FRAN PES STORI | OL MAN I DAI PINIS BAI STAP LAIP GEN
Ol Man i Painim Rot Bilong Daunim Indai
EMPERA QIN SHI HUANG
PONCE DE LEÓN EM MAN BILONG RAUN NA PAINIM OL NARAPELA PLES
Indai em wanpela birua yumi pret tru long en. Yumi save wok strong long daunim indai. Taim wanpela yumi laikim tru em i dai, yumi no inap bilip long dispela. O taim yumi yangpela, yumi inap ting dai i no inap painim yumi—em wanpela tingting yumi laik holim strong inap longpela taim.
Ol Fero bilong bipo i tingting planti long indai. Ol i lusim bikpela haptaim long laip bilong ol na laip bilong planti tausen wokman long painim rot bilong daunim indai. Ol piramid ol i wokim i kamapim klia dispela samting, tasol tu, ol piramid i soim olsem wok bilong ol i lus nating.
Ol empera bilong Saina tu i painim rot bilong stap laip oltaim, ol i traim long painim marasin i givim laip long man. Empera Qin Shi Huang i tokim ol saientis long painim mejik marasin i stopim man long dai. Tasol planti marasin ol i wokim i gat posin mekuri long en, na i luk olsem wanpela marasin ol saientis i wokim i kilim i dai dispela empera.
Long yia 1513 C.E., Juan Ponce de León bilong Spen, man bilong raun na painim ol narapela ples, em i raun long sip long Karibian na wok long painim hulwara i gat wara bilong mekim man i stap yangpela oltaim. Taim em i raun olsem, em i painim Florida, Amerika, tasol em i dai sampela yia bihain taim em i pait wantaim ol asples bilong Amerika. Na ol man i no bin painim wanpela hulwara bilong mekim man i stap yangpela oltaim.
Ol Fero, ol empera, na ol man bilong raun na painim ol narapela ples, ol i laik painim rot bilong daunim indai. Na yumi ting samting ol i laik painim em gutpela, maski yumi no wanbel long wei bilong ol long mekim dispela wok. Tru tumas, yumi olgeta i laik i stap laip.
YU TING YUMI INAP PINISIM INDAI?
Bilong wanem yumi no laik dai? Baibel i kamapim risen bilong dispela. Baibel i tok long Krieta bilong yumi, God Jehova,a olsem: “Em i wokim olgeta samting i gutpela tru na i kamap long taim bilong en. Em i putim tingting bilong laip i stap oltaim long bel bilong ol man.” (Saveman 3:11, NW) Yumi laik stap oltaim long dispela naispela graun, na yumi no laik stap 70 o 80 yia tasol. (Song 90:10) Em samting yumi gat bikpela laik tru long en.
Bilong wanem God i putim “tingting bilong laip i stap oltaim” long bel bilong yumi? Bilong mekim yumi bel hevi? God i no inap mekim olsem, nogat tru. Em i tok promis olsem taim bai kamap we indai bai pinis. Planti taim Baibel i tok olsem dai bai pinis na God i promis pinis long givim laip oltaim.—Lukim blok “Indai Bai Pinis.”
Jisas Krais yet i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Olsem na i gat rot bilong winim na daunim indai. Na Jisas i tok God tasol inap pinisim tru indai.
a Jehova em nem bilong God olsem Baibel i kamapim.