Nau Mi Save Long God Mi Lotuim

MAMA i bin karim mi long taun Ilocos Norte, Filipins, long Disemba 10, 1968, na mi namba 7 bilong ol 10-pela pikinini bilong em. Olsem ol narapela Filipino, mipela i kamap bikpela long lotu Katolik. Mi gretiuet long haiskul long 1986 na mi gat laik long kamap wanpela nes. Tasol dispela laik bilong mi i no kamap tru, long wanem, mi kisim wanpela bikpela sik. Mi ting mi bai dai. Long dispela taim mi bel hevi tru na askim God long helpim mi, na mi tokim God olsem sapos mi kamap orait bai mi mekim wok bilong em long laip olgeta bilong mi.

Longpela haptaim i lus paslain long mi kamap orait gen, tasol mi tingim yet promis mi bin mekim long God. Olsem na long Jun 1991, mi kirap skul long Pentikostal Baibel skul. Ol i tok olsem wanpela bilong ol program bilong dispela skul em long kisim “presen bilong holi spirit.” Mi laik kisim pawa bilong oraitim ol sikman. Skul i lainim mipela olsem mipela inap kisim dispela pawa long rot bilong tambu long kaikai na beten. Wanpela taim mi tingting long soim olsem mi gat dispela “presen,” olsem na mi hait na putim yau long wanpela wanklas bilong mi i beten strong long kona bilong haus long wanpela bung bilong beten. Klostu long em i pinisim beten bilong em, mi hariap i go bek long ples mi bin brukim skru long en. Bihain tasol long dispela, mi tokim em long ol samting em i bin askim long en insait long beten bilong em, na em i bilip olsem mi gat dispela “presen”!

Taim mi wok long skul yet i stap, mi gat planti askim. Olsem, Matyu 6:9 i tok long “Papa” na “nem” bilong em. Mi mekim ol kain askim olsem: “Husat dispela Papa em Jisas i kolim?” na “Nem bilong husat i mas i stap holi?” Ol bekim bilong ol tisa bilong mi i no klia na mi no amamas long en. Ol i tok God Triwan em i wanpela tok hait i hatwok long save long en. Dispela i paulim tingting bilong mi. Maski i olsem, mi skul yet long kamap pasto.

Bungim Ol Witnes Bilong Jehova

Long Baibel skul, ol i lainim mipela olsem ol Witnes Bilong Jehova i sapotim wok nogut bilong lotu giaman. Ol man i kolim ol Witnes olsem antikrais. Mi kirap long heitim tru dispela lotu.

Long skul holide bilong mi long namba 2 yia, mi go long ples long visitim papamama bilong mi. Wanpela bikpela susa bilong mi, nem bilong em Carmen, em i harim olsem mi stap long haus na em i kam lukim mi. Em i baptais pinis olsem wanpela Witnes Bilong Jehova na em i save autim tok fultaim. Taim em i laik skulim mi long God, mi kros na tok: “Mi save pinis long God mi lotuim!” Mi bikmaus na krosim em na pusim em i go, na mi no larim em i toktok gen wantaim mi.

Taim mi go bek long Baibel skul, Carmen i salim wanpela buklet i kam long mi, nem bilong en Gutpela Yu Bilip Long God Triwan o Nogat?a Taim mi kisim dispela buklet, mi skwisim tasol na tromoi long paia. Mi belhat yet long em.

Sampela Wok Moa Olsem Pasto

Taim mi stap yet long Baibel skul, mi bin helpim sampela manmeri long i kam insait long lotu bilong mi. Mi amamas tru taim mama na bikbrata bilong mi i kam joinim mi long lotu Pentikostal.

Long Mas 1994, mi gretiuet long Pentikostal Baibel skul. Olsem mi stori pinis, wanpela evanjelis i kam i stap long dispela taim bilong gretiuesen. Mipela olgeta lain i gretiuet i laik stap wantaim em, long wanem, mipela i bilip olsem em i gat presen bilong oraitim ol sikman. Mipela i stap wantaim em long pletfom na kalap na paitim han wantaim em long taim ol man i pilaim musik. Bihain, olgeta man em evanjelis i tatsim ol i “kisim spirit”b na pundaun. Taim em i tatsim mi, mi tu i airaun na pundaun. Taim mi kisim bek tingting, mi pret, tasol mi pilim olsem nau mi gat pawa long oraitim ol sikman, olsem na mi amamas.

Bihain tasol long dispela, mi yusim dispela pawa long oraitim wanpela pikinini husat i bin kisim bikpela fiva. Taim mi mekim beten, wantu tasol pikinini i tuhat na sik bilong em i pinis. Nau mi pilim olsem mi inapim promis mi bin mekim long God. Tasol mi pilim olsem mi sot yet long sampela samting. Mi pilim olsem i gat wanpela God tasol i stap, tasol mi no save em i husat tru. Mi holim tupela tingting yet long planti bilip bilong lotu.

Ol Samting i Senisim Tingting Bilong Mi

Bihain long ol dispela samting i kamap, mi birua nogut tru long ol Witnes Bilong Jehova. Olgeta taim mi lukim ol buk na nius bilong ol Witnes, mi save kukim long paia. Orait nau, wanpela samting mi no bin tingim i kamap. Mi kirap nogut long lukim olsem Mama i no moa laikim lotu bilong mipela. Carmen i bin stadi wantaim em long Baibel! Mi belhat tru long susa bilong mi.

Mi lukim wanpela nius Kirap! long haus bilong Mama. Planti taim mi save kukim ol dispela nius. Tasol mi laik save long samting em i wok long ritim, olsem na mi opim na lukim ol tok i stap insait long en. Mi lukim wanpela atikol i stori long wanpela man husat i bilip strong long ol tok em lotu i skulim em long en. Tasol taim em i kirap ritim ol buk na nius bilong ol Witnes na skelim wantaim Baibel, em i luksave olsem bilip bilong God Triwan, helpaia, na ol man i gat spirit i no save dai, em ol bilip i no stap long Baibel. Mi pilim tru long bel ol dispela tok. Em ol bilip mi laik kliagut long en. Kirap long dispela taim, mi gat laik tru long kliagut moa long ol tok i tru bilong Baibel.

Bihain long mi ritim narapela stori long nius Kirap! long wanpela man husat i save dring alkohol oltaim na kisim drak, em i mekim ol bikpela senis long laip bilong em, long wanem, em i stadi long Baibel, dispela i kirapim mi long ritim moa ol buk na nius bilong ol Witnes. Mi kisim buklet The Divine Name That Will Endure Forever.c Taim mi ritim dispela nius, mi kisim save olsem nem bilong God em Jehova. Mi amamas tru long kisim stretpela save long dispela wanpela God tru!—Lo 4:39; Jeremaia 10:10.

Mi wok long hait na ritim ol dispela nius na mi kisim save long planti tok i tru bilong Baibel. Olsem, long Pentikostal skul ol i bin skulim mipela olsem Jisas em i God, tasol long rot bilong Baibel mi kisim save olsem Jisas em i “Pikinini bilong dispela God i stap laip.”—Matyu 16:15, 16.

Bel na Tingting Bilong Mi i Senis

Taim mi bungim gen Carmen, em i kirap nogut taim mi askim em long givim mi buklet The Divine Name That Will Endure Forever, na sampela narapela buk na nius. Mi bin stap long Baibel skul inap planti yia, tasol long dispela hap ol i no skulim mi long tok i tru, i olsem ol i mekim mi i kamap aipas. Nau bel bilong mi i pulap tru long amamas, long wanem, mi wok long kisim save long ol tok i tru i stap long Baibel. Mi pilim tru tok bilong Jisas olsem: “Yupela bai save long tok i tru, na tok i tru bai mekim yupela i kamap fri.” (Jon 8:32) Ol dispela tok i tru i wok long senisim laip bilong mi.

Inap sampela haptaim, mi ting olsem bai mi hait na lotuim God Jehova, na mekim yet wok olsem pasto. Tasol i no longtaim na mi luksave olsem mi no inap moa long skulim ol man long ol bilip bilong Misin. Maski i olsem, mi pret. Bai mi kisim mani olsem wanem bilong lukautim mi yet sapos mi risain long wok pasto? Misin bai sem tru sapos wanpela pasto bilong ol i kamap wanpela Witnes Bilong Jehova! Olsem na mi wok yet olsem pasto, tasol mi wok long abrusim ol bilip giaman bilong Misin na mi no skulim ol man long en.

Taim mi lukim gen susa bilong mi, Carmen, em i tokim mi long i go long wanpela miting bilong ol Witnes Bilong Jehova. Mi save go long bikpela haus lotu bilong mipela long Laoag City, olsem na mi hait na painim Haus Kingdom bilong ol Witnes long dispela hap. Mi bungim Alma Preciosa Villarin, niknem bilong em “Precious,” em wanpela meri long dispela kongrigesen husat i save autim tok fultaim. Maski mi bel nogut yet long ol Witnes, mi orait long em i stadi wantaim mi long Baibel.

Susa bilong mi i no bin les kwik long kamapim ol tok i tru bilong Baibel long mi. Nau mi lukim olsem Precious tu i gat dispela pasin bilong i no les kwik. Em i helpim mi gut long kliagut long ol tok bilong Baibel, maski mi save belhat, traim long kros wantaim em, tok strong, na strongim sait bilong sampela bilip mi bin holim bipo. Tasol mi pilim tru pasin bilong Precious na ol narapela Witnes long tingim mi, mekim pasin daun, na mekim pasin isi. Dispela i mekim na mi gat laik long lotuim Jehova.

Long Julai 1995, mi luksave olsem i no gat narapela rot i stap, sapos mi laik amamasim God, orait mi mas lusim wok bilong mi olsem pasto. Bilong wanem mi mas mekim olsem? Revelesen 18:4 i tok piksa long ol lotu giaman na i tok: “Ol manmeri bilong mi, sapos yupela i no laik poroman wantaim em long ol sin bilong en, na sapos yupela i no laik kisim hap bilong ol pe nogut bilong en, orait yupela i mas lusim dispela ples na kam ausait.” Bai mi kisim mani olsem wanem bilong lukautim mi yet? Tok bilong Hibru 13:5 i skulim mi olsem sapos yumi mekim wok bilong God, em i tok promis olsem: “Mi no inap tru long lusim yu o givim baksait long yu long wanpela samting.”

Nau Papa na brata bilong mi i birua tru long mi, tasol tupela wik paslain long mi kisim baptais olsem wanpela Witnes, mi strongim bel na mi go long haus na kukim olgeta samting em bipo mi bin yusim taim mi mekim wok olsem pasto. Bihain long mi mekim olsem, mi luksave olsem olgeta kain spesel pawa mi bin kisim bipo i no stap moa. Bipo, taim mi slip mi save pilim olsem olgeta taim wanpela samting i stap antap long mi. Nau mi no pilim moa dispela samting. Na ol sedo mi save lukim long windo bilong rum bilong mi, nau mi no save lukim moa. Mi stadi long Baibel na mi kisim save olsem olgeta kain presen ol man i save kisim long nau, olsem pawa bilong oraitim sikman, ol i no kam long God, nogat, ol i kam long ol spirit nogut. Mi amamas tru olsem mi no kalabus moa long strong bilong ol, wankain olsem dispela wokmeri em “wanpela spirit nogut i stap long em” na Pol na Barnabas i bin oraitim em.—Aposel 16:16-18.

Mi amamas tru taim mitupela Mama wantaim i redi long kisim baptais olsem ol Witnes Bilong Jehova long Septemba 1996! Bihain long mi baptais, mi insait long wok bilong autim tok fultaim olsem wanpela Witnes Bilong Jehova na mi amamas tru long mekim olsem inap planti yia.

Nau mi maritim Silver. Mitupela wantaim i wok strong long skulim pikinini meri bilong mipela long ol tok i tru bilong Baibel. Sampela bratasusa bilong mi ol tu i joinim mipela long mekim wok bilong Jehova. Maski mi bel hevi olsem inap planti yia mi no bin save long God, mi amamas tru olsem nau mi save long God mi lotuim.