Yu Save Long Dispela?
Husat ‘ol manmeri i stap long haus bilong Sisar’ na ol i salim gude Kristen long ol Filipai long rot bilong Pol?
▪ Aposel Pol i stap long Rom na i raitim pas i go long kongrigesen Filipai long yia 60 i go inap 61 C.E., na dispela Sisar em i tok long en em Empera Niro. Tasol husat long haus bilong Niro i salim gude long ol Kristen i stap long Filipai?—Filipai 4:22.
Ating i no stret long yumi kisim tingting olsem dispela hap tok ‘ol manmeri i stap long haus bilong Sisar,’ i makim famili stret bilong em. Dispela tok i makim olgeta manmeri i mekim wok bilong Sisar, olsem ol wokboi nating wantaim ol friman em ol i stap long Rom na long ol provins i stap aninit long en. Olsem na dispela tok ‘ol manmeri i stap long haus bilong Sisar,’ i makim planti tausen wokman bilong Sisar. Sampela i save lukautim ol bikpela wok, olsem maneja samting, na sampela ol i stap olsem wokboi tasol bilong lukautim haus king, ol hap graun, na gaden samting. Sampela i mekim wok insait long edministresen bilong gavman.
I luk olsem sampela wokman bilong empera long Rom ol i bin kamap Kristen. Ating ol i bin kamap Kristen long rot bilong wok autim tok Pol i bin mekim long Rom. Tasol maski ol i kamap Kristen long wanem rot, ol i tingim tru kongrigesen long Filipai. Filipai em wanpela ples ol Rom i bosim, na planti soldia na wokman bilong gavman i ritaia pinis ol i sindaun long dispela ples, olsem na ating sampela Kristen long dispela hap ol i pren bilong ol Kristen husat i bin salim gude long rot bilong Pol.
Lo Bilong Moses i kolim wanem pasin bilong marit taim man bilong meri i dai?
▪ Long Israel bilong bipo, sapos man i dai na em i no gat pikinini man, brata bilong em i mas maritim meri bilong em bilong kamapim pikinini na bai lain famili bilong man i dai pinis i no ken pinis. (Stat 38:8) Bihain dispela pasin i kamap hap bilong Lo Bilong Moses. (Lo 25:5, 6) Pasin em Boas i bin mekim olsem Buk Rut i stori long en, i soim olsem sapos man i dai pinis i no gat wanpela brata i stap laip yet, orait wanpela man long lain famili bilong em i mas maritim meri bilong em.—Rut 1:3, 4; 2:19, 20; 4:1-6.
Yumi ken save, dispela kain marit i bin stap yet long taim bilong Jisas, long wanem, ol Sadyusi i bin toktok long en, olsem yumi lukim long Mak 12:20-22. Wanpela saveman Juda long taim bilong ol aposel, em Flavius Josifas, em i tok dispela pasin i mekim na famili nem bilong man i no inap pinis, na tu, graun bilong em i stap gut long famili bilong em na dispela i lukautim meri bilong em na em i no inap sot long ol samting. Long dispela taim bipo, taim man i dai pinis, meri bilong em i no inap kisim graun bilong em. Tasol taim brata bilong dispela man i maritim meri bilong em na tupela i kamapim pikinini man, dispela pikinini bai kisim graun bilong man i dai pinis.
Sapos man i no laik bihainim dispela pasin bilong marit, Lo i orait long dispela. Tasol man bai kisim bikpela sem tru sapos em “i no laik helpim brata bilong em long mekim lain famili bilong en i go het.”—Lo 25:7-10; Rut 4:7, 8.