I Stap na Wok Bilong Jisas

Ol Tok i Kam long Heven

OLGETA tok bilong Baibel i olsem tok i kam long heven, long wanem Papa bilong yumi long heven em i givim ol dispela tok long yumi bilong lainim yumi. Tasol klostu 2,000 yia bipo, wanpela ensel i save “sanap long pes bilong God,” em i kisim tupela bikpela tok i kam. Nem bilong dispela ensel em Gebriel. Orait, nau yumi ken skelim ol samting i kamap taim dispela ensel i kam long graun long dispela tupela taim.

Long yia 3 B.C.E., long ol liklik maunten bilong Judia, klostu long Jerusalem, wanpela pris bilong Jehova em i stap. Nem bilong em Sekaraia. Em wantaim meri bilong em Ilisabet, tupela i lapun pinis. Tupela i no gat pikinini. Em taim bilong Sekaraia long mekim wok pris bilong em long haus holi bilong God long Jerusalem. Em i wok i stap na wantu Gebriel i kam sanap long han sut bilong alta bilong wokim smok smel.

Sekaraia i pret. Tasol Gebriel i tok: ‘Yu no ken pret. God i harim pinis beten bilong yu. Ilisabet bai karim wanpela pikinini man, na yu mas kolim nem bilong em Jon. Bai em i redim ol man na ol i stap redi long Bikpela i kam.’ Tasol Sekaraia i no bilipim dispela tok. Em i ting em wantaim meri bilong em i no inap kamapim pikinini, long wanem tupela i lapun pinis. Olsem na Gebriel i tok, ‘Yu no bilipim tok bilong mi, orait nau bai maus bilong yu i pas na yu no inap toktok, inap long taim dispela olgeta samting i kamap pinis.’

Ol manmeri i wet long Sekaraia na ol i tingting planti, long wanem em i stap longtaim insait long rum holi. Bihain em i kam ausait na em i no inap toktok long ol. Em i mekim toktok long han tasol. Olsem na ol i save em i bin lukim narapela kain samting.

Bihain, taim bilong wok bilong Sekaraia em i pinis na em i go bek long ples bilong em. Nau ol dispela samting i kamap tru—meri bilong em i kisim bel! Em i hait i stap long haus inap 5-pela mun.

Lukim! Gebriel i kam gen. Em i toktok wantaim husat? Em i toktok wantaim wanpela yangpela meri singel bilong Nasaret, nem bilong em Maria. Em i givim wanem tok long Maria? Yu harim! Gebriel i tok, ‘Bai yu kisim bel na karim wanpela pikinini man. Na yu mas kolim nem bilong em Jisas. Em bai stap bikpela king na kingdom bilong em i no ken pinis.’

Yumi save Gebriel i amamas long kisim ol dispela tok i kam. Na bihain bai yumi stori moa long Jon na Jisas na bai yumi save olsem wanem ol dispela tok i kam long heven em i bikpela samting. 2 Timoti 3:16; Luk 1:5-33.

◆ I gat wanem tupela bikpela tok i kam long heven?

◆ Husat i kisim ol dispela tok i kam? Em i givim long husat?

◆ Olsem wanem na i hatwok long ol i bilipim ol dispela tok?