Yu Gat Wanpela Tisa i Save Skulim Yu Long God?

TAIM Usia i gat 16 krismas tasol, em i kamap king bilong lain Juda long hap saut. Em i mekim wok king winim 50 yia, kirap long 829 B.C.E. i go inap long 778 B.C.E. Kirap long taim em i yangpela yet, Usia “i mekim gutpela pasin long ai bilong Bikpela.” Wanem samting i kirapim em long bihainim stretpela pasin? Baibel i tok: “Taim Sekaraia i no dai yet, King Usia i gat strongpela tingting long bihainim laik bilong God, na em i mekim gutpela pasin long ai bilong Bikpela, . . . Taim Usia i strong yet long bihainim laik bilong God, orait God i helpim em na olgeta samting Usia i mekim, i kamap gutpela.”​—2 Stori 26:​1, 4, 5.

Yumi no save long planti stori bilong Sekaraia, man bilong givim gutpela tingting long king, yumi save tasol long dispela stori bilong em i stap long Baibel. Tasol Sekaraia “i skulim Usia long pasin bilong pret na stap aninit long God,” na long dispela rot Sekaraia i stap olsem gutpela tisa na i kirapim dispela yanpela king long bihainim stretpela pasin. Wanpela Baibel (The Expositor’s Bible) i tok long Sekaraia olsem em “wanpela man i save gut tru long ol tok bilong Baibel, na em i gat planti save long ol samting bilong lotu, na em inap skulim gut ol narapela man long save bilong em.” Na wanpela saveman bilong Baibel i stori long Sekaraia olsem: “Em i save gut long ol tok profet na . . . em i gat bikpela save, em man bilong lotu, na em i save wokabaut stret tasol; na i luk olsem em i skulim gut Usia.”

Pasin bilong Usia long stap gut long Jehova i mekim na em i kisim planti blesing, na “em i kamap strongpela king tru,” long wanem, “God i helpim em.” Em i kisim ol dispela gutpela samting long wok king bilong em, long wanem, em i gat strongpela tingting long bihainim laik bilong God long “taim Sekaraia i no dai yet.” (2 Stori 26:​6-8) Taim Usia i kamap strong na em i gat biknem, em i lusim ol samting em tisa bilong em Sekaraia i bin skulim em long en. Usia i hambak na “em i ting em i strongpela king tru, olsem na em i bagarap. Em i no bihainim tok bilong God.” Em i bikhet tru long God, olsem na em i kisim wanpela sik nogut tru. Dispela i mekim na em i no inap mekim moa olgeta wok bilong em olsem king.​—2 Stori 26:​16-​21.

Olsem wanem? Yu gat wanpela tisa husat i save skulim yu long “bihainim laik bilong God”? Yu inap i gat wanpela tisa olsem bilong skulim yu maski yu yangpela o lapun, o yu wanpela man o meri. Yu mas amamas long dispela kain tisa, long wanem, ol gutpela tok em i skulim yu long en inap helpim yu long wok yet long bihainim stretpela pasin long ai bilong Jehova. Putim gut yau long dispela strongpela Kristen na tingim gut ol tok em i skulim yu long en. Yu no ken givim baksait long tok bilong givim gutpela tingting i kam long dispela kain tisa i save skulim yu long “pasin bilong pret na aninit long God.”​​—Sindaun 1:5; 12:15; 19:20.