Mekim Singsing na Litimapim Nem Bilong Jehova
1 Plis opim buk singsing long baksait tru. Yu lukim wanem samting? Em piksa bilong wanpela lain man i singsing long haus lotu holi bilong Jehova. Ol i bilong lain Livai. Maus bilong ol i op tru, na ol i givim bel long mekim singsing. Mekim singsing em i bikpela hap wok bilong lotuim tru Jehova long haus lotu bilong em. Long taim bilong King Devit i gat ol man i mekim wok long haus lotu na planti bilong ol (winim 10 pesen) i gat wok long mekim singsing o paitim gita samting bilong litimapim nem bilong Jehova, na 288 bilong ol i skul gut long mekim singsing—“olgeta dispela man i save gut tru long mekim.” Ating ol dispela man i tingim gut wok bilong ol.—1 Sto 23:3, 5; 25:7.
2 Long taim bilong ol Kristen, Jisas wantaim ol aposel bilong em i mekim wanpela singsing long pinis bilong Kaikai Bilong Bikpela. (Mk 14:26) Na planti taim aposel Pol i tokim yumi long mekim singsing bilong litimapim nem bilong God. Long Kolosi 3:16 em i tok: “Yupela i mas larim tok bilong Krais i stap strong insait long bel bilong yupela. Yupela wan wan i mas skulim ol arapela Kristen na givim gutpela tingting na save long ol, bai ol i ken mekim gutpela pasin tasol. Yupela i mas tenkyu long God long bel bilong yupela, na yupela i mas singim ol song bilong Buk Song na ol arapela song bilong lotu na ol song Holi Spirit i kamapim long bel bilong yupela.”—Lukim tu Efesus 5:19, 20.
3 Mekim singsing bilong Kingdom em i wanpela rot bilong yumi ken litimapim nem bilong Jehova. Olsem na i stret yumi givim bel olgeta long mekim singsing, a? Taim yumi mekim olsem yumi litimapim nem bilong Jehova. Em i save harim ol singsing yumi mekim olsem em i save harim ol beten bilong yumi. Taim yumi givim bel long singsing strong, yumi mekim ol narapela i belgut na yumi helpim yumi yet.
4 Taim yu mekim singsing, tingim gut ol gutpela tok bilong singsing. Ol dispela tok i gutpela bilong helpim yumi long “skulim ol arapela Kristen na givim gutpela tingting na save long ol.” Ol dispela singsing i givim gutpela tingting tru long yumi! Sapos yumi tingim gut ol dispela tok, orait dispela bai helpim yumi long kisim ol gutpela pasin em spirit holi i kamapim long ol man, na bai ol dispela pasin i ken pulap tru long yumi. Na tu dispela bai helpim yumi long was gut, nogut ol samting bilong skin na ol samting bilong graun i pulim yumi. Sapos yumi ‘singim ol song long bel bilong yumi,’ dispela bai strongim yumi na bai yumi amamas long mekim wok bilong Jehova na yumi no pret long mekim.
5 Gutpela sapos brata bilong kirapim miting i ken kolim namba bilong singsing na kolim tu nem bilong singsing, na bai olgeta brata sista i ken redi na kirap wantaim long mekim singsing taim musik i kirap. Sampela taim em i ken kolim hap tok bilong Baibel i olsem as bilong singsing na mekim liklik tok long olsem wanem dispela tok i stret wantaim ol tok bilong miting.
6 Ol kaset bilong Singsing Bilong Kingdom na ol kaset bilong buk Mekim Singsing long Jehova, ol i gutpela rot bilong helpim ol famili bilong yumi long save gut long ol singsing. Taim yumi stap long haus, gutpela sapos yumi mekim wok long ol dispela kaset na bai yumi no hatwok tumas long lainim gut ol singsing.
7 Planti taim Baibel i tokim yumi, yumi gat wok long mekim singsing bilong litimapim nem bilong gutpela Papa bilong yumi em i stap long heven. Yumi mas givim bel olgeta long mekim. Long dispela rot yumi litimapim nem bilong God long ai bilong ol nupela man i kam bung wantaim yumi. Tru tumas, yumi mas mekim singsing long Jehova, olsem Devit bilong bipo i mekim.—Sng 108:1-3.