SAMPELA taim yu gat laik tru long kisim wanpela samting?—a Sapos olsem, orait yu wankain long planti narapela. Tasol yu ting yu mas tok giaman bilong kisim samting yu laikim?— Nogat, yu no ken mekim olsem. Man i mekim kain pasin olsem em i gridi. Yumi ken stori long olsem wanem gridi pasin i bagarapim wanpela man nem bilong em Gehasi. Em i wokman bilong Elisa em profet bilong God tru, Jehova.
Elisa na Gehasi i bin stap olsem wan tausen yia samting paslain long Pikinini Bilong God, em Jisas, i kamap long graun. Jehova i yusim Elisa bilong mekim ol gutpela wok tru—em long wokim ol mirakel! Olsem, Baibel i stori long wanpela bikman long ami bilong Siria husat i gat sik lepra. I no gat man inap oraitim em, tasol Elisa i oraitim em.
Taim God i yusim Elisa long oraitim sik bilong ol man, Elisa i no save kisim mani olsem pe long dispela wok. Bilong wanem em i mekim olsem?— Bikos Elisa i save olsem Jehova i as bilong ol dispela mirakel na i no em yet. Taim sik bilong Naman i pinis, em i amamas tru na em i laik givim gol, silva, na ol gutpela klos olsem presen long Elisa. Elisa i no laik kisim wanpela samting, tasol Gehasi i gat laik tru long kisim ol dispela presen.
Taim Naman i lusim ol na i go, Gehasi i bihainim em i go na em i no toksave long Elisa. Taim em i go bungim Naman, yu save Gehasi i tok wanem long em?— Em i tok, ‘Elisa i salim mi kam tokim yu olsem nau tasol tupela man i kam. Em i laik yu givim tupela klos bambai em i ken givim long dispela tupela man.’
Tasol dispela em i tok giaman! Gehasi i kamapim stori bilong em yet long dispela tupela man. Em i tok olsem, long wanem, em yet i laikim ol dispela klos em Naman i bin laik givim long Elisa. Tasol Naman i no save long dispela. Olsem na em i amamas long givim ol presen long Gehasi. Naman i givim planti samting moa long Gehasi, winim ol samting em Gehasi i askim long en. Yu save long wanem samting i kamap bihain?—
Taim Gehasi i go bek long haus, Elisa i askim em: ‘Yu go we na yu kam?’
Gehasi i tok: “Mi no bin i go long wanpela hap.” Tasol Jehova i bin helpim Elisa long save long samting Gehasi i bin mekim. Olsem na Elisa i tok: ‘Nau i no taim bilong kisim mani na klos!’
Gehasi i bin kisim mani na klos i no bilong em. Olsem na God i mekim sik lepra bilong Naman i kalap long Gehasi. Yumi inap kisim wanem skul long dispela?— Wanpela skul yumi inap kisim long dispela stori em olsem, yumi no ken kamapim ol stori i no tru.
Bilong wanem Gehasi i kamapim wanpela stori i no tru na em i tok giaman?— Bikos Gehasi i gridi. Em i gat laik long kisim ol samting i no bilong em, na em i traim long kisim ol dispela samting long rot bilong tok giaman. Dispela i mekim na em i karim hevi long wanpela sik nogut inap long laip olgeta bilong em.
Tru tru Gehasi i kisim wanpela bikpela hevi moa winim sik lepra. Yu save long wanem dispela hevi?— God i no orait moa long em na i no laikim em moa. Yumi no laik mekim wanpela samting we God bai i no orait moa long yumi! I gutpela yumi mekim gutpela pasin na redi long serim ol samting yumi gat.
