Nau Em Taim Bilong Makim Rot
“God i wokim ol manmeri na ol i kamap olsem God yet. God i mekim ol i kamap man na meri.”—Stat 1:27.
DISPELA tok long kirap bilong Baibel i kolim nambawan gutpela samting God i ‘wokim i gutpela tru na i kamap long taim bilong en’—em namba wan man na meri i gutpela olgeta, em Adam na Iv. (Saveman 3:11, NW) God Jehova i bin wokim ol, na em i tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”—Stat 1:28.
Long dispela tok long namba wan man na meri, God i tokim ol long ol samting em i tingting pinis long mekim. Ol i mas kamap planti na lukautim graun, olsem mekim graun olgeta i kamap wanpela paradais na ol yet na ol pikinini bilong ol inap i stap long en. God i no bin makim taim bilong ol long i dai. Nogat. God i tok promis long givim wanpela gutpela samting tru long ol. Sapos ol i makim stretpela rot long bihainim na mekim ol samting i stret wantaim laik bilong God, ol inap i stap bel isi tru na stap amamas oltaim.
Ol i makim rot nogut, olsem na lapun na indai i painim olgeta manmeri. Gutpela man Jop i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:1) Wanem hevi i bin kamap?
Baibel i tok: “Yumi save, wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Dispela “wanpela man” em Adam. Long laik bilong em yet em i makim pasin bilong sakim lo bilong God, em dispela lo i klia na i no hatwok long bihainim. (Stat 2:17) Long rot Adam i bin makim long bihainim, em i lusim laip oltaim long wanpela paradais long graun. Na tu, ol pikinini bilong em i no inap kisim gutpela samting God i bin promis long en, na ol i kisim sin na indai. I luk olsem olgeta samting i lus—o olsem wanem?
Taim Bilong Mekim Ol Samting i Kamap Nupela
Inap planti tausen yia bihain, man bilong raitim song i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Bilong kamapim olsem tok promis God i bin mekim long gaden Iden bai kamap tru, Baibel i stori long ol samting klostu nau God bai mekim. Baibel i tok: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Orait nau God yet i tok: “Harim. Mi mekim olgeta samting i kamap nupela.”—KTH 21:4, 5.
I gat taim bilong olgeta samting i kamap, olsem na bikpela askim i kamap i olsem: Long wanem taim ol samting bai kamap nupela gen, na ol gutpela promis bilong God bai kamap tru? Ol lain bilong wokim dispela nius, ol Witnes Bilong Jehova, ol i wok long tokim ol man olsem yumi stap long taim em Baibel i kolim “taim bilong las de,” na taim bilong God long “mekim olgeta samting i kamap nupela” i klostu pinis. (2 Timoti 3:1) Mipela i laik kirapim yu long skelim ol tok bilong Baibel na lain long ol gutpela samting yu inap kisim. Na tu, mipela i kirapim yu long bihainim dispela singaut: “Bikpela i stap klostu long yupela na i wetim yupela, olsem na nau em i taim bilong yupela i mas beten long em na i go klostu long em.” (Aisaia 55:6) God i no makim ol samting i painim yu, nogat, ol samting i painim yu long nau na long bihain i stap long han bilong yu yet!
[Rait long pes 8]
“Harim. Mi mekim olgeta samting i kamap nupela”