Painim Gutpela Tok Bilong Helpim Yu
GUTPELA sindaun em i wanpela samting yumi olgeta i laik kisim. Bilong kisim dispela kain gutpela sindaun long nau, yumi mas kisim gutpela tok na yumi mas i gat laik long bihainim. Tasol planti taim ol man i no save amamas long bihainim gutpela tok. Planti i tok, man i ken mekim ol samting long i stap bilong em long laik bilong em yet. Tru tumas, Baibel i tok, Satan, dispela nambawan birua bilong God i tokim namba wan man na meri olsem ol inap bosim wokabaut bilong ol yet. Stat 3:5 i kamapim tok em i mekim long Iv: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.”
Olsem wanem? Sindaun bilong Adam na Iv i kamap gutpela, na i no gat hevi i painim ol, taim tupela i bihainim laik bilong tupela yet? Nogat. Wantu tupela i bel hevi long ol samting i kamap long laik bilong ol long makim wanem samting i gutpela na wanem samting i nogut. God i no amamas long tupela na ol i kamap sinman na sindaun bilong ol i gat hatwok long en, na bihain tupela i dai. (Stat 3:16-19, 23) Dai i save painim yumi olgeta. Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”—Rom 5:12.
Maski ol hevi i kamap long samting Adam na Iv i bin mekim, planti man long nau i no ting olsem em i savetingting sapos ol i bihainim tok bilong God. Tasol Baibel i tok “spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru” na em inap helpim yumi long “kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:16, 17) Yumi bai amamas moa sapos yumi bihainim ol tok i stap long Baibel. Na em i bikpela samting long bihainim ol dispela tok insait long famili.
Stap Gut Long Poroman Marit
Olsem Baibel i tok, God i laik marit i bilong i stap oltaim. (Stat 2:22-24; Matyu 19:6) Na tu, Baibel i tok marit i mas i “stap klin tru,” na dispela i makim olsem pasin pamuk i no ken bagarapim marit. (Hibru 13:4) Tasol ating yu save olsem, long nau planti marit i no bihainim dispela lo. Long ples wok sampela i gat pasin bilong tok gris long ol narapela i no poroman bilong ol. Sampela narapela i giamanim famili bilong ol na bai ol i ken i stap wantaim narapela ol i laikim. Sampela i save lusim poroman bilong ol bambai ol i ken i stap wantaim wanpela yangpela man o meri, na ol i tok dispela i save mekim ol i pilim olsem ol i yangpela gen na ol i amamas moa. Dispela samting i bin givim hevi long Verónica. Yumi bin stori long em long stori i kamap paslain long dispela.
Tasol maski ol man i mekim kain samting olsem bilong amamasim ol yet, dispela i no inap kamapim amamas inap oltaim. Ronald inap tokaut olsem dispela samting i tru. Em i ting olsem em bai mekim sindaun bilong em i kamap gutpela moa, olsem na em i lusim meri bilong em bambai em i ken stap wantaim wanpela meri em i prenim pinis inap 6-pela yia na em i gat tupela pikinini long dispela meri. Tasol bihain liklik long em i brukim marit bilong em, dispela pren bilong em i lusim em! Bihain Ronald i go bek na i stap wantaim papamama bilong em. Em i tok, i stap bilong em i “nogut tru.” Em wanpela stori tasol bilong ol samting nogut i save kamap taim man i tingim em yet tasol. Kain pasin olsem, em pasin bilong man i tingim em yet tasol i as bilong en i mekim na planti man na meri i katim marit na famili i bruk, na planti i kisim hevi long dispela—ol man i bikpela pinis na ol pikinini tu.
Tasol taim ol man i bihainim tok bilong Baibel ol inap i stap amamas tru. Kain samting olsem i painim Roberto, em i tok: “Long rot bilong bihainim tok bilong Baibel, mi no lusim meri bilong mi. Mipela i no save kisim amamas long rot bilong pundaun long mekim pasin pamuk wantaim wanpela i no poroman tru bilong mipela, maski dispela man o meri i naispela. Skul mi kisim long Baibel i helpim mi long laikim tru poroman bilong mi, em i bin i stap wantaim mi inap planti yia.” Tok bilong Baibel olsem “yupela i mas lukaut gut bai yupela i no brukim promis yupela i bin mekim wantaim ol meri bilong yupela taim yupela i marit,” dispela tok i bin helpim Roberto long i stap bilong em. (Malakai 2:15) Tok bilong God inap helpim yumi long wanem ol narapela samting?
Mekim Bikpela Long Ol Pikinini
Inap planti yia i go pinis wanpela tingting i bin kamap strong olsem ol papamama i no ken putim planti lo long ol pikinini. Ol man i ting i stret long larim ol pikinini yet i wokim tingting long ol samting ol i laik mekim na makim wanem kain pasin ol i laik bihainim. Ol i ting dispela bai helpim ol long kamap gutpela. Long sampela hap, ol i wokim ol skul we i no gat planti lo tumas, na tu ol sumatin yet inap skelim olsem ol bai go long skul o nogat na hamas amamas o skul ol bai kisim. Long wanpela kain skul olsem, “ol i larim ol pikinini long makim ol samting ol i laik mekim na papamama i no ken skelim na pasim ol.” Long nau tu, sampela saveman bilong skelim pasin bilong ol man i no wanbel long sampela kain pasin bilong stretim ol pikinini, maski ol papamama i ting ol i mas stretim ol pikinini long pasin laikim.
Wanem samting i kamap long dispela? Planti manmeri i ting olsem pasin bilong papamama long ol i no stretim pikinini na larim tasol pikinini i mekim ol samting, dispela i mekim na ol pikinini i stap fri tumas. Ol i pilim olsem dispela samting i as na pasin raskol na pasin bilong kisim drak i go bikpela. Wanpela lain i skelim tingting bilong ol man long Yunaitet Stets i kamapim olsem klostu 70 pesen bilong ol man i ting olsem papamama i no save stiaim gut ol pikinini olsem ol i mas mekim. Taim ol i laik kamapim as na ol skulmangi i sutim ol narapela sumatin na tisa na ol narapela pasin nogut tru ol yangpela i mekim, planti man i sutim tok olsem “papamama i no bin skulim gut ol pikinini.” Na maski bikpela hevi i no kamap, ol papamama na ol pikinini i save kisim hevi taim papamama i no skulim gut pikinini.
Baibel i tok wanem long dispela samting? Baibel i tok olsem papamama i mas mekim wok bilong ol long pasin laikim na ol i mas strong long stretim ol pikinini. Baibel i tok: “Ol pikinini i save mekim olkain longlong pasin. Tasol sapos yu givim kanda long ol, bai ol i lusim dispela pasin.” (Sindaun 22:15) Ol samting papamama i mekim bilong stretim pikinini i mas stret long samting pikinini i mekim. Taim papamama i stretim pikinini ol i mas mekim long pasin isi, na ol i mas bosim gut bel, na tingim gut pikinini. Taim papamama i mekim olsem, ol i kamapim klia olsem ol i laikim tru pikinini. Taim papamama i mekim wok bilong ol long pasin laikim, na ol i no mekim long hatpela pasin, dispela bai helpim pikinini.
Yumi inap lukim gutpela samting i kamap taim ol papamama i bihainim dispela tok. Arturo, em i gat 30 krismas na em i stap long Meksiko na i marit nau tasol, em i tok: “Papa bilong mi i tokaut klia long mi na tupela brata bilong mi olsem em na mama i gat namba insait long famili. Na ol i no gat tupela tingting long stretim mipela. Tasol oltaim ol i bin lusim taim bilong toktok wantaim mipela. Nau mi kamap bikpela pinis, na mi amamas long sindaun bilong mi, na mi save olsem as bilong dispela em ol gutpela tok mi bin kisim.”
Kisim Gutpela Tok Bilong Helpim Yu
Tok Bilong God, em Baibel, em i gat ol nambawan gutpela tok ol man inap kisim bilong helpim ol. Tok bilong en i no bilong helpim famili tasol. Em i helpim yumi long planti samting, long wanem, em i skulim yumi long pasin yumi ken bihainim nau long dispela taim we planti man i no laik ting i gat wanpela Man em savetingting bilong em i win tru, na em i gat namba long bosim i stap bilong ol na dispela bai helpim ol.
God Jehova, em Man Bilong Wokim yumi, em i givim dispela gutpela tok long rot bilong Devit: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Song 32:8) Em i wanpela gutpela samting tru long save olsem Man Bilong Wokim yumi em i save was long yumi na bai hevi i no ken painim yumi, a? Orait askim yu yet: ‘Bai mi larim Jehova i stiaim mi?’ Baibel i tokim yumi: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Sindaun 3:5, 6.
Bilong kisim save long Jehova yumi mas wok strong na givim bel long mekim, tasol yumi inap long save gut long em long rot bilong Baibel. Rot Jehova i tokim yumi long bihainim bai i helpim yumi moa yet “long dispela laip nau yumi stap long en, na long laip yumi bai kisim bihain tu.” Dispela em i gutpela samting tru taim yumi tingim ol gutpela samting em bai kamapim.—1 Timoti 4:8; 6:6.
Sapos yu laikim ol tok Baibel i kamapim na ol gutpela blesing yu inap kisim taim yu bihainim ol tok bilong en, orait putim pasin bilong ritim Baibel na tingim tingim long bel ol tok bilong en i stap olsem nambawan samting long i stap bilong yu. Taim yu mekim olsem dispela bai helpim yu long karim ol hevi long nau na ol samting i kamap bihain. Na tu, yu bai kisim save long ol gutpela samting yu inap wetim i kamap long nupela taim God bai kamapim, we Jehova bai skulim olgeta man na bai ol i stap bel isi.—Aisaia 54:13.
[Piksa long pes 5]
Tok bilong Baibel inap strongim ol marit
[Ol Piksa long pes 6]
Tok bilong Baibel i gutpela bilong stiaim ol man, tasol em i no pasim man long amamas
[Ol Piksa long pes 7]
Ol man i bihainim tok bilong Baibel ol i stap gutpela