Tingim Gut ‘Samting Bai Kamap Bihain’

LAIP bilong yumi i olsem wanpela rot yumi wokabaut long en na yumi yet inap makim wanem rot yumi laik bihainim. Tasol sapos yumi gat savetingting, orait taim yumi no kirap yet long wokabaut long wanpela rot, yumi bai wok long kisim save pastaim long wanem samting i stap long pinis bilong dispela rot. Sampela i bin kisim bikpela bel hevi tru long disisen ol i bin mekim. Ating yu tu yu bin tok, ‘Sori, sapos mi bin save long samting bai kamap long dispela rot, mi no inap kirap wokabaut long en.’

Man i gat save long raun em i laik save, ol wan wan rot bai bringim em i go we. Ating em bai lukim wanpela mep na toktok wantaim ol man i save gut long dispela ples. Na em bai lukim ol pos i gat toksave bilong soim rot. Laip bilong yumi i olsem wanpela rot yumi wokabaut long en. Orait olsem wanem yu ken save long wanem rot i gutpela long bihainim long laip bilong yu? Long maus bilong Moses, God i bin tok long ol Israel bilong bipo olsem: “Sapos ol i gat tingting, ol inap save long as bilong dispela samting i bin bagarapim ol [“ol inap save long samting bai kamap long ol bihain,” NW].”​—Lo 32:29.

Gutpela Tok Long Bihainim

Yumi no ken i gat tupela tingting long ‘samting bai kamap bihain’ long rot yumi bihainim long laip bilong yumi. God i stap long ples antap tru na em i save lukim olgeta hap, olsem na em inap tokim olgeta manmeri long wanem rot i gutpela tru long bihainim. Em i lukim pinis planti rot ol manmeri i bin wokabaut long en na ol samting i kamap long ol. Baibel i tok: “Bikpela i save lukim olgeta samting yumi mekim, na em i glasim gut olgeta pasin bilong yumi.”​—Sindaun 5:21.

Jehova i save tingim ol manmeri i laikim em tru. Long Baibel em i makim wanem rot i gutpela long ol i bihainim. Baibel i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” Olsem na taim yu no kirap yet long wokabaut long wanpela rot, em pasin bilong gutpela tingting sapos pastaim yu kisim tok bilong Jehova, olsem King Devit long Israel bilong bipo i bin mekim, em i beten olsem: “Yu mas soim rot long mi na mi ken bihainim.”​—Song 32:8; 143:8.

Taim yu bihainim rot em wanpela man i gat save long raun em i soim long yu na em i man yu ken bilip long en, yu inap i stap bel isi. Yu no tingting planti long dispela rot bai bringim yu i go we. Devit i bin askim Jehova long soim rot long em na em i bihainim dispela rot. Olsem na tingting bilong em i stap isi tru, olsem em i bin tokaut long en long Song 23. Devit i tok: “Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras. Na em i bringim mi i go long ol liklik wara na mi dring na mi malolo. Em i givim mi nupela strong. Na em i save bringim mi long ol gutpela rot, olsem em i tok bipo long mekim. God, maski mi wokabaut long ples nogut na bikpela tudak, mi no ken pret long samting nogut.”​—Song 23:​1-4.

Wanem Samting Bai Kamap Long Ol Bihain?

Wanpela man bilong raitim song, em Asap o wanpela tumbuna pikinini bilong em, i tokaut olsem ‘klostu em i laik pundaun’ na lusim stretpela rot. Wanem samting i bin kamap? Em i bin lukim ol man nogut na man bilong pait ol i gat planti samting na ol i “amamas,” na em i mangal long ol dispela samting. Long tingting bilong em i olsem ol i stap bel isi long olgeta taim. Na samting i nogut moa, em i ting i no gutpela tingting long em i bin bihainim dispela stretpela rot em yet i makim.​—Song 73:​2, 3, 6, 12, 13.

Orait nau dispela man bilong raitim song i go insait long haus bilong Jehova na em i beten na tingting long ol samting bai painim ol man nogut. Em i tok em i laik “save long ol samting bai i kamap long ol.” Em i tingim tingim ol samting bai painim ol dispela man long bihain. Wanem samting bai painim ol? Em i luksave olsem ol kain man olsem “ol i wokabaut long rot i wel moa yet” na bai “ol i bagarap kwiktaim tumas. Na dispela dai bilong ol em i nogut tru.” Orait, olsem wanem long rot em man bilong raitim song i bihainim? Em i tokaut olsem: “Bihain yu [Jehova] bai bringim mi i go bilong kisim biknem.”​—Song 73:​17-​19, 24; NW.

Taim man bilong raitim song i tingim pasin bilong ol man i kisim planti mani samting long olkain rot i no stret, na ol samting nogut i painim ol, em i save olsem em i stap long stretpela rot. Em i tok: “Mi stap klostu long yu [Bikpela] na dispela i gutpela tru.” Pasin bilong i stap klostu long God Jehova i save helpim yumi long olgeta taim.​—Song 73:28.

“Save Gut Long Rot Yu Laik Bihainim”

Long nau yumi tu i mas makim rot yumi bai bihainim. Ating ol i laik givim wanpela gutpela kontrak bilong wok bisnis long yu, o wok i gat namba, o wanpela i laik bai yu poroman wantaim em long wanpela bisnis i gat bikpela winmani long en. Tru, maski wanem kain nupela wok yu kisim, yu no save em bai kamap gutpela o nogat. Tasol em i pasin bilong gutpela tingting long skelim wanem ‘samting bai kamap bihain’ long wanpela wok o bisnis yu laik insait long en. Yu ting wanem samting bai kamap? Ating ol i laik bai yu mas lusim famili na go long narapela hap na dispela inap kamapim sampela hevi long meri bilong yu o long yu yet. O ating yu mas bung wantaim ol lain yu wok bisnis wantaim ol na ol i no gat gutpela pasin, o ol man i stap long ol hotel yu bai slip long en, o long ol narapela hap. Sapos yu lukluk gut long rot yu laik wokabaut long en, yu inap bihainim savetingting na makim ol samting i stret long mekim. Tingim gut tok bilong Solomon: “Save gut long rot yu laik bihainim.”​—Sindaun 4:​26, Contemporary English Version.

Yumi olgeta i mas tingim gut dispela tok, na ol yangpela i mas tingim moa yet. Wanpela yangpela man i rentim wanpela vidio na em i save olsem i gat sampela piksa nogut long en. Bihain em i stori olsem, taim em i lukim vidio, bel bilong em i kirap strong tru long mekim maritpasin na em i go painim wanpela pamukmeri i save sindaun klostu. Bihain em i bel hevi stret na maus bilong bel i kotim em, na em i tingting planti long sik nogut bai kamap long em. Samting i painim em i wankain stret olsem Baibel i stori long en: “Wantu em i bihainim meri i go long haus, olsem bulmakau ol i bringim i go long ples bilong kilim i dai.” Sori tru, dispela samting i no inap painim em sapos em i bin tingim gut ‘samting bai kamap bihain’!​—Sindaun 7:​22, 23.

Trastim Ol Toksave Bilong Soim Rot

Ating planti man bai wanbel olsem em i no gutpela tingting long givim baksait long ol toksave ol i bin putim bilong soim rot long yumi. Tasol sori tumas, sampela man i save mekim olsem long rot ol i bihainim long laip bilong ol taim ol i no laikim ol toksave bilong soim rot long ol. Tingim sampela Israel long taim bilong Jeremaia. Lain Israel i mas makim rot ol i laik bihainim, na God Jehova i tokim ol: “Yupela i mas painim dispela gutpela rot ol tumbuna i bin bihainim. Na yupela tu i mas bihainim dispela rot.” Tasol ol Israel i bikhet na ol i tok ol “i no ken bihainim dispela rot.” (Jeremaia 6:16) Ol i bihainim rot bilong bikhet, na wanem samting i kamap long ol? Long 607 B.C.E., ol Babilon i kam na bagarapim taun Jerusalem olgeta, na ol i kisim ol manmeri i go kalabus long Babilon.

Sapos yumi givim baksait long ol toksave God i bin putim bilong soim rot long yumi, dispela bai i no inap helpim yumi liklik. Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”​—Sindaun 3:​5, 6.

Sampela tok lukaut bilong God i kain olsem ol toksave, olsem, “No Ken Go Insait.” Olsem, Baibel i tok: “Yu no ken wokabaut long rot bilong ol man nogut, na yu no ken bihainim pasin bilong ol.” (Sindaun 4:14) Wanpela rot nogut, em Sindaun 5:​3, 4 i stori long en, i olsem: “Sapos wanpela meri i lusim man bilong en, na i aigris long yu, orait em bai i mekim planti switpela tok gris bilong pulim yu. Na sapos yu bihainim tok bilong en, bihain bai yu pilim em i samting nogut, olsem marasin i gat pait, na em i pen olsem bainat i sutim yu.” Long sampela man, pasin pamuk​—maski ol i mekim wantaim pamukmeri o narapela meri​—i olsem samting bilong amamas. Tasol sapos ol i givim baksait long toksave olsem “No Ken Go Insait”​—em toksave bilong helpim ol long mekim pasin i stret​—dispela pasin bikhet bai bringim ol i go long rot bilong bagarap.

Taim yu no kirap yet long wokabaut long kain rot olsem, askim yu yet: ‘Dispela rot bai bringim mi i go we?’ Sapos yu tingting gut pastaim long ‘samting bai kamap bihain,’ dispela inap pasim yu long bihainim wanpela rot em bai givim bikpela hevi long yu. Sik AIDS na ol narapela sik bilong pamuk, meri i kisim bel nating, rausim bel, marit i bruk, na bel i gat tok, ol dispela samting i pulap long rot bilong ol manmeri em ol i givim baksait long ol toksave God i putim bilong soim rot. Aposel Pol i tokaut klia long pinis bilong rot em ol manmeri bilong mekim pasin pamuk i bihainim. Ol “bai i no inap i go insait long kingdom bilong God.”​—1 Korin 6:​9, 10.

Em “Rot Yupela i Mas Bihainim”

Sampela taim i hatwok long lukim wanem ples wanpela rot i bringim yumi i go long en. Olsem na yumi tenkyu tru long God i tingim gut yumi na i soim rot long yumi! Jehova i tok: “[Mi] bai i stap baksait long yupela na . . . tokim yupela long rot yupela i mas bihainim.” (Aisaia 30:21) Wanem samting i stap long pinis bilong rot Jehova i soim yumi long en? Tru, rot i liklik na i gat hatwok long wokabaut long en, tasol Jisas i tok dispela rot i bringim yumi long laip i stap oltaim oltaim.​—Matyu 7:14.

Orait tingim rot nau yu wokabaut long en. Olsem wanem? Em i stretpela rot long bihainim? Em bai i go kamap long we? Beten askim Jehova long stiaim yu. Lukim gut ‘mep bilong ol rot,’ em Baibel. Na ating bai yu pilim olsem yu mas kisim sampela tingting long wanpela man em inap planti yia em i bin wok strong long wokabaut long rot bilong God. Sapos yu lukim olsem yu mas baut na bihainim narapela rot, orait mekim kwiktaim.

Taim man bilong raun i lukim toksave ol i bin putim bilong soim rot na em i save em i bihainim rot i stret, dispela i save strongim bel bilong em. Sapos yu skelim wokabaut bilong yu na yu lukim olsem yu wokabaut long rot bilong ol stretpela man, orait wok yet long bihainim dispela rot. Gutpela samting tru bilong dispela raun bilong yu em i stap klostu tasol.​—2 Pita 3:13.

Olgeta rot i save bringim man i go long wanpela hap. Taim yu kamap long pinis bilong rot yu bin makim bilong wokabaut long en, bai yu kamap long wanem hap? Nogut yu sanap na tingting, ‘Sori tumas, bilong wanem mi no bin makim narapela rot bilong bihainim?’ Olsem na taim yu laik putim lek i go bilong wokabaut long rot yu bin makim long laip bilong yu, pastaim yu ken askim yu yet, ‘Wanem samting bai kamap long pinis bilong dispela rot?’

[Blok/Ol Piksa long pes 10]

Wanem Samting Bai ‘Kamap Bihain’?

Planti taim i gat ol samting i traim ol yangpela, na sampela i laik subim ol long traim sampela pasin em planti yangpela i laikim. Em sampela samting olsem:

◼ Wanpela i laik traim yu na i tok yu no gat bun na yu pret long kisim wanpela smok.

◼ Wanpela tisa i laik helpim yu na i strong long yu mas kisim bikpela skul long yunivesiti.

◼ Ol i singautim yu i go long wanpela pati i gat planti dring na ating i gat sampela drak tu.

◼ Wanpela i tok: “I gutpela yu putim piksa bilong yu wantaim nem na atres samting long Intenet.”

◼ Wanpela pren i tokim yu long sindaun wantaim em na lukim wanpela muvi i gat pait na bagarapim man o ol pasin pamuk samting.

Orait sapos sampela traim olsem i painim yu, bai yu mekim wanem? Bai yu les long sakim ol na yu mekim tasol? O bai yu tingting gut pastaim long samting inap ‘kamap long bihain’? Bihainim savetingting na askim yu yet: “Sapos yu holim paia klostu long bros bilong yu, orait ating siot bilong yu i no inap paia, a? O sapos yu wokabaut antap long paia, ating paia i no inap kukim lek bilong yu, a?”​—Sindaun 6:​27, 28.