Laip Stori

Jehova i Helpim Mi Long Karim Ol Hevi

STORI BILONG DALE IRWIN

“ETPELA EM INAP! OL I BIKPELA WOK TRU.” Dispela em het tok bilong wanpela niuspepa i tokaut long meri bilong mi i karim fopela pikinini, na bungim wantaim fopela pikinini meri mipela i gat pinis. Taim mi yangpela man, mi no gat tingting tru long marit na kamapim planti pikinini olsem. Tasol nau mi kamap papa bilong 8-pela pikinini!

MAMA i karim mi long 1934 long Mareeba, Australia. Mi laspela bilong tripela pikinini. Bihain famili bilong mi i go sindaun long Brisbane we mama bilong mi i mekim wok olsem wanpela Sande skul tisa long haus lotu bilong lotu Metodis.

Long kirap bilong 1938, ol niuspepa i tokaut olsem ating ol bai i no larim Joseph F. Rutherford long hetkota bilong ol Witnes Bilong Jehova long kam insait long Australia. Bihain taim wanpela Witnes i kam long haus bilong mipela, mama i askim em: “Bilong wanem ol i mekim olsem long dispela man?” Dispela Witnes i tok: “Jisas i tok ol man i bihainim em, ol man bai mekim nogut long ol.” Mama i orait long kisim buklet Cure, em dispela buklet i kamapim planti as na lotu i tru i narapela kain long lotu giaman.a Mama i pilim tru ol tok bilong buklet na long Sande em i kisim mipela olgeta pikinini i go long miting bilong ol Witnes Bilong Jehova. Pastaim papa bilong mi i no amamas liklik long dispela, tasol bihain wan wan taim em i raitim ol askim bilong Baibel na Mama i save kisim i go long wanpela bilong ol brata. Bihain brata i save raitim ol bekim em Baibel i as bilong en bilong Mama i ken givim long Papa.

Long wanpela Sande papa bilong mi i kam wantaim mipela long miting, em i tingting long mekim olsem bilong sutim tok long ol Witnes long sampela samting em i no amamas long en. Tasol bihain long em i toktok wantaim wasman raun husat i bin kam lukim kongrigesen bilong mipela long dispela taim, Papa i senisim tingting bilong em. Em i orait tu long ol i mekim wok long haus bilong mipela bilong mekim Baibel stadi long olgeta wik, na ol man long hap bilong mipela i laik harim tok ol i kam long dispela stadi.

Papamama i kisim baptais long Septemba 1938. Long Disemba 1941, taim mi gat 7-pela krismas, mi wantaim brata na susa bilong mi i kisim baptais long wanpela bikpela kibung i kamap long Hargreave Park long Sydney, New South Wales. Bihain long dispela, mi save autim tok oltaim wantaim papamama. Long dispela taim ol Witnes i save karim pikap i go long haus bilong ol man na pilaim ol tok bilong Baibel na bai man bilong haus i ken harim.

Wanpela Witnes mi save tingim yet em Bert Horton. Em i gat wanpela ka i gat spika antap long en. Long dispela taim mi yangpela mangi tasol na mi amamas tru long wok wantaim Bert. Olsem: Taim mipela i save pilaim ol tok bilong Baibel antap long wanpela liklik maunten, planti taim mipela i save lukim polis ka i kam. Wantu Bert bai pasim spika na mipela i lusim dispela hap na i go long narapela maunten i stap longwe liklik na pilaim narapela tok bilong Baibel. Bert na ol narapela strongpela brata husat i bin stap gut long Jehova i lainim mi long planti samting long pasin bilong bilip strong long Jehova na no ken pret.​​—Matyu 10:16.

Taim mi gat 12-pela krismas, mi yet i save autim tok bihain long skul i pinis. Long wanpela taim mi bungim wanpela famili nem bilong ol Adshead. Bihain, papamama wantaim ol etpela pikinini bilong ol na ol tumbuna pikinini i lainim tok i tru bilong Baibel. Mi tenkyu long Jehova long larim mi​—wanpela mangi nating​—long kamapim tok i tru bilong Baibel long dispela gutpela famili.​​—Matyu 21:16.

Ol Gutpela Wok Mi Mekim Taim Mi Yangpela

Taim mi gat 18 krismas, mi mekim wok painia oltaim na ol i salim mi i go long Maitland, New South Wales. Long 1956, ol i singautim mi long kam wok long brens ofis bilong Australia, long Sydney. Namel long ol 20 bratasista i wok, inap olsem 6-pela ol i bilong lain Kristen God i bin makim na ol i wet long mekim wok king wantaim Krais long heven. Em i wanpela gutpela samting tru long wok wantaim ol!​​—Luk 12:32; KTH 1:6; 5:10.

Laik bilong mi long stap singel i pinis nating taim mi bungim Judy Helberg, wanpela naispela painia sista ol i bin singautim i kam long brens ofis olsem volantia bilong helpim mi long mekim wanpela bikpela wok bilong kibung. Mitupela i laikim tru narapela narapela na bihain long tupela yia mipela i marit. Bihain tasol mipela i kirap mekim wok sekit we mipela i go lukim wanpela kongrigesen bilong ol Witnes Bilong Jehova long olgeta wan wan wik bilong strongim ol bratasista.

Long 1960, Judy i karim namba wan pikinini meri bilong mipela, Kim. Long nau sapos wasman sekit na meri bilong em i gat pikinini, ol i mas lusim wok sekit na lukautim famili bilong ol. Tasol mipela i kirap nogut tru taim ol i singautim mipela long mekim yet wok bilong raun na lukim ol kongrigesen. Bihain long mipela i beten planti, mipela i orait long mekim dispela wok na insait long 7-pela mun, Kim i raun olsem 13,000 kilomita wantaim mipela long ol bas, balus na tren long ol kongrigesen i stap longwe long Queensland na Northern Territory. Mipela i no gat ka long dispela taim.

Mipela i save stap long haus bilong ol bratasista. Long ol dispela hap, san i save hat tru, olsem na ol rum slip i gat ol hap laplap i stap olsem dua. Dispela i mekim na mipela i save tingting planti taim Kim i krai long nait. Wok bilong lukautim bebi na mekim wok sekit wantaim i gat bikpela hatwok tumas. Olsem na mipela i go sindaun long Brisbane, na mi kirap mekim wok bilong raitim ol sain bilong ol stua samting. Taim Kim i gat tupela krismas, mipela i gat narapela pikinini meri, nem bilong em Petina.

Karim Hevi

Long 1972, Judy i dai long sik Hodgkin’s taim tupela pikinini meri i gat 12-pela na 10-pela krismas. Mipela famili i hatwok long karim dispela hevi. Tasol long taim Judy i sik na bihain long dai bilong em tu, Jehova i strongim mipela tru long rot bilong tok bilong em, holi spirit na ol lain bratasista. Mipela i kisim strong tu long rot bilong nius Wastaua mipela i bin kisim bihain tasol long hevi i kamap. Wanpela stori bilong dispela Wastaua i toktok long pasin bilong karim hevi, olsem taim wanpela long famili i dai, na olsem wanem ol hevi inap helpim yumi long kisim ol pasin God i laikim, olsem pasin bilong sanap strong na karim hevi, bilip, na stap gut long God.b​​—Jems 1:​2-4.

Bihain long dai bilong Judy, mi wantaim ol pikinini meri i pas gut wantaim. Tasol mi mas tokaut olsem, em i hatwok long mekim gut wok bilong papa na mama wantaim. Tasol tupela gutpela pikinini meri bilong mi i save mekim wok i kamap isi moa.

Marit Gen na Famili i Go Bikpela

Bihain, mi marit gen. Planti samting bilong mi na nupela meri bilong mi, Mary, i wankain. Poroman marit bilong em tu i dai long sik Hodgkin’s. Na tu, em i gat tupela pikinini meri nem bilong ol Colleen na Jennifer. Krismas bilong Colleen i aninit long Petina inap 3-pela yia. Olsem na nau mipela i gat fopela pikinini meri em krismas bilong ol i olsem, 14, 12, 9 na 7.

Mi na Mary i pasim tok olsem mipela bai skulim ol pikinini bilong mipela yet inap long ol pikinini i orait long kisim tok long nupela papamama. Long i stap bilong mipela olsem man na meri marit, mipela i kamapim tupela bikpela lo. Namba wan, mipela i no save kamapim bel hevi bilong mipela long ai bilong ol pikinini. Namba tu, mipela i bihainim stiatok bilong Baibel long Efesus 4:​26, mipela i toktok inap long mipela i stretim hevi​​—maski planti aua i lus long mekim olsem.

Mary na ol pikinini bilong em na mi wantaim ol pikinini bilong mi i wok gut wantaim olsem wanpela famili, tasol dispela i no pinisim wantu bel hevi bilong mipela long poroman marit i dai. Olsem: Mary i save krai long olgeta Mande nait. Bihain long famili stadi taim ol pikinini meri i go slip pinis, Mary i save kamapim olgeta bel hevi na wari bilong em.

Mary i laik bai mipela i gat pikinini bilong mipela yet. Sori tru, namba wan pikinini bilong mipela i lus long bel. Taim Mary i gat bel gen, mipela i kirap nogut long wanpela samting. Taim ol i sekim bel bilong em, ol i luksave olsem i no gat wanpela bebi tasol​—i gat fopela bebi i stap! Man, mi kirap nogut tru long dispela. Nau mi gat 47 krismas na mi bai kamap papa bilong etpela pikinini! Mary i karim fopela pikinini long rot bilong wanpela operesen long Februeri 14, 1982, long taim em i gat bel inap etpela mun tasol. Clint i kamap pastaim, em i gat 1.6 kilogram, bihain Cindy em i gat 1.9 kilogram, na Jeremy i gat 1.4 kilogram na laspela em Danette em i gat 1.7 kilogram. No gat wanpela i luk wankain long narapela.

Bihain tasol long ol pikinini i kamap, dokta bilong Mary i kam sindaun wantaim mi na i askim mi olsem:

“Yu wari long olsem wanem yu bai lukautim ol pikinini?”

Mi tok, “Yes, long wanem, kain samting olsem i no bin painim mi bipo.”

Mi kirap nogut long ol tok em i mekim bihain na dispela tok i strongim mi.

Em i tok: “Kongrigesen bilong yupela bai i no inap lusim yupela, taim yupela i tokaut tasol long wanpela liklik hevi bilong yupela, wantu planti bai i redi long helpim yupela.”

Dispela dokta na ol lain i wok wantaim em i mekim gut wok bilong ol, olsem na insait long 2-pela mun tasol 4-pela bebi inap lusim haus sik na kam long haus.

Hatwok Bilong Mekim Bikpela Long Fopela Pikinini

Bilong olgeta samting i ken ron gut, mitupela Mary i wokim wanpela sediul bilong ol samting mipela bai mekim insait long olgeta wan wan de. Ol fopela bikpela pikinini meri i mekim bikpela wok tu bilong helpim na lukautim ol bebi. Na tok bilong dokta i kamap tru​​—taim mipela i laikim liklik helpim tasol, kongrigesen i amamas long mekim ol samting bilong helpim mipela. Paslain liklik long Mary i karim ol bebi, wanpela pren bilong mi, em John MacArthur i stretim rot na ol brata i gat save long wokim haus i surikim haus bilong mipela i go bikpela. Taim ol bebi i kam long haus wanpela lain sista i helpim long lukautim ol. Dispela olgeta gutpela pasin i kamapim long ples klia pasin laikim Kristen bilong ol bratasista.​​—1 Jon 3:​18.

Long dispela rot ol fopela pikinini i kamap olsem “ol bebi bilong kongrigesen.” I kam inap long nau, ol dispela fopela pikinini i save lukim ol planti gutpela bratasista long kongrigesen husat i bin helpim mipela long lukautim ol olsem ol famili tru bilong ol. Na Mary i bin kamapim klia tru olsem, em wanpela gutpela mama na meri marit husat i daunim laik bilong em yet bilong lukautim ol pikinini. Em i bihainim ol tok em i lainim long Baibel na long oganaisesen. Dispela em i nambawan gutpela tok!​​—Song 1:​2, 3; Matyu 24:45.

Ol miting Kristen na wok autim tok i stap yet olsem bikpela samting mipela i mekim long olgeta wik, maski i gat hatwok long mekim olsem wantaim fopela bebi. Wanpela blesing long dispela taim em mipela i save stadi long Baibel wantaim tupela narapela narapela marit. Ol i save tingim mipela na kam long haus bilong mipela long stadi. Maski dispela i mekim isi long mipela, sampela taim Mary i taiet na i slip namel long stadi na bebi em i holim em tu i slip. I no longtaim na fopela olgeta i kamap ol brata na sista bilong yumi.

Skulim Ol Long Baibel Taim Ol i Liklik Yet

Paslain long ol bebi i kirap long wokabaut, mi wantaim Mary na ol bikpela pikinini meri i save kisim ol i go autim tok. Taim ol i lain long wokabaut, mi na Mary i save kisim tupela tupela na go autim tok wantaim na ol i no givim hevi tumas. Planti taim ol i opim rot long mipela inap toktok gut wantaim ol gutpela man bilong haus. Wanpela taim mi bungim wanpela man bilong haus husat i save bilip long ol mak bilong ol sta. Em i tok pikinini i bon long wanem de bilong mun, dispela bai makim pasin na tingting em bai bihainim. Mi no tok resis wantaim em, tasol mi askim em long mi inap kam bek bihain liklik na lukim em. Em i tok orait, olsem na mi kam bek wantaim fopela pikinini. Em i kirap nogut na lukluk i stap taim mi putim ol long lain long husat i kamap pastaim na husat i kamap bihain. Mipela i stori gut wantaim long ol pikinini i no luk wankain na pasin bilong ol tu i no wankain. Dispela i narapela kain long samting em i bilip long en, na em i tok, “Fani stret long mi kamapim dispela bilip long yu, ating mi mas mekim sampela wok painimaut moa.”

Taim fopela pikinini i liklik yet, ol i no laik mipela i stretim ol wantaim taim ol i bikhet, olsem na mipela i mas stretim olgeta wan wan. Long dispela rot ol i luksave olsem lo mipela i putim i bilong olgeta. Taim ol traim long skul i traim maus bilong bel bilong ol, ol i save sanap strong long bihainim ol stiatok bilong Baibel na narapela i sapotim narapela na Cindy i stap mausmeri bilong ol. Ol man i luksave olsem taim ol fopela pikinini i mekim samting wantaim ol i gat bikpela strong.

Mi na Mary i gat bikpela wok long helpim ol pikinini long stap gut long Jehova taim ol i gat 13 i go inap 19 krismas samting. Long rot bilong helpim mipela i kisim long kongrigesen na planti gutpela kaikai bilong spirit mipela i kisim long oganaisesen bilong Jehova, mipela inap mekim wok bilong mipela. Mipela i wok strong long mekim famili Baibel stadi long olgeta taim na toktok gut wantaim, maski sampela taim i gat hatwok long mekim olsem. Tasol olgeta hatwok mipela mekim i no lus nating, long wanem, olgeta etpela pikinini i makim rot bilong mekim wok bilong Jehova.

Karim Hevi Bilong i Go Lapun

Long ol yia i go pinis mi kisim bikpela amamas long ol gutpela wok bilong spirit mi holim olsem elda long kongrigesen, wasman bilong biktaun, na helpim bilong wasman sekit. Mi bin insait tu long lain Hospital Lieson Komiti, wok bilong ol em long helpim ol dokta long wok gut wantaim ol sikman Witnes taim tok i kamap long pasin bilong kisim blut. Gavman i givim namba long mi long wokim ol marit na insait long 34 yia mi wokim 350 marit. Mi mekim tu marit bilong 6-pela pikinini meri bilong mi.

Oltaim mi tenkyu long Jehova long sapot mi kisim, pastaim long Judy na nau long Mary. (Sindaun 31:​10, 30) Ol i sapotim mi taim mi mekim wok elda long kongrigesen, na tu, ol i stap gutpela piksa tru long wok autim tok na long skulim ol pikinini long ol pasin God i laikim.

Long 1996, mi kisim wanpela sik long kru na dispela i mekim na ol lek na han bilong mi i guria na mi no inap sanap stret. Dispela i mekim na mi no inap mekim wok moa long raitim ol sain bilong stua samting. Tasol mi amamas yet long mekim wok bilong Jehova, maski mi no inap mekim bikpela wok olsem bipo. Wanpela gutpela samting i olsem, mi bin kisim pasin bilong pilim hevi bilong ol narapela lapun.

Taim mi tingting i go bek long i stap bilong mi, mi tenkyu tru long Jehova long helpim mi na famili bilong mi long karim hevi na stap amamas yet. (Aisaia 41:10) Mi na Mary wantaim ol etpela pikinini i amamas tru long ol gutpela brata na sista bilong mipela long kongrigesen long helpim mipela. Ol i bin kamapim tru pasin laikim bilong ol long planti rot tru.​​—Jon 13:​34, 35.

[Ol Futnot]

[Piksa long pes 12]

Mi wantaim Mama, bikpela brata Garth na susa bilong mi Dawn, mipela i redi long go long kibung long Sydney long 1941

[Piksa long pes 13]

Mi wantaim Judy na bebi Kim taim mi mekim wok sekit long Queensland

[Piksa long pes 15]

Bihain long Mary i karim fopela pikinini, fopela bikpela pikinini meri na kongrigesen i helpim mipela