“Holi Spirit i Save Lukluk Gut Long . . . Olgeta Tingting Hait Bilong God”
“Holi Spirit i save lukluk gut long olgeta samting, na em i save lukim tu olgeta tingting hait bilong God.”—1 KO. 2:10.
1. Long 1 Korin 2:10, Pol i stori long wanem wok bilong holi spirit? Wanem ol askim i kamap?
YUMI tenkyu tru long wok em holi spirit bilong Jehova i save mekim! Baibel i tok holi spirit i olsem helpim, presen, na i tokaut long ol samting, na i prea bilong helpim yumi. (Jo. 14:16; Ap. 2:38, NW; Ro. 8:16, 26, 27) Aposel Pol i stori long narapela bikpela wok em holi spirit i save mekim: “Holi Spirit i save lukluk gut long olgeta samting, na em i save lukim tu olgeta tingting hait bilong God.” (1 Ko. 2:10) Tru tumas, Jehova i save yusim holi spirit bilong em bilong kamapim ol strongpela tok i tru bilong Baibel. Sapos yumi no gat dispela helpim, bai yumi no inap kliagut long ol samting Jehova i tingting pinis long mekim. (Ritim 1 Korin 2:9-12.) Tasol i gat sampela askim i kamap: Olsem wanem holi spirit i save lukluk gut, olsem glasim, “olgeta tingting hait bilong God”? Long taim bilong ol aposel, Jehova i kamapim ol tingting hait long rot bilong husat? Long taim bilong yumi, dispela spirit i save glasim ol tingting hait olsem wanem na long rot bilong husat?
2. Holi spirit i mekim wanem tupela samting?
2 Jisas i tok long tupela samting em holi spirit bai mekim. Paslain liklik long em i dai, em i tokim ol aposel bilong em olsem: “Helpim tru bilong strongim yupela em i Holi Spirit. Na long nem bilong mi, Papa bai i salim em i kam. Em bai i skulim yupela long olgeta samting. Na bai em i kirapim tingting bilong yupela na bai yupela i tingim gen olgeta tok mi bin givim long yupela.” (Jo. 14:26) Holi spirit bai stap olsem tisa na helpim ol man long tingim ol tok ol i bin lainim bipo. Olsem tisa, holi spirit bai helpim ol Kristen long save long ol samting em bipo ol i no bin kliagut long en. Na em i helpim ol long tingim na bihainim stret ol samting ol i bin harim bipo.
Long Taim Bilong Ol Aposel
3. Wanem tok bilong Jisas i soim olsem isi isi “olgeta tingting hait bilong God” bai kamap ples klia?
3 Jisas yet i bin skulim ol disaipel bilong em long planti tok i tru em ol i nupela long ol. Tasol i gat planti samting yet em ol i mas kisim save long en. Jisas i tokim ol aposel: “Mi gat planti tok moa mi laik givim yupela, tasol yupela i no inap kisim nau. Tasol taim Spirit bilong tok tru i kam, em bai i stiaim tingting bilong yupela na bai yupela i save long olgeta tok i tru.” (Jo. 16:12, 13) Dispela tok bilong Jisas i soim olsem long rot bilong holi spirit, isi isi ol strongpela tok bilong Baibel bai kamap ples klia.
4. Long de Pentikos bilong yia 33 C.E., olsem wanem holi spirit i stap olsem tisa na i helpim ol man long tingim ol tok ol i bin lainim bipo?
4 Long de Pentikos bilong yia 33 C.E., “Spirit bilong tok tru” i kam na i kapsait antap long 120 Kristen i bung wantaim long Jerusalem. Ol samting ol man i lukim na harim i kamapim klia dispela samting. (Ap. 1:4, 5, 15; 2:1-4) Ol disaipel i toktok long kain kain tokples long “ol strongpela wok bilong God.” (Ap. 2:5-11) Em taim nau bilong sampela nupela samting i mas kamap long ples klia. Profet Joel i bin tok profet olsem holi spirit bai kapsait antap long ol man. (Jol. 2:28-32) Ol man i lukim truim bilong dispela tok profet, ol i no bin ting truim bilong en bai kamap long kain rot olsem, na aposel Pita i go pas long stori gut long mining bilong dispela samting i kamap. (Ritim Aposel 2:14-18.) Long dispela rot holi spirit i stap olsem tisa na i kamapim klia long Pita, olsem dispela samting i kamap long ol disaipel, em i truim wanpela tok profet bilong bipo. Na tu, spirit i helpim ol long tingim ol tok ol i bin lainim bipo; Pita i kolim tok bilong Joel na tupela song bilong Devit tu. (Sng. 16:8-11; 110:1; Ap. 2:25-28, 34, 35) Ol samting ol dispela man i bung i lukim na harim, em ol tingting hait bilong God.
5, 6. (a) Bihain long Pentikos bilong yia 33 C.E., ol i mas kisim bekim long wanem ol bikpela askim bilong nupela kontrak? (b) Husat i kamapim ol dispela askim? Olsem wanem ol i wokim ol disisen?
5 I gat planti samting yet ol Kristen bilong bipo i mas kliagut long en. Olsem, i gat ol askim long nupela kontrak i bin kamap long de Pentikos. Olsem wanem? Ol Juda na ol man i kirap bihainim lotu Juda, ol tasol i insait long dispela nupela kontrak? Ol man bilong ol narapela lain tu inap insait long en na holi spirit i ken makim ol? (Ap. 10:45, 46) Ol man bilong ol narapela lain i mas katim skin pastaim na aninit long Lo Bilong Moses? (Ap. 15:1, 5) Em ol bikpela askim tru. Ol Kristen i nidim spirit bilong Jehova bilong glasim ol dispela tingting hait. Tasol dispela spirit bai wok long rot bilong husat?
6 Ol brata i go pas long wok ol i kamapim ol dispela askim bilong ol i ken skelim. Pita, Pol, na Barnabas i bin stap long bung bilong ol hetman na ol i stori long olsem wanem Jehova i bin kirap tingim ol man bilong ol narapela lain i no bin katim skin. (Ap. 15:7-12) Ol hetman i skelim dispela samting wantaim ol tok bilong Ol Skripsa Hibru na helpim bilong holi spirit, na nau ol i wokim disisen. Ol i toksave long ol kongrigesen long dispela disisen long rot bilong pas.—Ritim Aposel 15:25-30; 16:4, 5; Efesus 3:5, 6.
7. Ol strongpela tok i tru i bin kamap ples klia long wanem rot?
7 Planti narapela samting i kamap ples klia long rot bilong ol buk em Jon, Pita, Jems, na Pol i raitim. Tasol taim ol i pinisim wok bilong raitim Ol Skripsa Grik, wok bilong autim tok profet na kisim save long rot bilong mirakel, dispela i pinis. (1 Ko. 13:8) Olsem wanem? Holi spirit bai stap yet olsem tisa na helpim ol man long tingim ol tok ol i bin lainim bipo? Em bai wok yet long helpim ol Kristen long glasim ol tingting hait bilong God? Tok profet i makim olsem em bai mekim olsem.
Long Taim Bilong Las De
8, 9. Long taim bilong las de, husat bai stap olsem “lait” na i gat gutpela save na tingting?
8 Wanpela ensel i tok profet long taim bilong pinis, olsem: “Ol man i gat gutpela save na tingting bai ol i lait olsem skai i lait tumas. Na ol man i bin stiaim planti manmeri long bihainim stretpela pasin, ol bai i lait oltaim olsem ol sta.” Na “stretpela save bai kamap planti.” (Dan. 12:3, 4; NW) Husat bai i gat gutpela save na tingting, na husat bai stap olsem lait? Jisas i helpim yumi long kisim bekim bilong dispela long rot bilong tok piksa bilong em long wit na gras nogut. Taim em i toktok long taim bilong “las de bilong dispela graun,” em i tok: “Long dispela taim ol stretpela manmeri bai i lait olsem san, insait long kingdom bilong Papa bilong ol.” (Mt. 13:39, 43) Long tok bilong em, Jisas i tok “ol stretpela manmeri” i makim “ol manmeri bilong kingdom bilong heven,” em ol Kristen God i bin makim.—Mt. 13:38.
9 Olsem wanem? Ol Kristen God i bin makim, olgeta bai stap olsem “lait”? Yumi ken tok yes, long wanem, olgeta Kristen bai i insait long wok autim tok, kamapim ol disaipel, na narapela i strongim narapela long ol miting. Ol Kristen God i bin makim ol bai stap olsem gutpela piksa long dispela samting. (Sek. 8:23) Tasol tu, ol tingting hait bilong God bai kamap ples klia long taim bilong las de. Tok profet bilong Daniel “i stap hait” i go inap long taim bilong las de. (Dan. 12:9) Holi spirit bai glasim ol tingting hait bilong God olsem wanem na long rot bilong husat?
10. (a) Long taim bilong las de, holi spirit i save kamapim klia ol strongpela tok i tru bilong Baibel long rot bilong husat? (b) Stori long olsem wanem ol tok i tru bilong tempel spirit i kamap klia moa.
10 Taim ol i mas kamapim klia moa wanpela tok bilong Baibel long taim bilong yumi, holi spirit i helpim ol mausman bilong lain “wokboi i gat gutpela tingting” i stap long hetkota, long kliagut long ol strongpela tok i tru bilong Baibel em bipo yumi no bin kliagut long en. (Mt. 24:45; 1 Ko. 2:13) Gavening Bodi olgeta bai skelim i gat wok long stretim sampela tok o nogat. (Ap. 15:6) Taim ol i skelim pinis, na sapos i gat sampela senis, orait ol bai kamapim long ol buk na nius bambai yumi olgeta i ken kisim save long en. (Mt. 10:27) Bihain, ating i gat wok long stretim sampela tok moa, na ol i tokim yumi long ol dispela samting tu.—Lukim blok “Holi Spirit i Kamapim Mining Bilong Tempel Spirit.”
Kisim Helpim Long Wok Bilong Holi Spirit Long Nau
11. Olsem wanem olgeta Kristen long nau i kisim helpim long wok holi spirit i save mekim bilong kamapim klia ol tingting hait bilong God?
11 Olgeta Kristen i stap gut long God, ol i kisim helpim long wok bilong holi spirit long kamapim klia ol tingting hait bilong God. Olsem ol Kristen bilong bipo, yumi long nau i save stadi long ol tok em holi spirit i helpim yumi long kliagut long en, na bihain yumi tingim gen na bihainim ol dispela tok. (Lu. 12:11, 12) I no olsem yumi mas i go long bikpela skul bilong kliagut long ol strongpela tok i tru bilong Baibel i stap long ol buk na nius bilong yumi. (Ap. 4:13) Olsem wanem yumi inap kliagut moa long ol tingting hait bilong God? Tingim sampela rot olsem.
12. Long wanem kain taim yumi mas beten bilong kisim holi spirit?
12 Beten bilong kisim holi spirit. Taim yumi laik skelim ol buk na nius bilong Baibel, pastaim yumi mas beten bilong holi spirit i ken stiaim yumi. Yumi mas mekim olsem maski yumi stap wanpis o yumi gat sotpela taim tasol bilong stadi. Ol kain beten olsem i amamasim tru bel bilong Papa bilong yumi long heven. Olsem Jisas i bin tok, Jehova bai givim holi spirit long yumi taim yumi askim em.—Lu. 11:13.
13, 14. Olsem wanem pasin bilong redim ol miting i helpim yumi long kliagut moa long ol tingting hait bilong God?
13 Redim ol miting. Yumi save kisim ‘kaikai long taim bikman i makim’ long rot bilong lain wokboi. Dispela “wokboi” i inapim wok bilong en long rot bilong kamapim ol buk na nius bilong Baibel na kamapim ol program bilong mekim stadi na ol miting. I gat ol as em ol i bin skelim gut taim ol i tokim ‘ol manmeri bilong God’ long tingim gut sampela tok. (1 Pi. 2:17; Kl. 4:16; Ju. 3) Yumi wok gut wantaim holi spirit taim yumi wok strong long bihainim ol tok yumi kisim long dispela lain.—KTH 2:29.
14 Taim yumi redim ol miting Kristen, i gutpela yumi lukim ol skripsa ol i no raitim tok bilong en, na traim long luksave long olsem wanem ol dispela skripsa i stret wantaim tok yumi stadi long en. Dispela pasin bai mekim na isi isi yumi kliagut moa long ol tok bilong Baibel. (Ap. 17:11, 12) Taim yumi ritim na lukim ol dispela skripsa, orait nau holi spirit inap helpim yumi long tingim gen tok bilong ol. Na tu, taim yumi lukim ol skripsa, dispela i helpim yumi long tingim ol ves i stap long wanem hap bilong pes bilong Baibel.
15. Bilong wanem yumi mas ritim ol nupela buk na nius bilong Baibel? Bilong mekim olsem, yu yet i save mekim wanem?
15 Ritim ol nupela buk na nius bilong Baibel. I gat sampela buk em yumi no save skelim long ol miting, tasol ol i redim ol dispela buk bilong helpim yumi. Ol nius yumi save tilim long ol ausait lain, ol i bin redim long yumi. Planti taim yumi save lusim haptaim bilong wetim wanpela man o wanpela samting. Sapos yumi karim raun ol buk na nius bilong yumi em yumi no bin ritim o yumi ritim hap tasol, ating yumi inap ritim ol nius long ol dispela haptaim we yumi wetim wanpela. Sampela i save harim rekoding bilong ol nupela buk na nius bilong yumi taim ol i wokabaut o raun long ka. Ol i bin mekim gut wok painimaut na raitim ol tok na ol i raitim long stail ol man i amamas long ritim, na olgeta dispela tok i helpim yumi long pilim tru ol samting bilong spirit.—Hab. 2:2.
16. Wanem gutpela samting i kamap taim yumi raitim long pepa ol askim i save kamap na painim bekim bilong ol?
16 Tingim tingim long bel ol tok yu ritim. Taim yu ritim Baibel o ol buk na nius bilong Baibel, lusim haptaim bilong tingim ol tok yu ritim. Taim yu tingim ol tok yu ritim, ating sampela askim bai kamap long tingting bilong yu. Yu ken raitim long pepa ol kain askim olsem na bihain kisim save moa long dispela samting. Planti taim ol tok yumi gat laik long save gut long en, ol dispela tok yumi save stadi gut tru long en. Save yumi kisim i kamap hap bilong ol gutpela save yumi kisim pinis na inap helpim yumi taim yumi mas kisim helpim.—Mt. 13:52.
17. Yu save skelim wanem samting long taim bilong famili stadi o stadi bilong yu yet?
17 Makim taim bilong famili lotu. Gavening Bodi i bin strongim yumi olgeta long makim wanpela apinun o narapela haptaim long olgeta wik bilong mekim stadi bilong yumi yet o famili stadi. Ol i bin senisim sediul bilong ol miting na dispela i opim rot long yumi inap bihainim dispela tok. Yu save skelim wanem samting long taim bilong Famili Lotu? Sampela i save ritim Baibel, mekim wok painimaut long ol ves bilong Baibel ol i gat askim long en na raitim ol sotpela tok long Baibel i kamapim mining bilong ves. Planti famili i save lusim haptaim bilong skelim olsem wanem ol tok ol i stadi long en i stret long famili bilong ol. Sampela het bilong famili i makim ol tok bilong stadi long en, em ol tok ol i ting famili i mas skelim, o ol tok na askim em famili i laik bai ol i skelim. Ating bihain bai yu tingim ol narapela samting em famili i ken stadi long en.a
18. Bilong wanem yumi no ken surik long stadim ol strongpela tok i tru bilong Baibel?
18 Jisas i tok holi spirit bai stap olsem helpim. Olsem na yumi no ken surik long stadi long ol strongpela tok i tru bilong Tok Bilong God. Ol kain tok i tru ol i hap bilong ‘save bilong God,’ na God i singautim yumi long glasim gut ol dispela tok. (Ritim Sindaun 2:1-5.) Ol i kamapim planti samting em “God i bin redim i stap bilong ol man i save laikim em tru.” Taim yumi wok strong long kisim sampela save moa long Tok Bilong Jehova, holi spirit bai helpim yumi, long wanem, “Holi Spirit i save lukluk gut long olgeta samting, na em i save lukim tu olgeta tingting hait bilong God.”—1 Ko. 2:9, 10.
[Futnot]
Bai Yu Bekim Olsem Wanem?
• Long wanem tupela rot holi spirit i helpim yumi long glasim ol “tingting hait bilong God”?
• Long taim bilong ol aposel, holi spirit i kamapim klia ol strongpela tok i tru long rot bilong husat?
• Bilong kamapim klia moa sampela tok long nau, holi spirit i save mekim wanem?
• Yu inap mekim wanem bambai wok bilong holi spirit i ken helpim yu?
[Blok long pes 22]
Holi Spirit i Kamapim Mining Bilong Tempel Spirit
Sampela bilong ol “tingting hait bilong God” i kamap ples klia long taim bilong ol aposel em olsem: Haus lotu sel na bihain ol tempel ol i piksa tasol bilong wanpela samting i bikpela samting tru. Pol i kolim dispela samting olsem “haus tru bilong God. Dispela haus ol man i no bin sanapim. Nogat. Bikpela yet i bin sanapim.” (Hi. 8:2) Dispela haus em bikpela tempel spirit, em rot bilong i go klostu long God long rot bilong sakrifais na wok pris bilong Jisas Krais.
“Haus tru bilong God” i kamap long 29 C.E., taim Jisas i kisim baptais na Jehova i orait long em i kamap dispela man i nambawan gutpela ofa. (Hi. 10:5-10) Bihain long dai na kirap bek bilong Jisas, em i go insait long Rum Tambu Tru bilong tempel spirit, na i givim pe bilong ofa bilong em “long God.”—Hi. 9:11, 12, 24.
Aposel Pol i tok ol Kristen God i bin makim ol i “wok long kamap wanpela tempel holi bilong Jehova.” (Ef. 2:20-22, NW) Olsem wanem? Dispela tempel i wankain long “haus tru bilong God” em bihain Pol i toktok long en long pas em i bin raitim long ol Hibru? Inap planti yia, ol wokboi bilong Jehova i bin ting olsem. Ol i bin ting olsem ol Kristen God i bin makim, Jehova i redim ol long graun bilong kamap olsem ol ston long tempel bilong Jehova long heven.—1 Pi. 2:5.
Tasol klostu long yia 1971, ol brata bilong lain wokboi husat i go pas long wok, ol i luksave olsem dispela tempel Pol i toktok long en long Buk Efesus, em i no inap makim bikpela tempel spirit bilong Jehova. Sapos “haus tru bilong God” i makim ol Kristen God i bin makim na i kirap bek pinis, orait dispela haus i mas kamap bihain long kirap bek bilong ol i stat long “taim Bikpela i kam bek.” (1 Te. 4:15-17) Tasol taim Pol i toktok long haus lotu sel, em i tok: “Dispela haus lotu sel em i olsem piksa bilong soim yumi ol samting i mas kamap long dispela taim nau.”—Hi. 9:9.
Taim ol i skelim ol dispela skripsa na sampela narapela skripsa, em i kamap klia olsem tempel spirit i stap pinis—em i no samting Jehova i wok yet long kamapim. Na ol Kristen God i bin makim ol i no olsem ol ston Jehova i redim long graun bilong kamap hap bilong tempel spirit. Nogat. Ol Kristen God i bin makim ol i mekim wok insait long banis na Rum Tambu bilong tempel spirit, na “givim biknem” long God long olgeta de.—Hi. 13:15.
[Piksa long pes 23]
Olsem wanem yumi inap kliagut moa long ol “tingting hait bilong God”?