Tru Tru God i Save Tingim Yu?

OSEM WANEM? Yu pilim olsem wanpela i laikim yu tru? O sampela taim yu pilim olsem i no gat wanpela i tingim yu? Long dispela taim we ol man i hariap hariap long mekim ol samting na ol i tingim ol yet tasol, ating em i isi long yu kisim tingting olsem ol man i no save tingim yu tumas. Baibel i stori long taim bilong yumi olsem planti long nau i tingim ol yet tasol na ol i no tingim tumas ol narapela.​—⁠2 Timoti 3:​1, 2.

Maski yumi gat wanem krismas, kastam, tokples, o yumi bilong wanem lain, yumi olgeta i gat strongpela laik long narapela i mas laikim yumi. Sampela ripot i tok, bodi bilong yumi i gat ol rop wailis i save pilim tru pasin bilong ol narapela long laikim yumi na mekim pasin isi long yumi. God Jehova, em Man Bilong Wokim yumi, em i save gut olsem yumi mas i gat ol narapela i laikim tru yumi na tingim yumi. Yu bai pilim olsem wanem sapos God i tokim yu olsem yu gutpela tru long ai bilong em? Em i nambawan gutpela samting tru yu inap pilim, a? Olsem wanem yumi inap save olsem Jehova i save tingim yumi ol sinman? Yu ting em i save tingim yumi olgeta wan wan? Sapos olsem, orait wanem samting i mekim na man i gutpela long ai bilong God?

Jehova i Save Tingim Tru Yumi

Inap olsem 3,000 yia i go pinis, man bilong raitim song i amamas tru long lukim skai long nait i pulap long ol sta. Em i tingim tru bikpela strong bilong Man husat i bin wokim ol dispela planti bilion sta. Em i tingim bikpela strong na biknem bilong Jehova i antap tru na ol man i olsem samting nating, na em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?” (Song 8:​3, 4) Ating em i isi long kisim tingting olsem Nambawan Bikpela em i stap longwe o em i bisi tumas na em i no gat taim bilong tingim yumi ol sinman. Tasol man bilong raitim song i save olsem maski yumi ol man i pilim olsem yumi samting nating na yumi stap inap sotpela taim tasol, God i save tingim tru yumi.

Narapela man bilong raitim song i tok: “Em i save amamas long ol manmeri i save pret long em, na long ol manmeri i save bilip long em i save sori long ol oltaim.” (Song 147:11) Yumi pilim tru tok i stap long dispela tupela song. Jehova em i stap antap tru, na em i no save tingim tasol ol man, nogat. Em i save “was gut” na “em i save amamas” long ol.

Wanpela tok profet bilong Baibel i stori long ol samting i kamap long taim bilong yumi i strongim dispela tingting. Long rot bilong profet Hagai, Jehova i tok olsem ol bai autim gutnius bilong Kingdom Bilong God long olgeta hap bilong graun. Wanem samting bai kamap long dispela? Tingim gutpela samting i kamap: “Ol gutpela samting bilong olgeta lain ol i mas i kam insait; na bai mi pulapim ol gutpela gutpela samting long haus bilong mi.”​—⁠Hagai 2:​7, NW.

Wanem dispela “ol gutpela samting” bilong olgeta lain man? Em i no tok long ol mani kago samting, nogat. (Hagai 2:⁠8) Samting i mekim bel bilong Jehova i amamas i no silva na gol. Em i amamas long ol manmeri i givim bel long lotuim em maski ol i no gutpela olgeta. (Sindaun 27:11) Ol i “ol gutpela samting” i givim biknem long em, na em i amamas long pasin bilong ol long givim bel olgeta long lotuim em na mekim wok bilong em. Olsem wanem? Yu wanpela bilong ol dispela manmeri?

Planti man i hatwok long bilip olsem Bikpela Man Bilong Wokim ol samting i save tingim tru ol man olsem gutpela samting long ai bilong em. Tasol dispela tingting i mas kirapim yumi long go klostu long em.​—⁠Aisaia 55:6; Jems 4:⁠8.

“God i Laikim Yu Tumas”

Taim profet Daniel i lapun pinis, wanpela narakain samting i kamap long em long wanpela apinun. Taim Daniel i beten i stap, wantu wanpela visita i kam. Nem bilong em Gebriel. Daniel i bin bungim em bipo na em i luksave olsem em i wanpela ensel bilong Jehova. Gebriel i stori long as na em i kamap wantu, na em i tok: “Daniel, mi kam bilong kliaim tingting bilong yu, bai yu gat planti gutpela save. Daniel, God i laikim yu tumas.”​—⁠Daniel 9:​21-23.

Long narapela taim, wanpela ensel bilong Jehova i tokim Daniel olsem: “Daniel, God i laikim yu tumas.” Orait nau, bilong strongim Daniel, em i tok: “God i laikim yu tumas, olsem na yu mas i stap bel isi na yu no ken pret.” (Daniel 10:​11, 19) Tripela taim Baibel i tok long Daniel olsem ‘God i laikim em tumas.’ Dispela tok inap makim tu olsem “em i gutpela samting” o “em i feverit bilong God.”

Yumi ken save olsem Daniel i pas gut pinis wantaim God bilong em na em i save olsem Jehova i orait long pasin bilong em long givim bel olgeta long mekim wok bilong Jehova. Tasol dispela tok bilong ensel olsem God i laikim em tru i strongim tru bel bilong em. Olsem na Daniel i tok: “Yu strongim mi pinis.”​—⁠Daniel 10:⁠19.

Dispela gutpela stori bilong Jehova long tingim tru profet bilong em i stap long Baibel bilong helpim yumi. (Rom 15:⁠4) Taim yumi tingim gutpela pasin bilong Daniel, dispela i helpim yumi long kliagut long samting i mekim na gutpela Papa bilong yumi long heven i save laikim tru man.

Oltaim Kisim Save Long Baibel

Daniel i save stadi gut long ol tok bilong Baibel. Yumi save long dispela, long wanem, em yet i tok: “Mi wok long ritim ol buk bilong God. Na mi tingting long tok Bikpela i bin givim long profet Jeremaia. Em i tok Jerusalem i mas bagarap i stap inap 70 yia.” (Daniel 9:⁠2) Ol buk i bin stap long dispela taim, em ol buk Moses, Devit, Solomon, Aisaia, Jeremaia, Esekiel na sampela narapela profet i bin raitim. Yumi ken tingim olsem Daniel i gat planti skrol, na em i bin ritim na skelim gut ol tok profet i stori long kamapim bek lotu i tru long Jerusalem. Ating em wanpela i save stap long rum antap long haus na tingim tingim long bel mining bilong ol dispela tok em i ritim. Pasin bilong em long stadi gut i strongim bilip bilong em na i helpim em long i go klostu long Jehova.

Na tu, pasin bilong stadi long Tok Bilong God i bosim gut tingting bilong Daniel na i stiaim olgeta samting em i mekim long i stap bilong em. Ol tok bilong Baibel em i bin lainim taim em i pikinini, dispela i strongim em long bihainim Lo bilong God long ol samting bilong kaikai long taim em i yangpela man. (Daniel 1:⁠8) Bihain em i strongim bel na autim tok bilong God long ol king bilong Babilon. (Sindaun 29:25; Daniel 4:​19-25; 5:​22-28) Ol man i save long em olsem em i man bilong wok strong, em i no save giaman, na em i save mekim stretpela pasin. (Daniel 6:⁠4) Bikpela samting moa, Daniel i no brukim lo bilong Jehova bilong lukautim laip bilong em yet, nogat, em i bilip strong long Jehova. (Sindaun 3:​5, 6; Daniel 6:23) Dispela i mekim na God i “laikim em tumas”!

Long sampela samting, em i isi moa long yumi stadi long Baibel long nau, winim taim bilong Daniel. Bipo i gat ol bikpela skrol, tasol nau i gat ol buk em isi long ritim. Nau yumi gat Baibel olgeta, na em i stori long olsem wanem sampela tok profet bilong Daniel i bin kamap tru. Na tu, yumi gat planti buk na nius bilong helpim yumi long kisim sampela save moa.a Olsem wanem? Yu save mekim gutpela wok long ol dispela samting? Yu save makim taim long olgeta de bilong ritim Baibel na tingim tingim long bel? Sapos yu mekim olsem, gutpela samting bai kamap long dispela pasin bilong yu, olsem i bin kamap long Daniel. Bai yu inap long kisim strongpela bilip na pas gut moa wantaim Jehova. Tok Bilong God bai i stiaim gut laip bilong yu, na i helpim yu long save olsem God i tingim yu tru.

Beten Oltaim

Daniel em i man bilong beten oltaim. Em i beten askim God long ol samting i stret long laik bilong God. Taim em i yangpela man, King Nebukatnesar bilong Babilon i tok long kilim em i dai sapos em i no tokaut long as bilong driman bilong king. Wantu tasol Daniel i askim Jehova long helpim na lukautim em. (Daniel 2:​17, 18) Planti yia bihain, long pasin daun dispela gutpela profet i tokaut long sin bilong em yet na sin bilong lain Israel na em i askim Jehova long lusim rong bilong ol. (Daniel 9:​3-6, 20) Taim Daniel i no kliagut long sampela tok em holi spirit i bin givim long em, em i askim God long helpim em. Olsem na wanpela ensel i kam lukim Daniel bilong givim sampela save moa long em na ensel i tokim em: “God i bin harim beten bilong yu.”​—⁠Daniel 10:⁠12.

Tasol gutpela man Daniel i beten long God na i mekim sampela samting moa. Daniel 6:10 i tok: “Em i beten long God olsem oltaim em i save mekim. Em i save beten tripela taim long wanpela de.” I gat planti samting i stap olsem as na Daniel i tok tenkyu long Jehova na i litimapim nem bilong em. Na em i mekim olsem long olgeta taim. Tru tumas, beten em i bikpela samting long pasin bilong em long lotuim Jehova, na em i no inap lusim pasin bilong beten maski em i mas dai long dispela samting. Dispela i mekim na Jehova i amamas tru long em.

Pasin bilong beten em i wanpela gutpela presen tru, a? No ken lusim tru wanpela de long toktok wantaim Papa bilong yu long heven. Tok tenkyu na litimapim nem bilong em long ol gutpela pasin em i mekim. Kamapim gut ol hevi na wari bilong yu. Tingim olsem wanem Jehova i bin bekim beten bilong yu na tok tenkyu long dispela. Lusim bikpela haptaim long beten long Jehova. Taim yumi kamapim bel na tingting bilong yumi long Jehova long rot bilong beten, yumi bai pilim tru pasin laikim bilong em. Dispela i mas kirapim tru yumi long “beten long olgeta taim”!​—⁠Rom 12:⁠12.

Litimapim Nem Bilong Jehova

Pasin pren i no inap stap strong sapos wanpela i save tingting long em yet tasol. Dispela em i tru long pasin pren bilong yumi wantaim Jehova. Daniel i save long dispela samting. Tingim olsem wanem em i tingim tru pasin bilong litimapim nem bilong Jehova.

Taim God i bekim beten bilong em long rot bilong kamapim as bilong driman bilong Nebukatnesar, Daniel i tok: “God, mi litimapim nem bilong yu oltaim. Olgeta strong na save i bilong yu tasol.” Bihain, taim em i tokim Nebukatnesar long driman bilong em na i kamapim as bilong en, planti taim Daniel i litimapim nem bilong Jehova na i tok Jehova wanpela tasol em Man “i save kamapim as bilong ol samting i hait.” Olsem tasol, taim Daniel i beten askim God long lusim rong bilong em na kisim bek em, em i tok: “Bikpela . . . dispela taun Jerusalem wantaim ol manmeri bilong en i bilong yu tasol. Olsem na yu no ken wet. Tingim biknem bilong yu na helpim mipela kwiktaim.”​—⁠Daniel 2:​20, 28; 9:⁠19.

I gat planti rot we yumi ken bihainim dispela pasin bilong Daniel. Taim yumi beten, yumi inap kamapim tingting bilong yumi olsem “nem bilong [God] i mas i stap holi.” (Matyu 6:​9, 10) Yumi no laik tru bai pasin bilong yumi i bagarapim nem holi bilong Jehova, nogat. Oltaim yumi laik litimapim nem bilong Jehova long rot bilong tokim ol narapela long ol samting yumi lainim long gutnius bilong Kingdom bilong em.

Tru, yumi stap namel long ol manmeri em ol i no gat pasin laikim na ol i no save tingim tumas ol narapela. Tasol taim yumi tingim olsem Jehova i save tingim tru olgeta wan wan man i save lotu long em, dispela i save mekim gut bel bilong yumi. Olsem man bilong raitim song i tok: “Bikpela i laikim ol manmeri bilong en. Na em i save litimapim nem bilong ol man i save daunim ol yet, na mekim ol i winim pait.”​—⁠Song 149:⁠4.

[Futnot]

[Rait long pes 21]

God i kamapim olsem em i laikim tru Daniel na em i salim ensel Gebriel bilong strongim em

[Rait long pes 23]

Daniel i stadi na beten oltaim na dispela i mekim pasin bilong em i kamap gutpela moa na God i amamas long em