Yu Save Long Dispela?
Wanem dispela bikpela dua bilong taun em planti taim Baibel i stori long en?
▪ Long taim bilong ol man bilong raitim Baibel, planti taun i gat ol bikpela banis i raunim taun. Klostu long bikpela dua bilong banis bilong taun i gat wanpela hap i stap nating we ol manmeri i save bung bilong toktok wantaim ol narapela, bilong baim na salim samting, na bilong harim olkain stori samting. Long dispela hap ol i save mekim ol toksave na ol profet i autim tok. (Jeremaia 17:19, 20) Buk The Land and the Book i tok, “klostu olgeta wok bisnis samting ol man i mekim, ol i save mekim klostu long ol dua bilong taun.” Long Israel bilong bipo, ol dua bilong taun em ples we ol i save mekim ol bung long en.
Olsem, Abraham i baim wanpela hap graun bilong Efron, dispela graun i bilong kamap olsem matmat bilong famili bilong em. Em i baim dispela hap graun long ai bilong “olgeta man bilong lain Hit i stap long dispela ples ol i toktok i stap long en.” (Stat 23:7-18) Na Boas i askim 10-pela hetman bilong Betlehem long kam sindaun long ples bilong kibung, em hap i stap klostu long dua bilong banis. Taim ol i bung i stap em i stretim tok long graun bilong man bilong Rut i dai pinis na long Rut i ken maritim wanpela wanblut bilong dispela man, olsem Lo i tok. (Rut 4:1, 2) Taim ol hetman bilong taun i mekim wok olsem jas, ol i save sindaun klostu long dua bilong taun bilong harim kot, wokim ol disisen, na tokaut long strafe kot i makim.—Lo 21:19.
[Piksa long pes 15]
Ofir em Baibel i stori long en olsem ples i gat gutpela gol tru, em i stap we?
▪ Buk Jop em i namba wan buk bilong Baibel i stori long gol bilong Ofir olsem “gutpela gol tru.” (Jop 28:15, 16) Olsem 600 yia bihain long taim bilong Jop, King Devit i kisim gol bilong Ofir bilong wokim tempel bilong Jehova long Jerusalem. Pikinini bilong em Solomon tu i bin kisim gol long Ofir.—1 Stori 29:3, 4; 1 King 9:28.
Baibel i stori long Solomon i bin wokim planti sip long taun Esiongeber i stap long nambis bilong solwara Retsi, na ol dispela sip i karim gol bilong Ofir i kam. (1 King 9:26) Ol saveman i ting Esiongeber i bin stap long het bilong Galf Bilong Akaba klostu long ples nau ol i kolim Elat na Akaba. Long dispela hap, ol sip inap i go long narapela narapela hap bilong solwara Retsi o i go moa long ol longwe bisnis senta long ol nambis bilong Afrika o bilong India, na ating Ofir i stap long wanpela bilong ol dispela ples. Tasol sampela man i ting olsem Ofir i stap long Arebia, em hap we ol i bin painim ol gol main bilong bipo, na long nau tu ol man i bin kisim gol long dispela hap.
Sampela man i ting stori bilong ol gol main bilong Solomon, em ol stori nating tasol, tasol saveman Kenneth A. Kitchen i tok: “Ofir em wanpela ples i bin stap tru. Wanpela hap sospen graun, em ol Hibru i bin wokim 700 yia samting paslain long Krais, i gat rait long en olsem: ‘Gol Bilong Ofir bilong Bet-Oron—30 sekel.’ Olsem na Ofir em wanpela ples tru we ol i bin kisim gol long en, wankain olsem ‘Gol Bilong ‘Amau,’ o ‘Gol Bilong Pun,’ o ‘Gol Bilong Kus’ em ol rait bilong Isip i stori long ol—ol dispela nem i kolim ples ol i kisim gol long en o wanem kain gol ol i kisim long ol dispela ples.”
[Piksa long pes 15]
Abraham i stap long dua bilong banis, em i laik baim hap graun
[Piksa long pes 15]
Hap sospen graun bilong ol Hibru i gat rait i kolim nem Ofir
[Kredit Lain]
Collection of Israel Antiquities Authority, Photo © The Israel Museum, Jerusalem