Yu Ting Yumi Mas Kisim Gutpela Tok?

LONG nau, planti man i ting ol yet inap long skelim wanem samting i gutpela na wanem samting i nogut, na i stret ol yet i ken makim wanem samting ol i laik mekim. Ol narapela i save tok, olgeta samting i orait tasol long mekim sapos dispela ol samting i mekim man i amamas. Kain tingting olsem i save mekim bikpela samting long marit na famili, em tupela bikpela samting long i stap bilong ol man.​—⁠Stat 3:⁠5.

Tingim Verónica,a em i save stap long Meksiko. Em i tok: “Klostu long taim mipela i marit inap 15 yia, man bilong mi i tokim mi olsem em i save prenim narapela meri. Em i tok dispela meri i yangpela na i mekim em i amamas, olsem na em i no laik lusim dispela meri. Mi kirap nogut tru olsem man bilong mi, em mi save tingim em olsem gutpela pren bilong mi, bai i no inap i stap wantaim mi moa. Bipo mi save ting olsem i dai bilong wanpela long famili em i save kamapim bikpela pen. Tasol long mi, pasin pamuk poroman i mekim i givim bikpela pen moa long mi, long wanem, man mi laikim tru i no i stap wantaim mi moa na em i wok long mekim yet ol samting i givim bikpela pen long mi.”

Orait nau yumi ken tingim wanpela yangpela man i gat 22 krismas na em i bin katim marit pinis na i gat wanpela pikinini man, tasol em i no laik mekim wok bilong em olsem papa. Em i laik bai mama bilong em i lukautim em na pikinini man bilong em. Sapos mama i no orait long ol samting em i laikim, em i save belhat na krosim em, pasin bilong em i olsem bilong wanpela pikinini i no gat gutpela pasin. Mama bilong em i no save em i ken mekim wanem taim pikinini man bilong em i mekim kain pasin nogut olsem.

Dispela samting i no save painim sampela lain tasol, nogat. Planti man na meri i save askim kot long ol i laik lusim poroman bilong ol na planti i katim marit. Planti pikinini i lukim papa o mama bilong ol i lusim famili na kirapim nupela sindaun bilong em yet. Sampela yangpela i no save rispektim moa ol narapela, na ol papamama bilong ol tu, na ol i save mekim ol pasin em bipo ol man i no inap tru long mekim. Ol man i mekim kain kain pasin sem, kisim drak, ol yangpela i bagarapim ol man, na ol pikinini i kilim i dai ol tisa o papamama bilong ol. Ol dispela pasin i go bikpela long planti kantri. Na ating yu luksave olsem hevi i no kamap tasol long wok bilong mekim bikpela long ol pikinini na long marit, nogat.

Taim yumi lukim ol dispela samting, ating yumi laik save bilong wanem ol man i mekim ol kain pasin olsem. Sapos ol man i save long wanem samting i gutpela na wanem samting i nogut, bilong wanem planti hevi i stap yet? Yu ting yumi mas kisim gutpela tok? I gat wanpela samting we yumi ken kisim dispela gutpela tok, em tok yumi inap bilip tru long en? Tru planti man i tok ol i bilip long God na tok bilong em long Baibel, tasol i luk olsem dispela i no save stiaim ol samting ol i makim bilong mekim. Tasol yumi inap kisim wanem ol gutpela samting taim yumi wok long kisim gutpela tok long God? Orait yumi ken skelim dispela samting long stori i kamap bihain long dispela.

[Futnot]