I Stap Bilong Yu Inap Kamap Gutpela Long Bihain​—Olsem Wanem?

OLSEM WANEM yu inap mekim i stap bilong yu i kamap gutpela tru? Wanpela rot em long yusim save bilong yu long skelim ol samting yu tingting pinis long mekim na tingim dispela bai mekim wanem long i stap bilong yu long bihain.

Tru, ating bai yu hatwok long mekim ol disisen inap helpim yu long laip olgeta bilong yu. Bilong wanem? Long wanem, long nau planti manmeri i strong long kisim hariap ol samting ol i laikim. Ating yu luksave, sapos yu bihainim ol tok bilong Baibel, dispela inap helpim famili bilong yu long pas gut wantaim. (Efesus 5:22–6:4) Tasol bilong mekim olsem, yu mas lusim haptaim long helpim famili, na sakim pasin bilong tingting oltaim long wok, malolo, o painim amamas. Olsem long planti samting long laip, yu mas skelim samting bai yu mekim—bai yu wok long inapim kwik ol laik bilong skin, o makim samting bai helpim yu long bihain. Olsem wanem yu inap kisim strong bilong makim stretpela rot bilong bihainim? Mekim dispela 4-pela samting.

1 Tingim Samting Bai Kamap Long Ol Disisen Yu Mekim

Taim yu mas skelim wanpela samting yu bai mekim, piksaim gut long tingting ol samting inap kamap long dispela. Baibel i tok: “Man i gat gutpela tingting, em i save olsem, hevi i laik kamap long em na em i abrusim.” (Sindaun 22:3) Sapos yu tingim gut ol samting inap kamap long ol disisen bilong yu, dispela bai kirapim yu long abrusim rot i gat hevi long en. Tasol sapos yu tingim ol gutpela samting em gutpela disisen inap kamapim long bihain, dispela bai strongim yu long wokim ol gutpela disisen.

Askim yu yet: ‘Wanem samting bai kamap long ol disisen bilong mi inap wanpela yia bihain, o 10-pela o 20 yia bihain? Dispela bai nogutim bel na tingting na skin bilong mi o olsem wanem? Na samting mi tingting long mekim, em bai mekim wanem long famili bilong mi na ol narapela mi save tingim ol?’ Na bikpela samting moa, askim yu yet: ‘Bai God i amamas long samting mi tingting pinis long mekim? Dispela bai helpim mi long kamap pren tru bilong em?’ Spirit bilong God i bin kamapim ol tok bilong Baibel, olsem na em inap helpim yu long save ol samting God i laikim, na luksave long ol samting nogut inap pundaunim yu, na yu inap abrusim.—Sindaun 14:12; 2 Timoti 3:16.

2 Skelim Ol Samting Yu Inap Mekim

Planti man i no laik wokim disisen bilong ol yet, ol i save bihainim tasol tingting bilong ol narapela. Tasol maski planti man i bihainim wanpela rot, yu no ken ting i stap bilong yu tu bai kamap gutpela sapos yu bihainim wankain rot. Skelim gut ol disisen yu inap mekim. Tingim Natalie.a Em i tok: “Mi laik bai marit bilong mi i gutpela. Tasol mi lukim olsem rot mi bihainim i no inap helpim mi long mekim olsem. Long yunivesiti, olgeta yangpela pren bilong mi ol i gat bikpela save. Tasol oltaim ol i mekim ol disisen i no gutpela. Oltaim ol i save senisim ol boipren o gelpren. Mi tu mi gat sampela boipren. Mi kisim bikpela bel hevi tru long pasin mi bihainim.”

Natalie i kirap stadi long Baibel wantaim ol Witnes Bilong Jehova. Em i tok: “Namel long ol Witnes mi lukim ol yangpela i stap amamas na ol marit i pas gut wantaim. Tru, i hatwok long mi, tasol isi isi mi wok long senisim tingting na pasin bilong mi.” Wanem samting i kamap? Em i tok: “Oltaim mi gat laik long maritim wanpela man mi inap rispek tru long en. Bihain, mi maritim wanpela man i gat wankain bilip olsem mi. Mi pilim olsem God i bin givim mi wanpela gutpela famili na i stap bilong mi i kamap gutpela tru.”

3 Tingim i Stap Bilong Yu Long Bihain

Bilong sakim tingting long kisim ol samting long nau tasol, yu mas tingim tu ol samting yu mas i gat long bihain, na mekim plen long olsem wanem yu inap kisim ol dispela samting. (Sindaun 21:5) Yu no ken tingting tasol long 70 o 80 yia bihain, em ol yia bilong laip bilong yumi long nau. Piksaim long tingting olsem yu bai stap oltaim oltaim, olsem Baibel i tok promis long en.

Baibel i tok, long ofa bilong Krais Jisas bilong baim bek ol man, God i bin wokim rot bambai ol manmeri inap kisim laip i stap oltaim. (Matyu 20:28; Rom 6:23) God i promis pinis olsem klostu nau bai em i kamapim tru ol samting em i tingting pinis long en bilong helpim ol man na dispela graun. Ol man i laikim tumas God ol bai i gat rot long i stap oltaim long graun i kamap gutpela gen. (Song 37:11; Revelesen 21:3-5) Yu inap kisim kain gutpela sindaun olsem sapos yu tingim ol samting bai kamap bihain.

4 Wok Strong Long Winim Ol Mak Yu Bin Putim

Yu ken mekim wanem bilong i stap long dispela gutpela taim bihain? Pastaim yu mas kisim save long God. (Jon 17:3) Stretpela save bilong Baibel bai strongim bilip bilong yu olsem olgeta samting God i bin promis long mekim bihain ol bai kamap tru. Kain bilip olsem bai strongim yu long senisim ol pasin God i no laikim na bai em i ken orait long yu.

Tingim stori bilong Michael. Em i tok: “Taim mi gat 12-pela krismas mi kirap long dring planti na kisim drak. Mi insait long wanpela bikhetlain, na mi ting bai mi dai taim mi no winim yet 30 krismas. Mi save belhat na bel nogut oltaim, na dispela i mekim na planti taim mi laik suasaid. Mi ting laip bilong yumi man i mas gutpela moa, tasol mi no inap painim kain laip olsem.” Taim Michael i stap yet long haiskul, wanpela wanlain i kirap stadi long Baibel wantaim ol Witnes Bilong Jehova. Michael tu i laik mekim olsem.

Ol tok bilong Baibel em Michael i lainim i helpim em long senisim tingting long ol samting bai painim em long bihain. Em i tok: “Mi kisim save olsem bihain dispela graun bai kamap Paradais gen na ol manmeri bai stap bel isi na i no gat moa hevi. Mi tingim olsem laip bilong mi long bihain bai kain olsem. Mi putim mak olsem mi laik kamap pren bilong Jehova. Tasol sampela taim mi pundaun long mekim olsem. Taim mi kirap pinis long stadi long Baibel, sampela taim mi dring spak. Na wanpela taim mi slip wantaim wanpela yangpela meri.”

Olsem wanem Michael inap lusim ol dispela pasin na senisim rot em i bihainim? Em i tok: “Man bilong skulim mi long Baibel i tok, mi mas ritim Baibel long olgeta de na poroman wantaim ol lain i laik mekim ol samting God i laikim. Mi luksave olsem ol wanlain i wok long stiaim yet pasin na tingting bilong mi. Maski ol i bin stap olsem famili bilong mi, mi lusim ol.”

Michael i putim sampela mak em i laik winim insait long sotpela taim, na dispela i helpim em long winim bikpela mak em i bin putim, em bilong mekim wokabaut bilong em i kamap stret wantaim ol lo bilong God. Yu tu inap mekim olsem. Raitim long pepa bikpela mak yu laik winim bihain, na ol samting nau yu mas mekim bilong winim dispela mak. Kamapim tingting bilong yu long ol man em ol bai strongim yu, na askim ol long helpim yu long skelim olsem yu wok long winim dispela mak o olsem wanem.

Yu no ken surikim taim bilong kisim save long God na bihainim ol tok bilong em bilong soim rot long yu. Kirap nau long mekim ol samting bilong strongim pasin bilong yu long laikim God na ol tok bilong Baibel. Baibel i tok long man i save bihainim ol stiatok bilong Baibel olsem: “Olgeta samting em i mekim i save kamap gutpela.”—Song 1:1-3.

[Futnot]