Ol Man i Askim
Yu Ting God i Kisim Ol Pikinini Bilong Kamap Ol Ensel Long Heven?
Taim wanpela pikinini i dai, ating ol pren i laik mekim gut bel bilong famili na tok, “God i laikim wanpela moa ensel long heven.” Yu ting dispela tok i stret?
Sapos i tru God i mekim na wanpela pikinini i dai, long wanem, em i laikim sampela moa ensel long heven, dispela tok bai makim olsem God i no gat pasin bilong sori na em i man nogut. Tasol Baibel i no tok olsem. (Jop 34:10) Wanpela papa i gat pasin sori em i no inap pulim nating pikinini long ol narapela papamama bambai em yet i gat planti pikinini, nogat tru. Tasol pasin sori bilong Jehova i winim tru pasin sori bilong ol papamama bilong graun, long wanem, nambawan bikpela pasin bilong em, em pasin laikim. (1 Jon 4:8) Bikpela pasin laikim bilong em i as na em i no inap mekim kain pasin nogut olsem.
Askim yu yet, ‘Olsem wanem? God i mas i gat sampela moa ensel long heven?’ Baibel i tok olgeta wok bilong God i gutpela na i nambawan tru. (Lo 32:4) Em i wokim planti milion ensel inap tru long namba em i laikim, olsem na em i no sot long ol ensel long heven. (Daniel 7:10) Tasol yu ting God i popaia long kaunim namba bilong hamas ensel em i laikim? Nogat tru! God i Gat Olgeta Strong i no inap popaia long kain samting olsem. I tru olsem Jehova i bin makim sampela manmeri bilong graun long kamap spirit na mekim wok king wantaim Jisas long heven, tasol ol dispela manmeri ol i no ol liklik pikinini i bin i dai, nogat.—KTH 5:9, 10.
Narapela as na God i no inap kisim ol liklik pikinini long graun bilong kamap ol ensel long heven em olsem, dispela bai i no stret wantaim laik bilong God long pastaim long ol pikinini. Long gaden Iden, God i tokim Adam na Iv: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Ol pikinini ol i presen i kam long God, na dispela i bikpela samting long dispela laik bilong God long pastaim long pulapim graun long ol stretpela manmeri. Em i no bin tingting long ol pikinini i mas i stap sotpela taim tasol na dai, na bihain tanim i kamap ensel, nogat. Baibel i tok klia olsem “God i . . . givim yumi ol pikinini olsem presen.” (Song 127:3) Yu ting Jehova, God bilong pasin laikim, bai kisim bek long han bilong papamama wanpela gutpela presen em i bin givim long ol? Nogat tru!
Indai bilong wanpela pikinini i save kamapim bikpela bel hevi tru na pen. Orait, i gat wanem gutpela samting ol papamama i krai sori ol inap long wetim i kamap? Baibel i tok promis olsem God bai i kirapim bek planti milion manmeri na bai ol i stap long Paradais hia long graun. Lukim long ai bilong tingting ol pikinini—em ol i kirap bek na ol i no gat sik na skin bilong ol i strong—ol i bung gen wantaim papamama na ol famili i laikim ol. (Jon 5:28, 29) Em laik bilong God long ol pikinini i mas kamap bikpela, amamas long laip, na kisim save long em na long ol samting em i tingting pinis long kamapim long graun. Olsem na ol pikinini i bin dai, ol i no go kamap ensel long heven, nogat. Ol i wetim taim God bai kirapim bek ol long matmat na ol bai i stap long Paradais long graun. Long dispela taim bihain, aninit long lukaut bilong Man Bilong Wokim yumi, ol pikinini na ol lapun wantaim bai amamas long lotuim God Jehova inap oltaim oltaim.