Autim Gutpela Tok—Long Taim Bilong Krismas Samting
1 Ol haiden i as bilong planti samting ol man i mekim long taim bilong Krismas na Nuyia, tasol long olgeta yia olsem wan bilion manmeri i gat nem Kristen ol i tingim ol dispela bikpela de. Planti man i ting, God i orait long ol samting ol i mekim bilong tingim ol dispela de. Long taim bilong Krismas samting yumi ken mekim wanem bilong helpim ol dispela man long save long gutpela tok bilong Kingdom?
YUMI MAS TINGIM GUT OL
2 Planti bilong yumi i no wok mani long taim bilong Krismas samting, olsem na gutpela sapos ol elda i stretim rot na bai yumi ken autim tok long dispela taim. Tasol yumi mas tingim gut ol man bilong haus—long taim bilong Krismas samting ating sampela i no laik lusim bet hariap long moningtaim—olsem na ol elda i mas stretim taim bilong kirap long autim tok long dispela kain taim.
3 Taim yumi autim tok, bai yumi bungim sampela man i gat planti wok; ating ol i gat wok long redim kaikai bilong ol man i kam bung long haus bilong ol. Yumi mas save, em bikpela taim bilong ol, olsem na yumi mas tingim gut ol na mekim liklik tok tasol. Sapos yumi mekim gutpela pasin Kristen long ol, ating dispela bai opim rot na narapela taim bihain bai ol i putim yau long tok bilong ol Witnes.
4 Yumi no insait long ol samting bilong Krismas, na yumi no save tok ‘Hepi Krismas’ o ‘Hepi Nuyia.’ Tasol sapos ol man i tok ‘Hepi Krismas’ samting, yumi mas tingting gut na no ken mekim sampela tok i skrapim bel bilong ol. Gutpela sapos yumi tok tenkyu tasol. Sapos ol i laik save long tingting bilong yumi long Krismas samting, yumi ken tokim ol, yumi ol Witnes i save givim biknem long Krais Jisas, long wanem Baibel i tok, man i litimapim nem bilong God em i mas litimapim nem bilong Jisas tu. (Jo 5:23) Tasol planti samting bilong ol dispela bikpela de i no save givim biknem long Krais o long God. Sapos nau o long narapela taim bihain ol i laik kisim sampela save moa, yumi ken kamapim sampela tok i stap long pes 176-178 na 180 bilong buk Reasoning.
BILONG KIRAPIM TOK
5 Taim bilong Krismas i olsem samting bilong lotu, olsem na ating bai yumi bungim planti man i laik toktok long God long dispela kain taim. Yumi ken tingim dispela samting long taim yumi laik kirapim tok. Yumi ken mekim tok olsem: “Long nau planti manmeri long olgeta hap ol i wok long tingim Krismas na Nuyia. Olsem wanem? Yu ting ol dispela bikpela de i helpim ol man long tingim God?” Maski man bilong haus i tok wanem, nau yu ken tok: “Planti man i laik bai ol i ken i stap klostu long God olsem pren bilong em, tasol ol i pilim olsem God i stap longwe long ol. Tasol gutpela tru, God yet i singautim yumi long painim em.” Orait nau yu ken kamapim Stori Bilong Mun.
6 Narapela tok yumi ken mekim, em olsem: “Long dispela taim bilong Krismas yumi harim planti man i tok ol i laik bai God i mas belgut long ol man na gutaim i mas kamap long graun. Yu ting olsem wanem? Bai God i kamapim gutaim long graun long dispela taim bilong yumi?” Orait nau yumi ken kamapim tok bilong Baibel i tok Krais Jisas em i “King bilong kamapim gutpela sindaun na bel isi.” (Ais 9:6, 7) Krais Jisas em man God i makim bilong bosim gavman bilong Em, na klostu nau em bai kirap long mekim wok bilong kamapim gutaim long graun na dispela gutaim i bilong i stap oltaim.—Dan 2:44; KTH 21:3-5.
7 Tru, planti man i no givim bel long harim tok bilong Kingdom, na ol i amamas long tingim ol bikpela de lotu bilong ol. Tasol sapos yumi wok long painim ol man i laik save long tok i tru, Jehova bai blesim ol wok yumi mekim, long wanem, em yet i “laikim tumas bai ol kain man olsem i mas lotu long em,” na em bai stiaim ol i go long oganaisesen bilong em.—Jo 4:23, 24.
[Ol Askim]
1. Bilong wanem olsem wan bilion manmeri i gat nem Kristen ol i tingim Krismas na Nuyia?
2. Ol elda i ken mekim wanem na bai yumi ken autim tok long taim bilong Krismas samting?
3. Taim yumi bungim man i gat planti wok, yumi ken mekim wanem?
4. Sapos ol i tok ‘Hepi Krismas’ samting, yumi ken mekim wanem?
5. Taim yumi autim tok long taim bilong Krismas samting, yumi ken tok wanem?
6. Taim yumi autim tok long taim bilong Krismas, yumi ken mekim wanem narapela tok?
7. Sapos yumi wok strong long painim ol man i laik save long tok i tru, Jehova bai mekim wanem?