Taim Bilong Krismas na Nuyia—Em Bai Inapim Ol Laik Bilong Yu?
“[Bikpela King] Peter i tok ol i mas mekim bikpela lotu bilong Nuyia long olgeta haus lotu long Janueri 1. Em i tok ol i mas bilasim ol pos insait long ol haus long ol han bilong diwai bilong Nuyia, na olgeta manmeri bilong Moscow i mas ‘kamapim amamas bilong ol long rot bilong singaut strong bilong tok amamas’ long narapela narapela long Nuyia.”—Buk Peter the Great—His Life and World.
OLSEM WANEM? Yu tingting long mekim wanem long taim bilong Krismas na Nuyia? Em bikpela haptaim bilong malolo. Ating ol papamama na pikinini bai kisim malolo long dispela taim, olsem na em gutpela taim bilong ol famili i mekim ol samting wantaim. Ol man i save mekim Krismas bilong tingim de mama i karim Jisas. Sampela man i laik givim biknem long Krais long taim bilong Krismas, long wanem, ol i pilim olsem em wanpela bikpela samting long dispela taim. Ating yu tu i pilim olsem.
Maski em i taim bilong givim biknem long Krais, o em i taim bilong ol famili i amamas wantaim, o mekim tupela samting wantaim, planti milion papa, mama, na pikinini long olgeta hap ol i amamas long wetim dispela taim i kamap. Olsem wanem long dispela yia? Em bai kamap wanpela gutpela taim bilong famili bilong yu? Na em i bikpela samting long God? Sapos famili i mekim wanpela bung, ol samting i kamap bai inapim ol laik bilong yu, o em bai mekim yu bel hevi?
Planti man husat i save wetim dispela taim, ol i lukim olsem planti taim ol man i mekim bung bilong Krismas na Nuyia ol i no save tingim Krais. Krismas na Nuyia i kamap olsem taim bilong givim presen long narapela narapela, na mekim pati i gat ol pasin nogut i bagarapim nem bilong Krais, o famili i ken bung wantaim. Planti taim long kain bung olsem, wanpela o sampela long famili i kaikai planti tumas na dring spak, na dispela i kirapim ol long tok pait na planti taim ol yet i pait na bagarapim narapela. Ating yu bin lukim dispela samting, o ating dispela i bin painim yu.
Sapos olsem, ating yu pilim olsem ol samting i no senis tumas kirap long taim bilong Bikpela King Peter bilong Rasia, em yumi stori pinis long en. Planti man i no amamas long ol pasin ol man i bihainim long nau bilong mekim Krismas na Nuyia. Ol i laik bai dispela taim i mas i stap olsem taim bilong tingting tasol long ol samting bilong lotu, na bilong famili i bung wantaim. Na tu, sampela i wok strong long senisim dispela pasin ol man i bihainim bilong mekim Krismas na Nuyia, ol i mekim kain tok olsem, Krismas em i taim bilong tingim Jisas tasol. Tasol yu ting dispela inap kamapim sampela senis? Na yu ting dispela bai givim tru biknem long Krais? I gat sampela as na yumi mas i gat narapela tingting long taim bilong Krismas na Nuyia?
Bilong kisim bekim bilong ol dispela askim, yumi ken skelim pasin bilong ol manmeri bilong wanpela kantri—i gat as na ol i ken amamas long taim bilong Krismas na Nuyia.