Bilip Long God—Yu Ting i Mas i Gat Wanpela Mirakel Bambai Yumi Ken Bilip?
ALBERT i gat 20 krismas samting taim em i kirap long painim God. Em i bin go long kain kain lotu bilong kisim save long God, tasol nogat. Taim em i kaunim Baibel, em i kisim save long ol samting God i bin mekim long ol man olsem Noa, Abraham, Sara, na Moses. Albert i pilim olsem em i wok long go klostu long dispela God bilong Baibel. Tasol olsem wanem? I gat rot na em inap bilip olsem God i stap?
Long wanpela apinun Albert i draivim ka i go long wanpela ples i no gat man na em i beten, “Plis God, kamapim wanpela mirakel na bai mi inap save yu stap.” Albert i wet i go i go. Taim wanpela samting i no kamap, “pastaim em i bel hevi, na bihain em i pilim olsem i stap bilong em i no gat as bilong en, na bihain moa em i kros.”
Olsem Albert, planti man i pilim olsem ol i lus long painim God. Ating ol tok ol pris pasto i mekim long haus lotu i paulim tingting bilong ol o pasin bilong ol man bilong autim tok bilong lotu long televisen i mekim na ol i les. Na sampela, taim ol i lukim olsem planti Kristen ol i man bilong tupela maus, dispela i mekim na tingting bilong ol i paul long wanem samting ol i mas bilip long en. Tasol King Devit bilong Israel long bipo i strongim pikinini bilong em Solomon olsem: “Sapos yu wok strong long kisim save long laik bilong [God], orait bai em i larim yu i save gut long em.”—1 Stori 28:9.
Orait, yumi ken save long God olsem wanem? I mas i gat wanpela mirakel i kamap, olsem wanpela narapela kain samting bilong kamapim klia long yu olsem God em i stap? Nius Time i tok, tupela long olgeta tripela tripela man long Amerika ol i bilip long ol mirakel. Na nius i tok moa olsem: “Lotu Karismatik na lotu Pentikostal em ol i save wokim ‘ol mirakel,’ ol i wok long i go bikpela tru long Amerika, winim ol narapela lotu.”
Olsem wanem? I mas i gat “ol mirakel” bambai yu ken bilip long God? Long bipo, God i bin mekim wok long ol mirakel. Olsem: Sol bilong Tarsus i wok long mekim nogut long lain bilong Pikinini bilong God, Krais Jisas, na taim em i lusim Jerusalem na i go long Damaskus, wanpela samting i narapela kain i bin painim em. Long rot bilong wanpela mirakel, Sol i bungim Jisas i kirap bek pinis, na em i tanim bel na kamap Kristen. (Aposel 9:1-22) Dispela man bipo em i mekim nogut long ol Kristen, em i kamap aposel Pol—man bilong mekim bikpela wok bilong helpim lotu Kristen!
Tasol yu ting olgeta taim i gat mirakel, dispela i save kamapim gutpela samting? Yu ting wanpela mirakel i mas kamap long yu bambai yu ken bilip tru long God?
[Piksa long pes 3]
Long rot bilong wanpela mirakel, Pikinini bilong God em i toktok wantaim Sol bilong Tarsus. Yu ting wanpela mirakel i mas kamap long yu?