Yu Ting Olgeta Lain Inap i Stap Wanbel?

OLSEM WANEM? Klostu nau olgeta lain bai stap bel isi o bikpela hevi bai kamap? Ating ol man inap tok resis long dispela tupela tingting wantaim, a?

Sampela hetman bilong graun i tokaut strong olsem ol man inap kamapim bel isi long graun​—ating ol i tokaut olsem, long wanem, sapos ol man i no inap kamapim bel isi, ol samting nogut tru bai kamap. Tasol planti man i pret long ol askim olsem: Wanem ol kantri i gat ol bom samting em ol inap bagarapim planti man? Ol i tingting long yusim ol? Sapos ol i yusim ol, wanem samting bai kamap?

Ol samting ol man i bin mekim insait long planti tausen yia i soim olsem pasin birua na pasin bilong bel nogut long narapela lain i mekim na bel isi i no inap kamap. Na planti taim lotu i no daunim o pasim ol dispela pasin, nogat, ol i mekim ol samting na ol dispela pasin i go bikpela tru. Niusman James A. Haught i tok: “Olgeta samting i save brukim ol lain inap kirapim pasin birua, na lotu i bikpela samting tru long brukim ol lain. Planti manmeri i ting lotu i save mekim ol man i kamap ‘gutpela,’ tasol ol samting i kamap i soim ples klia olsem lotu i save kirapim sampela man long mekim ol pasin nogut tru.” Man bilong raitim ol buk, Steven Weinberg, i gat wankain tingting. Em i tok: “Lotu i save mekim na ol gutpela man i mekim ol pasin nogut.”

Olsem wanem? Yumi inap ting wanpela taim bai kamap we olgeta lain i stap wanbel? Yes, yumi inap ting olsem! Tasol olsem stori i kamap bihain long dispela i kamapim, i no ol man o ol lotu ol man i kamapim inap mekim na olgeta lain bai stap wanbel.

[Rait long pes 3]

Olsem wanem? Ol lain man i olsem wanpela bom i redi long pairap?