Tupela Nupela Memba Bilong Gavening Bodi
LONG Trinde moningtaim, Ogas 24, 2005, ol famili Betel bilong Yunaitet Stet na Kanada ol i amamas long harim wanpela toksave. Kirap long Septemba 1, 2005, tupela nupela memba—Geoffrey W. Jackson na Anthony Morris—ol bai insait long lain Gavening Bodi Bilong Ol Witnes Bilong Jehova.
Brata Jackson i bin kirap mekim wok painia long Februeri 1971 long Tasmania, em wanpela ailan bilong Australia. Long Jun 1974, em i maritim Jeanette (Jenny). Liklik taim bihain long dispela, ol i makim tupela bilong mekim wok painia salim. Long 1979 i go 2003, ol i mekim wok misineri long Tuvalu, Samoa, na Fiji—ol ailan kantri bilong Saut Pasifik. Taim ol i stap long ol dispela ailan, Brata na Sista Jackson i helpim tu wok bilong tanim ol tok bilong ol buk na nius bilong Baibel. Kirap long 1992, Brata Jackson i insait long Brens Komiti bilong Samoa, na long 1996 em i insait long Brens Komiti bilong Fiji. Long Epril 2003, em na Jenny i go insait long famili Betel bilong Yunaitet Stet na ol i kirap wok long Dipatmen Bilong Tanim Tok. I no longtaim na Brata Jackson i kamap helpim bilong lain Komiti Bilong Wok Tisa bilong Gavening Bodi.
Brata Morris i bin kirap mekim wok painia long 1971 long Amerika. Long mun Disemba long dispela yia yet, em i maritim Susan, na tupela i mekim yet wok painia klostu fopela yia, inap long taim namba wan pikinini man bilong ol, Jesse, i kamap. Bihain ol i gat narapela pikinini man, Paul. Long 1979, Brata Morris i kirap gen long autim tok fultaim olsem wanpela painia oltaim. Meri bilong em i kirap wok wantaim em taim tupela pikinini i stat long skul. Famili bilong em i go mekim wok long ol hap i sot long man bilong autim tok, long Rhode Island na North Carolina, long Amerika. Long North Carolina, Brata Morris i mekim wok olsem helpim bilong wasman sekit, na tupela pikinini i kirap mekim wok painia oltaim. Taim Jesse na Paul i kisim 19 krismas, ol i singautim tupela i go wok long brens ofis bilong Yunaitet Stets. Long dispela taim, Brata Morris i kirap mekim wok sekit. Bihain, long 2002 ol i singautim em na Susan i go long Betel, na long Ogas 1 tupela i kirap wok long Betel. Brata Morris i bin wok long Dipatmen Bilong Wok Autim Tok long Patterson, na bihain em i wok olsem wanpela helpim bilong Sevis Komiti bilong Gavening Bodi.
I gat dispela tupela nupela memba na sampela moa ol i insait long lain Gavening Bodi, em C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; na D. Sydlik. Olgeta memba insait long Gavening Bodi ol i bilong lain Kristen God i bin makim ol long holi spirit.