekim wantaim. Ol dispela ves i stori gut long husat ol wanblut i no ken mekim maritpasin wantaim. Tru, ol Kristen i no aninit long Lo Bilong Moses na dispela Lo i no bosim ol. (Efesus 2:15; Kolosi 2:14) Tasol maski i olsem, dispela i no makim olsem ol Kristen i no gat wok long tingim dispela samting taim ol i makim poroman bilong maritim. I gat planti as na ol Kristen i mas tingim dispela samting.

I gat ol lo bilong gavman i makim husat ol wanblut i ken marit o i no ken marit, na ol Kristen i mas bihainim ol lo bilong kantri ol i stap long en. (Matyu 22:21; Rom 13:⁠1) Ol dispela kain lo i no wankain long olgeta hap. Long nau ol i save tingim save ol dokta na saientis i kisim long skin bilong man, olsem na ol i tambuim ol wanblut long marit. Ol man i save pinis olsem taim ol wanblut tru i marit na i kamapim pikinini, sampela hap skin bilong pikinini inap bagarap o sampela sik inap kisim em. Ol Kristen i tingim dispela, na tu, ol i “stap aninit long ol gavman,” olsem na ol i bihainim ol lo bilong marit bilong hap ol i stap long en.

Na tu, man i mas tingim wanem samting i stret na wanem samting i no stret long ai bilong ol man bilong hap em i stap long en. Klostu olgeta lain man i gat ol lo na kastam i no orait long tupela wanblut tru i marit, ol i ting pasin bilong mekim maritpasin wantaim wanblut em i samting nogut tru, olsem na kain marit olsem i no stret. Maski ol man bilong narapela narapela hap i no gat wankain tingting long pasin bilong ol wanblut i marit, buk The Encyclopædia Britannica i tok, “long planti hap, sapos tupela i wanblut tru, ol man i strong tru long tambuim tupela long mekim maritpasin.” Olsem na maski tupela i no wanblut tru tru na ol i laik marit, ol Kristen i laik tingim ol kastam bilong ples o tingting bilong ol man bilong ples, nogut ol i bagarapim nem bilong kongrigesen Kristen o nem bilong God.​—⁠2 Korin 6:⁠3.

Yumi no ken lusim tingting long maus bilong bel em God i givim. Olgeta inap pilim wanem pasin i stret na wanem pasin i no stret taim mama i karim ol. (Rom 2:15) Maus bilong bel bilong ol i tokim ol long wanem samting i gutpela na i stret long mekim, na wanem samting i no stret long mekim na i bagarapim bel bilong ol man. Tasol sapos ol pasin nogut i paulim na bagarapim pinis maus bilong bel, orait em i no stiaim moa pasin bilong man. Jehova i toktok long dispela samting taim em i givim lo long lain Israel i tambuim tupela wanblut tru long marit. Em i tok: “Yupela i bin i stap long Isip, tasol yupela i no ken bihainim pasin bilong ol Isip. Na nau mi laik bringim yupela i go long Kenan, tasol yupela i no ken bihainim pasin bilong ol Kenan. Na yupela i no ken bihainim ol lo bilong ol.” (Wok Pris 18:⁠3) Ol Kristen i lukautim gut maus bilong bel bilong ol, em Baibel i skulim pinis, na ol i no larim tingting kranki bilong ol man long wanem samting i stret na wanem samting i no stret i bagarapim dispela samting.​—⁠Efesus 4:​17-19.

Orait yumi inap kisim wanem tingting long ol dispela tok? Ol Kristen i no aninit moa long Lo Bilong Moses, tasol maus bilong bel bilong ol i tokaut klia olsem pasin bilong tupela wanblut tru i marit​—⁠olsem papa wantaim pikinini meri, mama wantaim pikinini man, brata wantaim susa​—⁠i no stret liklik long ol Kristen i mekim.a Sapos man i tingting long maritim wanpela wanblut i no bilong famili stret, ol Kristen i save olsem i gat ol lo bilong gavman long ol samting bilong stretim marit, na i gat ol lo na pasin bilong ples ol man i orait long en. Yumi mas tingim gut ol dispela samting na bai yumi ken bihainim dispela tok bilong Baibel: “Yupela ol marit i mas lukautim gut marit bilong yupela, bai em i stap klin tru long ai bilong God.”​—⁠Hibru 13:⁠4.

[Futnot]