Tupela Bikpela Tok i Kam Long God

Yumi ken tok Baibel olgeta em tok i kam long God. Papa bilong yumi long heven i givim ol dispela tok bilong skulim yumi. Winim 2,000 yia i go pinis, wanpela ensel i bin bringim tupela bikpela tok i kam. Dispela ensel em Gebriel, em i “save sanap long ai bilong God.” (Luk 1:19) Dispela ensel i bringim dispela tupela bikpela tok i go long husat?

Long dispela taim em yia 3 B.C.E. Ensel Gebriel i bringim namba 1 tok i go long we? Em i go long ol ples maunten bilong Judia, ating em ples i stap klostu long Jerusalem. Na i gat wanpela pris bilong Jehova i stap long dispela hap, nem bilong em Sekaraia. Em na meri bilong em, Elisabet, tupela i lapun pinis na ol i no gat pikinini. Nau em taim bilong Sekaraia long mekim wok pris long tempel long Jerusalem. Em i stap insait long tempel na wantu tasol ensel Gebriel i kamap long em klostu long alta bilong kamapim smok i gat gutpela smel.

Ating Sekaraia i pret nogut tru. Tasol ensel i mekim gut bel bilong em na i tok: “Sekaraia, yu no ken pret, long wanem, yu bin beten strong na God i harim pinis beten bilong yu. Olsem na meri bilong yu Elisabet bai karim wanpela pikinini man na yu mas kolim nem bilong en Jon.” Gebriel i tok moa long Jon olsem, “long ai bilong Jehova em bai i gat biknem” na em bai “redim wanpela lain manmeri bilong Jehova.”—Luk 1:13-17.

Ating Sekaraia i no bilip long dispela tok. Bilong wanem? Long wanem, tupela Elisabet i lapun pinis. Olsem na ensel Gebriel i tokim em: “Yu bai kamap mauspas na yu bai i no inap toktok i go inap long ol dispela samting i kamap, long wanem, yu no bin bilipim tok bilong mi.”—Luk 1:20.

Sekaraia i stap longpela taim insait long tempel, olsem na ol manmeri husat i wet ausait i tingting planti. Bihain, em i kam ausait, tasol em i no inap toktok. Sekaraia i wokim tasol sain long han. Dispela i kamapim klia olsem em i bin lukim narakain samting taim em i stap insait long tempel.

Taim Sekaraia i pinisim wok bilong em long tempel, em i go bek long haus. Bihain liklik, Elisabet i kisim bel! Inap 5-pela mun, em i hait i stap long haus na i wet long karim pikinini.

Bihain Gebriel i kam bek namba 2 taim. Em i kam lukim husat? Em i kam bilong lukim Maria em wanpela yangpela meri i no marit yet, em i stap long taun Nasaret long hap not bilong Galili. Ensel i tok wanem long Maria? Em i tok: “God i amamas long yu. Harim! Yu bai kisim bel na karim wanpela pikinini man, na yu mas kolim nem bilong en Jisas. Na em bai i gat biknem na ol bai kolim em Pikinini bilong God Antap Tru. . . . Na em bai stap King long lain bilong Jekop inap oltaim oltaim, na bai i no gat pinis bilong Kingdom bilong en.”—Luk 1:30-33.

Tingim bikpela amamas Gebriel i bin kisim taim em i bringim dispela tupela tok. Taim yumi ritim stori bilong Jon na Jisas, bai yumi luksave long olsem wanem ol dispela tok i kam long heven i bikpela samting.