Laip Stori

Mi Kisim Pasin Bilong Bilip Strong Long Jehovas

Stori bilong Aubrey Baxter

Long wanpela Sarere apinun long 1940, tupela man i paitim mi nogut tru na mi pundaun long graun. Tupela plisman i sanap i stap klostu, tasol tupela i no helpim mi, tupela i bikmaus na tok nogut long mi na tupela i tok amamas long ol man i paitim mi. Faipela yia paslain long dispela, mi bin wok long wanpela main na ol samting mi mekim long dispela taim na i kam i mekim na ol i paitim mi. Orait bai mi stori.

MI NAMBA 3 pikinini man long famili, na mama i bin karim mi long 1913 long Swansea, em wanpela taun i stap arere long solwara long New South Wales, long Australia. Taim mi gat 5-pela krismas, olgeta long famili bilong mi i kisim bikpela sik kus bilong Spen. Dispela sik i kilim i dai planti milion manmeri long olgeta hap bilong graun. Tasol gutpela tru i no gat wanpela long famili bilong mipela i dai. Tasol long 1933, Mama i dai taim em i gat 47 krismas. Em i wanpela meri i save daun long God. Sampela yia paslain long dispela em i bin kisim 2-pela volium bilong buk Light, em tupela buk bilong stadi long Baibel em ol Witnes Bilong Jehova i bin tilim long ol man.

Long dispela taim mi wok long wanpela main. Sampela taim mi no gat planti wok, olsem na mi kisim ol dispela buk i go long wok na mi mekim wok long lait i stap long helmet bilong mi na mi save ritim ol dispela buk. I no longtaim na mi luksave olsem mi painim pinis tok i tru. Na tu, mi kirap harim ol tok bilong Baibel em ol Witnes i save mekim na i save kamap long redio. Mi amamas tru taim Papa na ol brata bilong mi i gat laik long save long tok i tru bilong Baibel.

Long 1935 hevi i painim famili bilong mipela gen, liklik brata bilong mi, Billy, i kisim sik numonia na em i dai. Em i gat 16 krismas tasol long dispela taim. Tasol long dispela taim bilip bilong kirap bek i mekim gut bel bilong mipela. (Aposel 24:15) Bihain, Papa na ol bikpela brata bilong mi, em Verner na Harold, na tupela meri bilong ol, olgeta i dediketim laip bilong ol long God. Long nau mi wanpela tasol long famili bilong mipela i stap laip yet. Tasol meri bilong Verner, em Marjorie, na meri bilong Harold, em Elizabeth, ol tu i stap laip yet na ol i givim bel yet long mekim wok bilong Jehova.

Mi Lain Long Bilip Strong Long Jehova

Namba wan taim mi toktok wantaim wanpela Witnes Bilong Jehova em long 1935 taim wanpela meri Yukren i raun long baiskol i kam long haus bilong mipela. Long Sande long wik bihain, em namba wan taim long mi go long miting Kristen, na wanpela wik bihain, mi bung wantaim grup bilong ol long autim tok. Witnes i lukautim bung bilong autim tok em i givim mi sampela buklet na mi kirap nogut taim em i salim mi yet i go long ol haus! Taim mi kamap long namba wan haus, mi pret nogut tru! Tasol man bilong haus em i gutpela man na em i orait long kisim buk na nius.

Mi pilim tru tok bilong ol skripsa olsem Saveman 12:1 na Matyu 28:​19, 20, na mi laik kamap wanpela painia, olsem man bilong autim tok fultaim. Papa i wanbel long tingting bilong mi. Maski mi no baptais yet, mi makim Julai 15, 1936 olsem de mi laik kirap mekim wok painia. Long dispela de mi makim, mi go long brens ofis bilong ol Witnes Bilong Jehova long Sydney. Ol i makim mi long wok wantaim 12-pela painia long Dulwich Hill long Sydney. Ol i skulim mi long mekim wok long wanpela masin i gat handel long en bilong holim na krungutim wit. Ol painia long dispela taim i save mekim wok long dispela masin bilong wokim plaua na bai ol i no ken tromoi bikpela mani tumas long baim kaikai.

Wok Painia Long Bus

Taim mi kisim baptais pinis long dispela yia, ol i makim mi long wok wantaim 2-pela painia​—em Aubrey Wills na Clive Shade​—long sentral Queensland. Ol samting mipela i gat, em ka bilong Aubrey, sampela baiskol, wanpela masin pikap bilong kamapim ol tok bilong Baibel, wanpela haus sel em i kamap haus bilong mipela long 3-pela yia, 3-pela bet, wanpela tebol, na wanpela sospen bilong kukim kaikai. Wanpela taim em taim bilong mi long kukim kaikai na mi tingting long redim wanpela naispela kaikai. Mi kukim kumu na wanpela kain kaikai ol i wokim long wit. Tasol mipela i no inap long kaikai. Wanpela hos i stap klostu, olsem na mi givim dispela kaikai long en. Em i smelim tasol na meknaisim het bilong en na i go! Dispela i mekim na mi no moa traim long kukim kaikai em mi no save kukim bipo.

Bihain, mipela i laik autim tok long planti hap bilong teritori bilong mipela, olsem na mipela i brukim teritori i go 3-pela hap, na mipela wan wan i lukautim wan wan hap. Long apinun, planti taim mi save stap longwe long haus sel bilong mipela, olsem na sampela taim mi save slip long haus bilong ol man long dispela hap mi autim tok long en. Wanpela taim mi slip long naispela bet long wanpela haus i stap long fam bilong ol bulmakau. Long neks nait, mi slip long plua bilong haus bilong wanpela man i save painim kengeru na kisim skin bilong ol. Skin bilong kengeru i pulap tru long haus na ol i smel nogut tru! Planti taim mi save slip long bus. Wanpela taim ol dingo (wel dok) i raunim hap mi stap long en na ol i wok long singaut long nait. Mi no slip gut long nait, tasol bihain mi painimaut olsem ol i no laik kaikai mi, ol i laik kaikai sampela pipia kaikai ol man i bin tromoi klostu long hap mi slip long en.

Mekim Wok Long Wanpela Ka i Gat Spika

Mipela i mekim gutpela wok long ka i gat spika long tokaut long Kingdom Bilong God. Long Townsville long not Queensland, ol polis i orait long mipela i ken i stap namel long taun na autim tok. Tasol tok i kamap long pikap i mekim na sampela lain bilong lotu Salvation Army ol i kros long mipela na tokim mipela long lusim dispela ples. Tasol mipela i no laik i go, olsem na 5-pela bilong ol i kam na seksekim ka. Long dispela taim mi stap insait long ka na mi wok long pilaim dispela pikap! Mipela i luksave olsem em i no savepasin long mipela i strong long i stap, olsem na taim ol dispela man i go, mipela i lusim dispela ples.

Long Bundaberg wanpela man i amamas long harim tok em i givim mipela wanpela bot bambai mipela i ken i stap long wara Burnett na pilaim tok bilong Baibel. Dispela wara i ron namel long taun. Aubrey na Clive i kisim pikap na i go long bot na mi stap long haus mipela i rentim. Long dispela nait, ol man inap harim toktok bilong Joseph F. Rutherford husat i stap long hetkota bilong Ol Witnes Bilong Jehova. Em i kamapim wanpela strongpela tok bilong Baibel. Long dispela taim bipo, em wanpela taim we lain bilong God i mas strongim bel na no ken pret.

Woa i Kamapim Planti Hevi

Bihain liklik long Wol Woa 2 i kirap long Septemba 1939, The Watchtower bilong Novemba 1 i stori long as na Kristen i no inap insait long wok politik na woa. Bihain, dispela tok bilong Wastaua i helpim mi. Mi, na Aubrey, na Clive i wok wantaim inap 3-pela yia, na bihain ol i makim mipela long i go long narapela narapela hap bilong mekim wok autim tok. Ol i makim mi long mekim wok wasman raun long not Queensland, em wanpela wok bai traim tru bilip bilong mi long Jehova.

Long Ogas 1940, mi mekim wok long kongrigesen long Townsville, em dispela kongrigesen i gat 4-pela painia​—Percy na Ilma Iszlaub,a na Norman Bellotti na susa bilong em Beatrice. Sikspela yia bihain, Beatrice bai kamap meri bilong mi. Long wanpela Sarere apinun bihain long sampela bilong mipela i pinis long autim tok long rot, dispela samting mi bin stori long kirap bilong stori i painim mi. Tasol dispela samting i strongim mi long mekim yet wok bilong Jehova.

Tupela painia sista, em Una na Merle Kilpatrick, ol i givim bel tru long autim tok long hap not. Mi stap wantaim tupela wanpela de na autim tok wantaim ol, na bihain tupela i tokim mi long kisim tupela i go lukim wanpela famili i gat laik long harim tok em ol i stap long hapsait bilong wanpela wara. Bilong mekim olsem, mi mas swim i go long hapsait bilong wara na kisim wanpela kanu na pul i go bek na kisim dispela tupela sista. Tasol taim mi swim i go kamap long kanu, i no gat pul long kanu! Bihain mipela i harim olsem wanpela man i birua long mipela em i bin haitim ol pul bilong kanu. Tasol dispela samting i no pasim mipela. Mi save gut long swim, olsem na mi taitim rop bilong anka long bel bilong mi, na pulim kanu i go long tupela sista na kisim tupela i go bek gen long hapsait bilong wara. Jehova i blesim hatwok bilong mipela, bihain dispela famili i kamap Witnes.

Jehova i Lukautim Mi

Ol ami i wokim rotblok klostu long taun Innisfail. Atres bilong mi i bilong Innisfail, olsem na mi inap kisim pepa i tok orait long mi ken i go long Innisfail. Dispela i gutpela, long wanem, mi inap kisim ol brata i kam long brens ofis bilong ol Witnes Bilong Jehova i go lukim ol bratasista. Paslain long mipela i kamap long rotblok, mi save haitim ol insait long wanpela spes i stap aninit long sia bilong ka long baksait.

Bensin tru tru i sot long dispela taim, olsem na planti ka i gat wanpela masin bilong putim sakol na kukim olsem paiawut na mekim wok long en olsem bensin bilong ol ka. Mi save raun long nait na mi save karim ol bek i pulap long sakol na putim ol antap long ples em ol brata i hait long en. Taim mi kamap long wanpela rotblok mi save larim ensin bilong ka i wok yet na bai dispela masin bilong kukim sakol inap hat i stap. Mi save mekim olsem na bai ol gad i no ken sekim gut ka. Mi save tokim ol: “Sapos mi kilim ensin bilong ka, bai i hatwok long kirapim gen ka.” Ol gad i les long hat bilong ka, na doti na krai bilong en, olsem na ol i sekim ka kwik na larim mi i go.

Long dispela taim bipo, ol i makim mi long stretim rot bilong mekim wanpela kibung long Townsville. Kaikai i sot long dispela taim, na bilong kisim ol kaikai mipela i mas i gat, mipela i mas kisim tok orait long majistret. Long dispela taim, ol i putim ol brata Kristen bilong mipela long kalabus, long wanem, ol i no laik insait long ami. Olsem na taim mi stretim tok bilong i go lukim majistret, mi tingting long mi yet olsem, ‘Mi bihainim savepasin o mi skrapim bel bilong em?’ Maski mi gat tupela tingting, mi go lukim majistret.

Em i sindaun klostu long wanpela bikpela tebol, na em i tokim mi long sindaun. Taim mi tokim em long as na mi kam lukim em, pes bilong em i senis na em i lukluk strong long mi. Bihain em i stap isi na i tok, “Yu laikim hamas kaikai?” Mi givim em pepa i gat lista bilong hamas kaikai mipela i laikim. Em i skelim pepa pinis na i tok: “Dispela i no inap. Yumi mas givim sampela kaikai moa.” Mi lusim ofis bilong em, na mi tenkyu tru long Jehova, em i skulim mi gen long pasin bilong bilip strong long em.

Long Janueri 1941 ol i putim tambu long wok bilong ol Witnes Bilong Jehova long Australia. Planti man i gat tupela tingting long mipela na sampela i sutim tok long mipela olsem mipela i man bilong lukstil bilong helpim ol Japan! Wanpela taim, tupela ka i pulap long ol polis na ol soldia ol i kam long Kingdom Farm, em wanpela hap graun long Atherton Plateau em mipela i bin baim bilong planim kaikai. Ol i kam painim wanpela spot lait em ol i tok mipela i mekim wok long en bilong salim tok long ol birua. Ol i sutim tok long mipela tu olsem mipela i planim kon long pasin we i kamapim wanpela tok hait em ol birua inap lukim taim ol i flai long balus! Tasol ol dispela tok i no tru.

I gat tambu long wok bilong mipela, olsem na mipela i mas was gut​—mipela i mas tingim sampela rot mipela i ken bihainim taim mipela i bringim ol buk na nius. Olsem: Taim ol i wokim buk Children, mi kisim wanpela boks bilong dispela buk long Brisbane, na mi raun long tren i go long hap not, na mi lusim ol buk long ol wan wan hap we bas i save stop na i gat kongrigesen long dispela ples. Bilong mekim na bai ol polis na ami i no ken sekim dispela boks, mi save pasim wanpela so antap long boks. Maski em liklik samting mi mekim, dispela i save pasim ol polis na ami long sekim boks. Long Jun 1943, lain bilong Jehova i amamas tru, taim ol i rausim tambu long wok bilong ol Witnes. Wanpela jas i tok dispela tambu em samting “ol i bin putim nating na ol i no bin skelim gut na i bin givim bikpela hevi long ol man.”

Ol i Singautim Mi Long Insait Long Ami

Long yia bihain, ol i singautim mi na Aubrey Wills, na Norman Bellotti, long insait long ami. Ol i singautim Aubrey na Norman i go wanpela wik paslain long mi na ol i makim tupela long kalabus inap 6-pela mun. Long dispela taim, ol pos ofis i wok long kisim ol nius Wastaua i kam long atres bilong ol Witnes tasol ol i no kisim bilong ol narapela i no Witnes. Wok bilong mipela em bilong painim wanpela bilong ol dispela lain i kisim nius Wastaua, na wokim kopi long en na givim long ol wanbilip Witnes. Long dispela rot, mipela i kisim kaikai bilong spirit long olgeta taim.

Taim ol i makim mi long kalabus 6-pela mun, mi bihainim tok bilong brens ofis long Sydney na kwiktaim mi apil long kot. Mipela i mekim olsem na bai i gat taim long mipela i ken painim narapela long mekim wok mi mekim. Mi mekim wok long haptaim mi gat bilong i go lukim 21 Witnes em ol i stap long kalabus long not Queensland. Planti bilong ol brata i stap long wanpela haus kalabus, na bosman bilong haus kalabus i no laikim tru mipela. Taim mi tokim em olsem ol pasto bilong ol narapela lotu inap i go lukim ol lain bilong ol, em i belhat stret. Em i bikmaus na i tok, “Sapos mi gat namba, mi bai bungim olgeta Witnes na sutim ol long gan!” Kwiktaim ol gad i kisim mi i go ausait.

Long taim bilong mi long kot, ol i bihainim lo na makim wanpela loya bilong mi. Tasol taim kot i kamap, mi yet i mekim dispela wok olsem loya, na bilong mekim olsem, mi mas bilip strong long Jehova. Em i helpim mi. (Luk 12:​11, 12; Filipai 4:​6, 7) Mi kirap nogut tru olsem mi winim kot. Mi winim kot, long wanem, kuskus i bin mekim sampela popaia long pepa bilong mi long kot.

Long 1944, ol i makim mi long lukautim wanpela bikpela sekit, em South Australia, hap not bilong Victoria, na Sydney long New South Wales. Long yia bihain, ol i stretim rot bilong wanpela pablik tok i ken kamap long olgeta hap bilong graun. Olgeta wan wan man bilong mekim dispela tok ol i gat wanpela pes autlain, tasol ol yet i mas redim ol tok. I hatwok long mekim wanpela tok inap wanpela aua, tasol mipela i bilip strong long Jehova na em i blesim hatwok bilong mipela.

Marit na Ol Nupela Wok

Long Julai 1946, mitupela Beatrice Bellotti i marit na mipela i mekim wok painia wantaim. Haus bilong mipela em wanpela haus ka. Pikinini meri bilong mipela, em Jannyce (Jann) i kamap long Disemba 1950. Em wanpela pikinini tasol mipela i gat. Mipela i mekim wok painia long narapela narapela ples, wanpela taun em Kempsey, long New South Wales, em hap we i no gat ol Witnes. Long olgeta Sande mipela i save go long wanpela haus bung, na mi save redi long mekim wanpela pablik tok​—mipela i save givim ol liklik pepa bilong singautim ol man i kam harim dispela tok. Inap sampela mun, Beatrice na bebi Jann tupela tasol i save harim tok bilong mi. Tasol bihain, isi isi wan wan i wok long i kam. Long nau Kempsey i gat tupela kongrigesen.

Taim Jann i gat 2-pela krismas, mipela i sindaun long Brisbane. Taim Jann i pinis long skul, mipela i mekim wok painia wantaim inap 4-pela yia long New South Wales long taun Cessnock na bihain mipela i go bek long Brisbane bilong helpim mama bilong Beatrice em i sik. Long nau, mi mekim wok elda long Chermside Kongrigesen.

Mitupela Beatrice i tok tenkyu long Jehova i givim mipela planti blesing, na tu, long mipela inap helpim 32 manmeri long kisim save long em. Mi yet i tenkyu long Jehova long gutpela meri bilong mi, em i gat pasin isi, tasol em i strong long kamapim tok i tru bilong Baibel. Pasin bilong em long laikim God, na bilip long em, na ai bilong em i “gutpela,” olsem em i tingim ol samting bilong lotu, dispela ol samting i mekim em i wanpela gutpela meri marit na mama. (Matyu 6:​22, 23; Sindaun 12:4) Mitupela wantaim i wanbel long tok: “Man i bilip strong long mi, Bikpela, na i save mi tasol mi inap helpim em, orait bai mi mekim gut tru long dispela man.”​—Jeremaia 17:7.

[Futnot]

[Piksa long pes 9]

Mipela i yusim dispela ka i gat spika long north Queensland

[Piksa long pes 10]

Mi helpim Una na Merle Kilpatrick, em tupela susa long subim ka bilong tupela long taim bilong ren long not Queensland

[Piksa long pes 12]

Long de mitupela i marit