Bilong Wanem Yumi No Ken Strong Tumas Long Mekim Ol Samting?

JEHOVA em Man i save mekim ol samting long skel stret. Ol wok bilong em i stret olgeta, na em i no save mekim hatpela kot long ol man, long wanem, em i mekim wantaim pasin marimari. (Lo 32:4) Pasin laikim bilong em i no save paul, long wanem, em i mekim long pasin i stret wantaim ol lo i nambawan olgeta. (Song 89:14; 103:​13, 14) God i bin wokim tupela tumbuna bilong pastaim i nambawan tru long olgeta samting. Ol i no strong tumas long mekim ol samting na kalapim mak. Tasol taim sin i kamap, em nau, ol i “manmeri bilong mekim sin tasol,” olsem na ol i no inap mekim olgeta samting long stretpela tingting.​—Lo 32:5.

Yumi ken tok piksa olsem: Yu bin sindaun long ka o baiskol na hap taia i solap na i gat bikpela buk long en? Taim ka o baiskol i ran, yu no sindaun gut, a? Na tu, yu inap kisim bagarap long en. Yu mas stretim gut kain taia olsem, nogut buk i solap moa yet o taia i slek olgeta. Na olsem tasol, pasin bilong yumi i gat sin long en, olsem buk long taia, na yumi save mekim kranki sampela samting. Sapos yumi larim dispela “buk” i stap na i go bikpela, i stap bilong yumi bai i gat hatwok, na yumi inap painim taim nogut.

Sampela taim ol gutpela pasin bilong yumi tu, em yumi strong tumas long mekim. Olsem: Lo Bilong Moses i tok ol Israel i mas pasim ol longpela tret olsem string long arere bilong longpela klos bilong ol. Tasol ol Farisi long taim bilong Jisas ol i laik i stap narapela kain long ol man nating, olsem na ol i “pasim ol longpela hap string long arere bilong longpela klos bilong ol” i go longpela tru. Ol i laik luk olsem ol i holi tru, winim ol narapela man.​—Matyu 23:5; Namba 15:​38-​40.

Long nau sampela i save traim olgeta kain samting bilong pulim ai bilong ol man, na sampela taim ol man i kirap nogut tru long en. I olsem ol i laik singaut olsem: “Yupela lukim mi! Mi tu mi wanpela man!” Tasol sapos Kristen i strong long putim ol narapela kain bilas o bihainim narapela kain tingting na pasin, dispela bai i no inapim em long i stap bel isi.

Stretpela Tingting Long Wok

Maski yumi husat na yumi sindaun we, sapos yumi mekim gutpela wok bai yumi pilim olsem i stap bilong yumi i gat as bilong en. God i bin wokim yumi bambai yumi ken painim amamas long mekim kain wok olsem. (Stat 2:15) Olsem na Baibel i no orait liklik long pasin bilong les. Aposel Pol i tokaut strong: “Sapos man i no laik mekim wok, orait em i no ken kisim kaikai.” (2 Tesalonaika 3:10) Tru tumas, man i les long wok, ating em bai kamap rabisman na em i no ken amamas long i stap bilong em, na tu, God i no ken orait long em.

Tasol planti man i save strong tumas long mekim wok. Long laik bilong ol yet ol i wok long olgeta taim na i olsem ol i kalabus olgeta long en. Ol i lusim haus long bikmoning yet na kam bek long bihaintaim tru. Ating ol bai tok wok bilong ol i save helpim gut famili. Tasol famili bilong ol inap kisim nogut long pasin bilong ol long wok oltaim. Wanpela meri em man bilong em i save wok ovataim planti taim, em i tok: “Mi bai amamas long lusim olgeta gutpela samting i stap long haus bambai man bilong mi i ken i stap wantaim mi na ol pikinini.” Ol man husat long laik bilong ol yet i save wok oltaim, ol i mas tingim gut samting i bin painim King Solomon, em i tok: “Bihain mi tingting gut long ol dispela samting mi bin mekim long hatwok bilong mi, na mi pilim olsem, olgeta dispela samting i olsem samting nating tasol na i no inap long helpim mi liklik. I olsem man i ran i go bilong holimpas win.”​—Saveman 2:11.

Tru tumas, long ol samting bilong wok yumi mas bihainim stretpela tingting. Yumi ken wok strong, tasol sapos yumi kalabus olgeta long wok, amamas bilong yumi bai pinis, na yumi inap lus long planti samting moa.​—Saveman 4:​5, 6.

Stretpela Tingting Long Amamas

Baibel i tok profet long taim bilong yumi olsem: “Ol man bai i . . . laikim tumas ol kain kain pasin bilong amamas bilong dispela graun, na ol bai i no laikim God.” (2 Timoti 3:​2, 4) Pasin bilong givim bel long painim amamas em i wanpela strongpela tul bilong Satan long pulim ol manmeri long lusim God. Long nau planti man i strong long insait long sampela kain amamas na spot ol inap kisim bagarap long en. Na oltaim ol i wok long traim ol nupela kain spot na amamas olsem, na planti manmeri moa i go insait long en. Bilong wanem ol i laikim? Long wanem, planti ol i no amamas long i stap bilong ol, na ol i laik painim ol amamas i kirapim moa yet bel bilong ol. Tasol bilong kisim yet ol dispela kain amamas, ol i mas mekim ol samting ol inap long kisim bagarap long en. Ol Kristen i gat stretpela tingting ol i save abrusim ol kain spot ol inap kisim bagarap long en, long wanem, ol i tingim laip ol i bin kisim olsem presen na ol i tingim Man i bin givim dispela laip long ol.​—Song 36:9.

Taim God i wokim namba wan man na meri, em i putim tupela we? Long gaden Iden, mining bilong nem Iden i olsem “Amamas.” (Stat 2:8) Em nau, yumi save em laik bilong Jehova long ol manmeri i ken stap amamas.

Jisas i stap gutpela piksa long pasin bilong bihainim stretpela tingting long ol amamas. Em i bin givim bel olgeta long mekim laik bilong Jehova, na i no gat wanpela taim em i bin lusim ol lo na stiatok bilong God. Maski skin bilong em i les, em i lusim haptaim bilong em long helpim ol man. (Matyu 14:​13, 14) Taim ol i singautim em i go long kaikai, em i save go, na em i makim hap taim bilong malolo na kisim nupela strong. Tru, em i save sampela birua i laik sutim tok long em long ol dispela samting. Ol i tok long em: “Lukim, em i man bilong kaikai planti tumas, na em i man bilong dring planti wain tumas.” (Luk 7:34; 10:38; 11:37) Tasol Jisas i no ting, bilong givim bel olgeta long God em i no ken kisim liklik amamas long i stap bilong em.

I klia tru, yumi gat gutpela tingting sapos yumi abrusim pasin bilong mekim save tru long painim olkain amamas. Sapos yumi putim amamas i stap olsem nambawan samting bilong yumi, bai yumi no i stap amamas tru tru. Ating bai yumi lusim ol samting i bikpela samting moa, na pasin bilong pas gut wantaim God. Tasol i no olsem yumi no ken kisim liklik amamas o yumi sutim tok long ol narapela i save painim liklik amamas inap long skel.​—Saveman 2:24; 3:​1-4.

Mekim Ol Samting Long Skel

Disaipel Jems i tok: “Planti taim yumi save . . . popaia.” (Jems 3:2) Ating yumi save mekim olsem taim yumi traim long mekim ol samting long skel. Wanem samting inap helpim yumi long bihainim stretpela tingting long mekim ol samting? Yumi mas luksave long ol pasin bilong yumi i gutpela na ol pasin i no gutpela tumas. Tru, i hatwok long mekim olsem. Isi isi yumi inap lusim pasin bilong mekim ol samting long stretpela tingting na yumi no save. Olsem na yumi bihainim savetingting sapos yumi stap klostu long ol strongpela Kristen na putim yau long ol gutpela tok ol i givim long yumi. (Galesia 6:1) Na yumi ken askim wanpela pren yumi inap bilip tru long em o wanpela elda bilong kongrigesen long givim sampela tok long yumi. Ol dispela tok em Baibel i as bilong en, wantaim ol tok bilong Baibel stret, ol inap i stap olsem “glas” bilong lukluk na bai yumi ken save, yumi luk olsem wanem long ai bilong Jehova.​—Jems 1:​22-​25.

Tasol gutpela tru, yumi no ken bel hevi na ting oltaim bai yumi mekim pasin i kranki na yumi no inap abrusim. Sapos yumi wok strong, na Jehova i helpim yumi, yumi inap kisim pasin bilong mekim ol samting long stretpela tingting na long skel, na bai yumi ken i stap amamas. Ating bai yumi pas gut moa wantaim ol bratasista Kristen, na yumi stap olsem gutpela piksa long ol man yumi autim tok long ol. Na bikpela samting moa, em yumi bai bihainim gut ol pasin bilong gutpela God bilong yumi, Jehova, em i save bihainim stretpela tingting olgeta long mekim ol samting.​—Efesus 5:1.

[Piksa Kredit Lain long pes 28]

©Greg Epperson/age fotostock