No Gat Man Inap Abrusim dai

TINGIM olsem yu watsim vidio bilong wanpela meri i gat biknem, ating em i gat biknem long musik na yu laikim em tru. Vidio i kirap wantaim ol piksa bilong em taim em i liklik yet, ol musik lesen, na ol prektis bilong em. Bihain yu lukim em i pilai long ol konset, go long planti kantri, na planti man i save long em. Bihain liklik, vidio i soim ol gutpela samting long laip bilong em, na nau taim vidio i pinis—em i dai.

Dispela vidio i no stori nating, nogat, em samting tru i bin kamap long laip bilong wanpela meri. Maski em wanpela man i save pilaim musik, saientis, man bilong pilai spot, o man em planti i save long em, stori bilong ol i wankain tasol. Ating dispela man o meri i bin mekim planti samting, na yu tingting sapos em i no go lapun na dai em inap mekim planti samting moa?

Sori tru, em samting bai painim yumi olgeta. (Eklisiastis 9:5) Maski yumi painim kain kain rot, yumi no inap abrusim hevi bilong lapun na dai. Na tu, wanpela eksiden o bikpela sik inap painim yumi na yumi stap sotpela taim tasol. Olsem Baibel i tok, yumi olsem smok bilong moning “i kamap na i save stap liklik taim tasol na bihain em i lus nating.”—Jems 4:14.

Sampela i pilim olsem ol i no save long samting bai kamap na i no gat risen long stap laip, olsem na ol i tok “yumi kaikai na dring, long wanem, tumora bai yumi dai.” (1 Korin 15:32) Olsem wanem? Yu ting dispela kain tingting long dai i stret? Bihain, sapos wanpela hevi i painim yu—ating yu laik save, ‘Yumi bilong i stap nau tasol?’ Bai yu kisim bekim we?

Planti i ting saiens bai bekim dispela askim. Save bilong saiens na marasin i helpim yumi long stap laip longpela taim liklik. Na sampela saientis i laik helpim ol man long stap laip longpela taim moa. Maski wok painimaut bilong ol i kamapim ol gutpela samting o nogat, dispela askim i stap yet: Bilong wanem yumi save go lapun na dai? Yu ting yumi ken bilip olsem dai dispela birua bai pinis? Ol atikol i kamap bihain bai stori long ol dispela topik na bekim dispela askim, Yumi bilong i stap nau tasol?