Ripot Long Wok Bilong Kingdom
Olgeta Man i Ken Kam Long Haus Kingdom
TAIM Jisas Krais i lainim ol disaipel bilong em long wok bilong autim tok, em i tokim ol long “sanap antap long haus na autim long ol manmeri.” (Matyu 10:27) Yes, ol i mas mekim dispela wok Kristen bilong ol long ples klia, long ai bilong olgeta man. Ol Witnes Bilong Jehova tu ol i bihainim dispela stiatok na ol i mekim wok bilong ol long ples klia. Dispela i opim rot bilong ol Witnes long daunim hevi bilong ol man i birua long ol na planti man i luksave long gutpela wok ol i mekim.
Olgeta man i ken i kam long ol miting bilong ol Witnes Bilong Jehova, tasol ol man i tingting nogut long ol na dispela i mekim na sampela manmeri ol i surik long go insait long wanpela Haus Kingdom. Dispela samting i bin kamap long Finlan. Na sampela ol i pret long go long ol nupela hap. Taim ol Witnes i wokim wanpela nupela Haus Kingdom o ol i stretim gen wanpela Haus Kingdom, ol i save singautim ol man i kam bilong lukim. Na ol i wok strong long singautim ol man i sindaun klostu long ol long i kam lukim Haus Kingdom bilong ol na bai ol i kisim save long wok bilong ol Witnes Bilong Jehova.
Long wanpela hap, ol Witnes i singautim ol man i kam lukim nupela Haus Kingdom bilong ol, na long dispela de yet ol i tilim ol magasin long ol man. Tupela Witnes i bungim wanpela lapun man em i tok em i save amamas long ritim nius Wastaua na Kirap! Tupela brata i tokim em olsem ol i singautim ol man i kam bilong lukim Haus Kingdom bilong ol, na tupela i tok ol i amamas long kisim em i go lukim Haus Kingdom. Dispela man i tok em i amamas long i go wantaim tupela. Meri bilong em i bin putim yau i stap taim ol i toktok, na em i tok, “Mi tu mi laik i go lukim!”
Taim ol i go insait long Haus Kingdom, dispela lapun man i lukluk raun na em i tok: “Em i no blakpela. Man! Em i naispela tru na kala bilong en i gutpela. Sampela i bin tokim mi olsem Haus Kingdom bai i blakpela!” Tupela i stap longtaim liklik na tupela i tokim ol brata olsem tupela i laik kisim sampela buk na nius em ol i bin putim bilong ol man i ken lukim.
Wanpela kongrigesen i laik putim toksave long niuspepa olsem ol i laik singautim ol man i kam lukim nupela Haus Kingdom bilong ol long taim ol i dediketim. Taim edita bilong nius i kisim save long dispela, em i tokim ol long raitim wanpela stori long en. Ol brata i orait long mekim, na bihain liklik dispela stori i kamap long niuspepa, em i stori long dispela taim bilong dediketim Haus Kingdom na long wok bilong ol Witnes Bilong Jehova long dispela hap.
Taim dispela stori i kamap pinis long niuspepa, wanpela lapun Witnes i bungim wanpela meri i sindaun klostu long em, na dispela meri i tokim sista olsem: “I gat wanpela gutpela stori long ol Witnes Bilong Jehova i stap long niuspepa bilong nau!” Dispela sista i autim tok long em na bihain em i givim buklet Jehovah’s Witnesses in the Twentieth Century long em.
Taim ol i singautim ol man i kam raun lukim nupela Haus Kingdom na long taim bilong dediketim Haus Kingdom, dispela i save rausim sampela tingting kranki bilong ol man long ol Witnes Bilong Jehova, na tu, dispela i save kirapim ol pablisa long singautim planti man moa long kam long ol miting. Tru tumas, long planti hap, na Finlan tu, ol man i kisim save olsem olgeta man i ken i kam long Haus Kingdom bilong ol Witnes Bilong Jehova.