Yu Ting Bikpela De Haiden i Ken Kamap Bikpela De Kristen?
LONG taim bilong Krismas long 2004 long Itali, i gat wanpela tok pait i bin kamap. Sampela hetmasta na tisa i tok em i gutpela long ol man i lusim planti kastam o pinisim olgeta kastam bilong lotu long taim bilong Krismas. Ol i laik mekim olsem, long wanem, ol i tingim planti pikinini long skul em ol i no bilong Lotu Katolik o Lotu Protesan. Tasol sampela narapela tisa na sampela saveman samting i tokaut strong olsem ol man i mas holim yet ol dispela kastam na ol i mas i gat rispek long en.
Tru i gat dispela tok pait i stap, tasol wanem as tru bilong planti kastam bilong Krismas? Taim dispela tok pait i go bikpela, niuspepa bilong Vatiken (L’Osservatore Romano) i kamapim sampela tok bilong kirapim tingting.
Dispela niuspepa Katolik i tok long de bilong mekim Krismas, olsem: “De tru em mama i karim Jisas long en i stap hait na i no gat man i save long en. Ol samting bilong bipo long Rom, wok bilong kaunim man long dispela taim, na ol wok painimaut long ol yia bihain long dispela i no kamapim klia dispela de. . . . Planti man i save, Disemba 25 em de Misin Bilong Rom i bin makim bihain long yia 300. Ol haiden long Rom i bin makim dispela de bilong mekim lotu long god bilong San . . . Maski Lo Bilong Konstantin i orait pinis long lotu Kristen long Rom, ol bilip nating long . . . god bilong San i bin stap strong yet, na moa yet namel long ol soldia. Ol dispela bikpela de nau yumi stori long en, em ol i kamap long Disemba 25, ol i kamap long ol kastam ol man i bin mekim bipo. Dispela i givim tingting long Misin Bilong Rom long makim Disemba 25 i kamap wanpela bikpela de bilong lotu Kristen, na ol i mekim olsem long rot bilong senisim dispela god bilong San wantaim San Bilong Stretpela Pasin, em Jisas Krais. Na ol i tok ol man i mas mekim olsem bilong tingim de mama i karim em.”
Olsem wanem long diwai bilong Krismas, nau em wanpela hap bilong ol kastam bilong lotu Katolik?
Dispela stori long niuspepa Katolik i kamapim olsem long bipo “ol man i ting planti diwai olsem han bilong diwai pain samting i gat sampela strong bilong majik o strong bilong rausim sik.” Nius i tok moa olsem: “Long de paslain long Krismas, em Disemba 24, ol i save tingim Adam na Iv long rot bilong wanpela pilai em planti man i save long en na i stori long wanpela Diwai i stap long Paradais long graun . . . Ol i laik yusim wanpela diwai apol bilong mekim olsem, tasol em taim bilong kol na i no taim stret bilong mekim wok long diwai apol. Olsem na ol i yusim wanpela diwai fer na ol i putim sampela apol long ol han bilong en bilong makim olsem Krais bai Kisim Bek ol man long ol samting nogut bilong graun, na ol liklik bret ol i wokim long ol bisket em ol i brukbrukim, na dispela i makim olsem ol i kamap wanbel wantaim God long rot bilong Jisas, na tu, ol i putim ol loli na ol presen samting bilong ol pikinini.” Wanem samting i bin kamap bihain long dispela taim?
Nius L’Osservatore Romano i stori olsem pasin bilong mekim wok long diwai bilong Krismas i kirap long Jemani bihain long yia 1500 C.E., na nius i tok moa olsem: “Itali em wanpela bilong ol laspela kantri i bin insait long pasin bilong mekim wok long diwai bilong Krismas. Ating i olsem, long wanem, planti man i tok pasin bilong mekim wok long ol diwai bilong Krismas em pasin bilong ol lotu Protesan na ol i mas senisim dispela diwai wantaim piksa bilong bebi Jisas i slip long bokis kaikai.” Pop Pol Namba 6 “i kirapim pasin bilong sanapim [long bikpela ples St. Peter’s Square, long Rom] wanpela bikpela diwai bilong Krismas” klostu long hap i gat piksa bilong bebi Jisas i slip long bokis kaikai.
Yu ting i stret long wanpela lida bilong lotu i bungim ol samting bilong lotu haiden bilong bipo na mekim i kamap olsem wanpela samting bilong lotu Kristen? Bilong bihainim stretpela rot, Baibel i tokim ol Kristen tru olsem: “Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak?”—2 Korin 6:14-17.
[Ol Piksa long pes 8, 9]
Diwai bilong Krismas (pes long han kais) na piksa bilong bebi Jisas i slip long bokis kaikai long Vatiken
[Kredit Lain]
© 2003 BiblePlaces.com
[Piksa long pes 9]
Piksa bilong god bilong san
[Kredit Lain]
Museum Wiesbaden