Pasin Nogut—Yu Ting Em i Go Bikpela Moa?
Wanpela liklik mangi i holim wanpela samting i stap long graun—em wanpela liklik bom—na em i pairap na bagarapim tru skin na ai bilong em na em i kamap aipas. Wanpela mama i karim bebi nau tasol, em i lusim dispela bebi insait long ol pipia. Wanpela man ol i rausim em long wok, em i go bek long ples wok bilong em na sutim long gan olgeta man em i lukim na bihain em i kilim i dai em yet. Wanpela man i gat biknem i mekim pasin sem long ol liklik pikinini.
SORI tru, ol stori bilong ol kain pasin nogut olsem i save kamap planti taim. Na samting i nogut moa, em ol ripot i stori long pasin bilong pait na kilim i dai wanpela lain olgeta na pasin teroris. Wanpela stori long niuspepa long 1995 i tok: “Yumi ken tok dispela taim nau i olsem taim bilong Satan. Long nau, winim olgeta taim bipo, ol man i gat bikpela save na strongpela laik long kilim i dai planti milion man, em ol i gat narapela skin o lotu o sindaun.”
Long wankain taim, ol man i wok long bagarapim win na graun, pinisim wel na diwai samting, na kilim i dai planti animal na ol inap pinis olgeta. Olsem wanem? Yu ting ol man inap daunim dispela olgeta pasin nogut na mekim dispela graun i kamap gutpela ples na ol man i no pret moa? O yu ting taim ol man i traim long daunim ol pasin nogut, i kain olsem man i yusim brum long pasim solwara long i kam bruk long nambis? Wanpela profesa i bin raitim planti buk long samting bilong pasin nogut, em i tok: “Mi bin i gat strongpela laik tru long kamapim bikpela senis long dispela graun, olsem mekim dispela graun i kamap gutpela ples. Tasol ol samting i no wok long kamap gutpela.” Ating yu tu i gat wankain tingting.
Pasin bilong dispela graun i wok long i go nogut moa, wankain olsem wanpela sip i raun long solwara i wok long kamap raf moa. I no gat wanpela long sip i laik go long hap we solwara i raf nogut tru, tasol ol i no inap senisim rot bilong ol maski ol i traim strong tru. Dispela sip i raun i go yet long solwara i raf tru na em i no inap stop.
Ol man i gat sin na dispela tu i as na pasin nogut i go bikpela. (Rom 3:23) Pasin nogut i go nogut moa, na i kamap long olgeta hap, na long olgeta taim, olsem na yumi no ken ting ol man tasol i as bilong dispela pasin nogut. Olsem wanem? I gat wanpela samting i wok long stiaim ol man olsem wanpela strongpela spirit ol man i no inap lukim? Sapos olsem, em wanem samting? Olsem wanem yumi ken lukautim yumi yet long en? Stori i kamap bihain long dispela bai kamapim bekim bilong ol dispela askim.
[Piksa Kredit Lain long pes 3]
© Heldur Netocny/Panos Pictures