“Mi lukim pasin ol man i mekim long ol meri na mi no laik tru long kamap meri.”—ZAHRA, 15 KRISMAS, tok bilong em i stap long nius GEO, long tok Frans.
TOK bilong dispela yangpela gel olsem i stap long han sut i makim stret samting i save painim ol meri—long olgeta hap bilong graun ol man i save mekim nogut na daunim ol yangpela gel na ol meri i bikpela pinis. Tingim ol dispela samting i bin kamap.
Daunim ol meri. Long Esia, planti papamama i laikim ol pikinini man, na ol i no laikim ol pikinini meri. Wanpela ripot bilong lain Yunaitet Nesen bilong yia 2011 i tok, long Esia klostu 134 milion meri i no stap laip bikos ol mama i rausim bel, kilim i dai ol bebi gel, na ol i no lukautim ol gut.
Ediukesen. Winim 60 pesen bilong ol meri long olgeta hap i kisim liklik skul tasol, olsem aninit long 4-pela yia.
Man i fosim meri bilong em long slip wantaim em. Winim 2.6 bilion meri i stap long ol kantri we ol man i fosim strong meri bilong ol long slip wantaim ol na lo i no gat tok long dispela pasin.
Helt. Long ol kantri i stap rabis, insait long olgeta 2-pela 2-pela minit wanpela meri i save dai taim em i gat bel o taim em i hatwok long karim pikinini, long wanem, i no gat gutpela marasin samting bilong helpim ol.
Raits bilong kisim graun o haus. Maski ol meri i wok hat long groim winim 50 pesen bilong ol kaikai long olgeta hap bilong graun, long planti kantri ol i no gat raits bilong kisim graun o haus.
Bilong wanem ol meri i no gat kain raits olsem? Long sampela kantri ol man i bihainim bilip bilong lotu na ol pasin bilong ples we i orait long ol man i ken mekim nogut long ol meri. Wanpela nius bilong Frans i kamapim tok bilong wanpela loya bilong India, em Chandra Rami Chopra, olsem: “Olgeta lo bilong lotu i kamapim wankain tingting: Ol i sapotim pasin bilong daunim ol meri.”
Yu tu i gat wankain tingting olsem? Yu ting Baibel i daunim ol meri olsem ol narapela buk bilong lotu i mekim? Sampela man i ting i gat sampela ves bilong Baibel i kamapim dispela tingting. Tasol dispela God em Baibel i stori long en, em i gat wanem tingting long ol meri? Planti man i strong long holimpas tingting bilong ol yet long dispela samting, tasol yumi inap painim bekim bilong dispela askim sapos yumi skelim gut ol tok bilong Baibel.
