Askim

Sekaraia, em papa bilong Jon Bilong Baptais, i bin kamap mauspas, tasol tok bilong Luk 1:62 i makim olsem em i bin kamap yaupas tu o olsem wanem?

Sampela i bin tingim tok bilong Luk 1:62 na ol i ting olsem Sekaraia i bin kamap yaupas tu. Baibel i stori olsem: “Ol i laik givim nem Sekaraia long [pikinini], olsem nem bilong papa. Tasol mama bilong pikinini i tok, ‘Nogat. Yumi mas kolim nem bilong en Jon.’ Na ol i tokim em, ‘I no gat wanpela bilong ol wanlain bilong yupela i gat dispela nem.’ Na ol i mekim toktok long han, na ol i askim papa, em i laik givim wanem nem long pikinini. Em i tokim ol long bringim wanpela samting bilong em i ken raitim tok long en, na em i raitim tok olsem, ‘Nem bilong en Jon.’ ”​—⁠Luk 1: 59-63.

I no gat wanpela tok long dispela stori i tok stret olsem inap liklik taim Sekaraia i yaupas.

Paslain long dispela, ensel Gebriel i bin tokaut long Sekaraia olsem meri bilong em bai karim pikinini man, na ol i mas kolim nem bilong em Jon. Lapun Sekaraia i hatwok long bilipim dispela tok. Orait, ensel i tokim em: “Yu harim. Yu no bin bilipim tok bilong mi, olsem na nau maus bilong yu bai i pas na bai yu no inap toktok, inap long taim dispela olgeta samting i kamap pinis.” (Luk 1:​13, 18-20) Ensel i tok Sekaraia bai kamap mauspas; em i no tok Sekaraia bai kamap yaupas.

Stori i tok moa olsem: “Bihain em i kam ausait [long haus bilong God] na em i no inap mekim toktok long ol [manmeri i wet long em]. Olsem na ol i save, em i bin lukim narakain samting insait long haus bilong God. Em i mekim toktok long ol long han bilong en tasol. Na maus bilong en i pas i stap.” (Luk 1:22) Hap tok Grik ol i tanim olsem ‘maus i pas,’ em inap makim olsem maus i pas o yau i pas, o maus wantaim yau i pas. (Luk 7:22) Orait, olsem wanem long Sekaraia? Yumi mas tingim ol samting i bin kamap taim em i kamap orait gen. Baibel i tok: “Wantu tasol maus bilong Sekaraia i no pas moa, na em inap toktok gen. Orait na em i toktok, na i litimapim nem bilong God.” (Luk 1:64) Yumi tingim dispela tok na yumi ken save, maus tasol bilong Sekaraia i pas.

Orait, bilong wanem Baibel i tok ol man i bin “mekim toktok long han” na askim Sekaraia long nem bilong pikinini?

Kirap long taim ensel i bin tokaut long dispela pikinini, Sekaraia i no inap toktok, olsem na taim em i laik toktok wantaim ol man, em i mas “mekim toktok long han.” Taim em i lusim haus bilong God i kam ausait, em i bin mekim toktok long ol man “long han bilong en tasol.” (Luk 1:​21, 22) Bihain, taim em i “tokim” ol long kisim samting bilong em i ken raitim tok long en, yumi save em i bin mekim toktok long han. (Luk 1:63) Taim em i stap mauspas yet, em i save mekim toktok long han, olsem na ating ol narapela i kirap bihainim dispela pasin long taim ol i laik toktok wantaim em.

Tasol ating i gat narapela as na ol man i mekim toktok long em long han, olsem Luk 1:62 i stori, na dispela i as tru bilong dispela. Nau tasol Elisabet i bin kamapim tingting bilong em long nem ol i mas kolim long pikinini, na nau ol i laik save long tingting bilong man bilong em. Ol inap makim em long han na bai em i save, ol i laik bai em i kamapim tingting bilong em. Ol i no bin raitim tok na bai Sekaraia i ken kaunim na save, ol i laik bai em i kamapim tingting bilong em. Olsem na ating em i bin harim ol tok meri bilong em i mekim. Olsem na sapos ol i tromoi han tasol na makim em, bai i olsem ol i tok, ‘Em nau yumi olgeta (yu tu, Sekaraia) i harim pinis tok bilong meri, na yu yet i laik kolim wanem nem long pikinini?’

Na wantu tasol narapela mirakel i kamap​—⁠“maus bilong Sekaraia i no pas moa, na em inap toktok gen.” (Luk 1:64) Sapos yau bilong em i no pas, orait i no gat wok long tok yau bilong em i no pas moa, a?