Pasin Bilong Dispela Graun i No Stret

ATING yu bai wanbel long tok olsem pasin bilong dispela graun yumi stap long en i no stret. Maski yumi gat wanem kain save long mekim wok, o yumi tingim gut ol samting yumi laik mekim, dispela i no makim olsem bai yumi kisim bikpela mani, o wok bilong yumi bai kamap gutpela, o bai yumi gat kaikai, nogat. Planti taim tok bilong saveman King Solomon i save kamap tru: “Ol man i gat gutpela tingting o bikpela save, ol i no save kisim planti mani samting. Na ol hapman bilong kain kain wok, ol i no save kisim ol bikpela wok.” Bilong wanem i olsem? King Solomon i tok moa: “Taim nogut i save painim yumi olgeta.”​—⁠Saveman 9:⁠11.

“Taim Nogut i Save Painim Yumi Wantu Tasol”

Tru tumas, “taim nogut” inap painim yumi sapos yumi stap long wanpela hap we hevi i kamap long en, na nau ol samting yumi bin tingting gut long mekim, na ol samting yumi wet long en, i no inap kamap. Solomon i tok, “taim nogut i save painim yumi wantu tasol, olsem umben i holimpas pis o pisin.” (Saveman 9:12) Olsem: Planti milion manmeri i save wok strong tru long wokim gaden bilong kisim kaikai bilong famili, tasol wantu “taim nogut” i painim ol taim i no gat ren na olgeta kaikai long gaden i bagarap.

Sampela kantri i laik helpim ol lain em “taim nogut” i painim ol, tasol ol i no tilim stret mani samting ol i givim bilong helpim ol. I no longtaim i go pinis ol i bin givim mani bilong daunim bikpela hangre long Afrika. Wanpela lain bilong helpim ol man i tok, “sapos yumi skelim mani ol i bin givim bilong helpim Galf Woa wantaim mani ol i bin givim bilong daunim dispela bikpela hangre, dispela mani ol i givim bilong daunim hangre em i liklik tru.” Yu ting i stret ol kantri i gat planti mani i putim bikpela mani olsem bilong mekim pait long wanpela kantri na ol i putim liklik hap mani tasol bilong pinisim pen na hevi em bikpela hangre long Afrika i kamapim? Na planti man long nau i gat planti mani samting, tasol wanpela long olgeta 4-pela 4-pela man long graun i stap rabis olgeta, na planti milion pikinini i save dai long olgeta yia long ol kain sik em marasin inap stretim. Yu ting dispela i stret? Nogat tru!

Tasol ol narapela samting tu i mekim na “taim nogut i save painim yumi wantu tasol.” Ol lain i gat bikpela strong i save bosim i stap bilong yumi na i makim ol samting i painim yumi, na yumi no inap abrusim. Dispela kain samting i bin kamap long Beslan, Alania, long 2004, taim ol teroris i pait wantaim ami na kilim i dai planti handet manmeri, em planti bilong ol em ol pikinini i go skul long namba wan de. Tru, taim na ples dispela hevi i kamap long en i mekim na sampela i dai na sampela nogat, tasol as tru bilong dispela “taim nogut” em pait bilong ol man.

Dispela Pasin Bai Stap Oltaim?

Taim sampela man i toktok long pasin i no stret, ol i save tok, “I stap bilong yumi ol man i olsem. Oltaim dispela pasin i bin stap na oltaim em bai stap olsem.” Ol i tok, oltaim ol strongpela lain bai mekim nogut long ol lain i no gat strong, na oltaim ol maniman bai kisim bikpela mani long hatwok bilong ol rabisman. Ol i tok, ol dispela pasin na “taim nogut i save painim yumi olgeta,” bai stap i go inap long olgeta taim ol man i stap long graun.

Tasol yu ting dispela pasin i mas i stap olsem? Ol man i mekim wok long save na gutpela tingting bilong ol, yu ting ol inap kisim pe i stret long hatwok bilong ol? Yu ting wanpela man inap senisim tru ol pasin bilong graun i no stret? Ritim stori i kamap bihain long dispela i toktok long dispela samting.

[Piksa Kredit Lain long pes 2]

COVER: Man with a child: UN PHOTO 148426/McCurry/Stockbower

[Piksa Kredit Lain long pes 3]

MAXIM MARMUR/AFP/Getty Images