Painim Bel Isi

ALBERT i pas gut wantaim meri bilong em na em i gat tupela pikinini. Tasol em i pilim olsem em i sot long wanpela samting. Long wanpela taim we em i hatwok long painim wok mani, em i go insait long wok politik na kisim tingting bilong ol Soselis. Em i kamap wanpela memba bilong lain Komiunis.

Tasol i no longtaim na Albert i no bilip moa long tingting bilong ol Komiunis. Em i lusim wok politik na i kirap givim bel long helpim famili bilong em. Em i wok long helpim ol long i stap amamas na dispela i kamap nambawan samting long laip bilong em. Tasol Albert i pilim olsem em i sot yet long wanpela samting. Em i no stap bel isi.

Tasol i no Albert tasol i pilim olsem. Planti milion manmeri i bin skelim tingting bilong kain kain lain na lotu, long wanem, ol i laik bai i stap bilong ol i gat as bilong en. Long hap bilong Wes, kirap long 1960 samting, wanpela lain ol i kolim hipi i kamap em ol i givim baksait long ol gutpela pasin na lo bilong bipo. Planti yangpela bilong dispela lain i laik painim amamas na ol i laik save i gat wanem as na ol i stap, na ol i mekim olsem long rot bilong ol kain kain drak na tingting bilong ol tisa ol i kolim guru. Tasol pasin ol hipi i bihainim i no helpim ol long kisim amamas tru. Planti i kamap man i kalabus long drak na mekim pasin pamuk na ol i paul long wanem kain pasin i stret long bihainim.

Inap planti handet yia pinis, planti man i bin wok long painim amamas long rot bilong kisim planti mani, bikpela namba, o bikpela skul. Tasol ol dispela samting i no bin kamapim amamas tru. Jisas i tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Pasin bilong laikim tumas long kisim planti mani moa yet, dispela i save kamapim bel hevi. Baibel i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na . . . ol i karim bikpela hevi moa.”​​—⁠1 Timoti 6:​9, 10.

Orait, olsem wanem man inap kisim bel isi na pilim olsem i stap bilong em i gat as bilong en? Yu ting man i mas traim traim na popaia nabaut, wankain olsem wanpela man i stap long tudak i tromoi spia i go long wanpela mak em i no save mak i stap we? Nogat, i no olsem. Stori i kamap bihain long dispela bai soim olsem bilong kisim bel isi, yumi mas inapim wanpela bikpela laik.

[Piksa long pes 3]

Yu ting planti mani, bikpela namba, o bikpela skul bai helpim yu long kisim bel isi?