Strongim Bel Bilong Ol Brata
1 Pol i tok: Yumi “olgeta i man bilong lait na bilong san.” Em i tok ai bilong yumi i mas op, na tingting bilong yumi i mas klia, na yumi mas pasim olgeta klos pait bilong yumi. Bilong wanem yumi mas mekim olsem? Long wanem God “i makim yumi bai Jisas Krais, Bikpela bilong yumi, em i ken kisim bek yumi. . . . Olsem na yupela wan wan i mas . . . strongim bel bilong ol [brata], olsem nau yupela i save mekim.” (1 Te 5:5-11) Yumi stap long taim bilong pinis bilong dispela pasin nogut nau i stap long graun; liklik taim tasol na wantu bai dispela pasin i pinis. Olsem na i gat gutpela as na yumi mas wok long strongim ol brata. Olsem wanem yumi ken strongim ol brata?
WANPELA ROT BILONG STRONGIM OL BRATA SISTA, EM OLSEM
2 Yumi ken autim tok wantaim ol. Yumi mas save gut long ol brata. Taim yumi autim tok wantaim ol, yumi ken stori wantaim ol long ol gutpela ekspiriens bilong yumi na harim ol gutpela ekspiriens bilong ol. Na narapela inap helpim narapela long autim tok. Olsem na taim yumi mekim wok bilong yumi long autim tok na kamapim disaipel, yumi inap helpim na strongim ol brata sista bilong yumi tu. (Mal 3:16; Mt 28:19, 20) Gutpela sapos yu makim taim bilong autim tok wantaim wanpela brata o sista, em yu no bin autim tok wantaim em bipo.
MAKIM GUTPELA PASIN OL NARAPELA I KEN BIHAINIM
3 Aposel Pol i save, gutpela pasin bilong em i bin helpim na strongim ol brata. (Fl 1:12-14) Taim yumi bihainim gutpela pasin, maski yumi mekim liklik samting tasol, dispela samting inap strongim ol brata. Olsem: Taim yu laik autim tok, yu save go bung wantaim grup? Yu redi gut pastaim na yu kaunim pinis ol tok bilong buk o nius yu laik tilim? Yu save tingim gut ol tok yu laik mekim bilong tilim dispela buk o nius? Sapos yu redi gut olsem, orait yu makim gutpela pasin ol narapela i ken bihainim, na bai yu inap autim gut tok.
NUPELA MAN NA PABLISA I LUSIM WOK AUTIM TOK
4 Planti nupela man na planti brata i bin lusim wok autim tok ol i bin i kam long Memorial long Epril. Yumi mas helpim ol na strongim ol bambai ol inap kam long olgeta miting na kamap strong long spirit.—Hi 10:24, 25.
5 Olsem wanem long sampela brata ol i save autim tok na kam long miting long wan wan taim tasol? Ating ol i gat sampela hevi na ol i stap bel hevi? Olsem wanem? Yu inap singautim kain man olsem long i go autim tok wantaim yu o long i go long wanpela Baibel-stadi bilong yu? Taim kongrigesen olgeta i mekim wanpela wok, yu inap singautim dispela man tu i kam na insait long dispela wok? Sapos long taim stret yumi mekim gutpela tok na givim gutpela tingting long ol man i bel hevi, dispela inap helpim ol.—Snd 25:11.
6 Taim yumi pasim gut olgeta klos pait bilong spirit na yumi wok long helpim ol brata bilong yumi long mekim olsem tu, yumi bihainim gutpela tok aposel i givim long yumi. Em i tok, yumi mas “helpim ol man i no inap helpim ol yet.” Na yumi bai pilim tru tok bilong Jisas, em i tok “amamas bilong man i givim samting long ol arapela man, dispela i winim amamas bilong man i kisim samting bilong em yet.”—Ap 20:35.
[Ol Askim]
1. (a) Bilong wanem ai bilong yumi i mas op na tingting bilong yumi i mas klia? (b) I gat wanem gutpela as na yumi mas strongim ol brata?
2. (a) Stori long wanpela rot bilong strongim ol brata. (b) Olsem wanem narapela inap helpim narapela taim ol i autim tok wantaim?
3. (a) Taim yumi bihainim gutpela pasin, maski yumi mekim liklik samting tasol, olsem wanem dispela samting inap helpim ol narapela? (b) Olsem Filipai 1:12-14 i tok, Pol i mekim wanem na dispela i strongim olgeta brata sista?
4. (a) Yumi mas wok long helpim husat long nau? (b) Bilong wanem long dispela taim nau yumi mas tingim gut tok bilong Hibru 10:24, 25?
5. (a) Olsem wanem yumi inap helpim ol pablisa i save autim tok long wan wan taim tasol? (b) Tok bilong Sindaun 25:11 i kirapim yumi long mekim wanem?
6. (a) Yumi ken mekim wanem bilong “helpim ol man i no inap helpim ol yet”? (b) Sapos yumi mekim ol dispela samting, bai yumi pilim tru wanem samting?