Tingim Ol Samting Bilong Spirit na Stap Gut
ATING yu save lusim bikpela haptaim bilong lukautim gut skin bilong yu. Long olgeta de, yu lusim 8-pela aua long slip, planti aua long kukim kaikai na kaikai, na 8-pela aua o moa long wok mani bilong baim ples slip na kaikai. Taim yu sik, ating yu lusim haptaim na mani bilong lukim dokta samting o bilong redim sampela marasin bilong ples. Yu klinim haus bilong yu, waswas, na ating planti taim yu eksasais. Olgeta dispela samting yu mekim bambai skin bilong yu i ken stap strong.
Tasol bilong skin i ken stap strong, yu mas mekim sampela samting moa. I gat wanpela samting na dispela em i bikpela samting bilong i stap gut. Ol dokta i kisim save olsem, bilong skin bilong yu i ken stap gut yu mas i stap gut tu long ol samting bilong spirit.
Wok Wantaim
Profesa Hedley G. Peach bilong Yunivesiti Bilong Melbourne, Australia, i tok: “Planti ripot long dispela samting i bin kamapim olsem sapos man i stap gut long ol samting bilong spirit, dispela i save mekim na skin bilong ol i stap gut moa.” Nius The Medical Journal of Australia (MJA) i stori long dispela samting olsem: “Pasin bilong stap strong long ol samting bilong lotu i helpim man . . . na blut presa i no antap tumas, em i no gat tumas gris kolestrol . . . na em i no ken kisim tumas kensa bilong ol rop bilong bel.”
Na olsem tasol, long Amerika, long 2002, Yunivesiti Bilong California (UC), Berkeley, i skelim 6,545 manmeri na ol i kisim save olsem “ol manmeri i go long lotu wanpela taim long wan wan wik ol i bin stap laip longpela taim moa winim ol man i no go planti taim long lotu o i no go long lotu.” Doug Oman, em man i bin kamapim dispela ripot na i tisa long UC Berkeley Skul Bilong Pablik Helt, em i tok: “Mipela i kisim dispela save bihain long mipela i tingim pinis olsem man i gat wanem kain sindaun na em i mekim wanem bilong lukautim skin bilong em, olsem em i smok o mekim eksasais o nogat.”
Ol i kisim save long sampela narapela gutpela samting i kamap sapos ol man i tingim ol samting bilong spirit, na nius MJA i tok: “Ol ripot long Australia i kamapim olsem ol man i tingim lotu, marit bilong ol i stap gutpela moa, ol i no dring planti tumas o kisim ol drak, i no planti i kilim i dai ol yet o tingting long mekim dispela pasin, ol i no bel hevi tumas, na ol i no tingim ol yet tasol.” Na BMJ (bipo em i nius The British Medical Journal) i tok: “I luk olsem ol man i strong moa long ol samting bilong spirit ol i no bel hevi longtaim tumas taim wanpela long famili i dai, winim ol man i no tingim ol samting bilong spirit.”
I gat kain kain tingting long pasin bilong tingim tru ol samting bilong spirit. Tasol pasin bilong yu long tingim ol samting bilong spirit i mekim bikpela samting long skin na tingting bilong yu. Dispela i stret wantaim wanpela tok Jisas Krais i bin mekim inap 2,000 yia i go pinis. Em i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:3) Pasin bilong tingim ol samting bilong spirit i mekim bikpela samting long skin na amamas bilong yu, olsem na i stret yu askim olsem: ‘Mi inap painim we ol samting bilong spirit bilong stiaim mi? Bilong i stap olsem man i tingim ol samting bilong spirit mi mas mekim wanem?’