Autim Gutpela Tok—Mekim Wok Long Ol Liklik Nius na Tanget
1 Wanpela man i raitim pas long Sosaiti na em i tok: “Mi wokabaut na wanpela meri i givim wanpela liklik nius bilong Baibel long mi. Nem bilong dispela nius em Gutpela Sindaun long Nupela Taim. Taim mi no kaunim yet, mi stap bel hevi, tasol bihain mi stap bel isi na amamas.” Dispela man i laik kisim sampela save moa na em i askim Sosaiti long salim buk long em, nem bilong buk, Yu Inap i Stap Oltaim long Paradais long Graun, na em i tok: “Mi wetim dispela buk. Mi gat bikpela laik long kisim.”
2 Ol tok i stap long ol liklik nius na ol tanget i bin kirapim planti manmeri na ol i gat laik long kisim sampela save moa long Baibel, na nau ol i lotu long Jehova. Olsem wanem? Taim yu autim tok yu save mekim wok long ol liklik nius na ol tanget? Planti ol i mekim olsem. Long Bruklin long Nu Yok, ol i wokim pinis olsem 122 milion liklik nius, nem bilong en Gutpela Sindaun long Nupela Taim. I gat 3-pela narapela liklik nius, na ol i wokim olsem 250 milion; nem bilong ol, I Gat Wanem As na Yu Inap Bilip Tru long Baibel? na Wanem Sampela Bilip Bilong Ol Witnes Bilong Jehova? na I Gat Gutpela Samting Bai Painim Ol Man i Dai Pinis? Na ol i save salim olsem 12 milion tanget i go long ol kongrigesen long Amerika long olgeta yia.
3 Yumi no ken ting, ol tok bilong God i stap long ol dispela liklik nius na tanget i no gat strong. Nogat. (Hi 4:12; lukim tu Sekaraia 4:10; Jems 3:4, 5.) Wanpela Witnes bilong Arisona long Amerika i raitim pas olsem: “Mi kaunim planti liklik nius em Sosaiti Was Taua i wokim, na isi isi mi lain long tok i tru.” Na em i tok, “Pasin bilong ol man bilong nau em ol i save hariap hariap na ol i gat planti wok, olsem na ol i no laik lusim taim long kaunim ol buk samting. Tasol i gat ol bikpela tok i stap long ol liklik nius na ol tanget, olsem na ol i gutpela samting bilong givim long ol man, long wanem ol inap kaunim hariap.”
4 I gat kain kain as na planti man i no laik kisim ol buk samting yumi laik tilim long ol, tasol ol i amamas long kisim liklik nius. Wanpela wasman sekit i tok, em i gat wanpela liklik karamap plastik bilong putim ol liklik nius long en, na em i save larim man bilong haus i makim wanem liklik nius em i laik kisim. Em i tok, “Planti man i laik kisim dispela liklik nius nem bilong en, Wanem Sampela Bilip Bilong Ol Witnes Bilong Jehova?”
BILONG KIRAPIM TOK
5 Sampela pablisa i mekim wok long liklik nius o tanget bilong kirapim tok. Sapos man bilong haus i no laik opim dua tasol yu laik givim tanget long em, ating bai em i opim na kisim liklik nius o tanget. Sampela tanget i makim taim bilong ol miting, na sapos yu soim dispela long ol, ating bai rot i op na yu ken stori long wok bilong yumi.
6 Sapos man bilong haus i gat bikpela wok o i olsem em i gat sik o hevi samting, yu ken tilim liklik nius long em. Wanpela meri i kaunim liklik nius i stori long ol gutpela samting bai painim ol man i dai pinis na ol dispela tok i mekim gut bel bilong em, olsem na em i raitim pas long Sosaiti bilong kisim sampela save moa long dispela samting. Sapos i no gat man i stap long haus, yu ken lusim wanpela liklik nius; putim i go aninit long dua na subim i go insait tru o putim long wanpela hap em ol man i no inap lukim.
BILONG MEKIM GOBEK
7 Taim yu go bek lukim man, em pastaim em i bin amamas long harim tok, yu ken tok: “Gude, (kolim nem bilong em). Gutpela yu stap. Bipo taim mi kam lukim yu, mi amamas, long wanem yu lusim taim bilong toktok wantaim mi long tok bilong Baibel. Olsem na nau mi kisim wanpela liklik nius i kam, nem bilong en Gutpela Sindaun long Nupela Taim, na ating bai yu amamas long kaunim. Tasol taim ol man i kaunim tok long ol gutpela samting God i tok promis long kamapim, planti ol i ting long kisim ol dispela gutpela samting long heven tasol. Tasol Buk Song 37:29 i tok ol dispela gutpela samting bai kamap long graun. (Kaunim Baibel. Makim dispela tok bilong Baibel i stap we long liklik nius.) Em gutpela samting tru yumi ken wetim, a? (Stori liklik long tok bilong sampela paragraf.) Dispela nius i gat planti ol narapela tok bilong Baibel i stap long en na bai yu amamas long kaunim. Narapela taim mi kam, bai mitupela i ken kaunim sampela tok moa olsem nau yumi mekim.” (Paslain long miting redim gut dispela soim long pasin bilong i go bek lukim man i bin kisim liklik nius.)
8 Tru tumas, ol liklik nius na ol tanget i olsem gutpela presen yumi kisim long Jehova. Yumi mas mekim gutpela wok long ol dispela liklik nius na bai ol i helpim yumi long mekim gutpela wok autim tok i save litimapim nem bilong Jehova, na bai yumi kisim blesing oltaim oltaim long dispela rot.—Snd 22:29.
[Ol Askim]
1, 2. (a) Wanem samting i kirapim wanpela man long raitim pas long Sosaiti bambai em i ken kisim wanpela buk? (b) Long Amerika ol i mekim wok long hamas liklik nius na tanget?
3, 4. Ol liklik nius, maski ol i liklik, ol i gat strong. Olsem wanem dispela tok i stret wantaim ol tok bilong Baibel long Hibru 4:12; Sekaraia 4:10; Jems 3:4, 5?
5, 6. Olsem wanem yumi ken mekim wok long ol liklik nius bilong kirapim tok long man?
8. Sindaun 22:29 i strongim yumi olgeta wan wan long mekim wanem?